Balombodi 1 - Mukanda wa Nzambi Dihungila Dikulukulu ne Dihungila Dihia-dihia 2003

Bena Yuda ne Bena Shimeona Badi Bakuata Adoni-bezeke

¹ Ku nyima kua lufu lua Yoshua, Bena Isalele bakebesha Yehowa ne, Wadianjila kuya ku mpala kuetu kudi Bena Kanâna bua kuluangana nʼabo nvita nganyi?

² Yehowa wakamba ne, Bena Yuda nebaye; monai, nakafila buloba mu bianza biabo.

³ Bena Yuda bakambila bana babo ba balume Bena Shimeona ne, Nuye nʼetu ku buhianyi buetu bua tuetu tuluangane ne Bena Kanâna; ne tuetu kabidi netuye nʼenu ku buhianyi buenu. Bena Shimeona bakaya nʼabo.

⁴ Bena Yuda bakaya, ne Yehowa wakafila Bena Kanâna ne Bena Pelizi mu bianza biabo; bakashiha binunu dikumi bia bantu mu Bezeke.

⁵ Bakasangana Adoni-bezeke mu Bezeke; bakaluangana nʼandi, bakashiha Bena Kanâna ne Bena Pelizi.

⁶ Kadi Adoni-bezeke wakanyema; bakamulonda, bakamuheta, bakamukosa biala biandi ne bana ba nkasa banene.

⁷ Adoni-bezeke wakamba ne, Bakelenge makumi muanda mutekete bakadi ne biala biabo ne bana ba nkasa banene bikoseke bakadi badia bidia biabo muinshi mua mesa anyi; bu munakuenza, Nzambi wakunsombuela. Bakaya nʼandi ku Yelushalema, yeye wakafumaku.

Bena Yuda Badi Banyenga Yelushalema ne Hebelone

⁸ Bena Yuda bakaluangana ne Bena Yelushalema, bakaunyenga, bakashiha bena musoko ne muele wa nvita, bakosha tshimenga ne kahia.

⁹ Ku nyima Bena Yuda bakaya kuluangana ne Bena Kanâna ba ku mukuna, ne ba ku luseke lua ku Sude ne mu tshibanda kabidi.

¹⁰ Bena Yuda bakaya kuluangana ne Bena Kanâna bakadi bashikama mu Hebelone (dina dia Hebelone diambedi diakadi Kîyata-âba); bakashiha Sheshai ne Ahimana ne Talemai.

Oteniele Udi Unyenga Debî, Udi Wangata Akasa bu Mukashi Wandi

¹¹ Wakumukaku, wakaya kuluisha Bena Debî. (Dina dia Debî diambedi diakadi Kîyata-sefê).

¹² Kaleba wakamba ne, Udi ushiha Kîyata-sefê, udi ûnyenga, nemmuhe Akasa, muanʼanyi mukashi, bu mukashi wandi.

¹³ Oteniele, muana mulume wa Kenaza, muakunyi wa Kaleba, wakaunyenga; yeye wakamuha Akasa bu mukashi wandi.

¹⁴ Hakalueye kudiye, yeye wakamuenzesha bua kulombeye tatu wandi budimi; mukashi wakatuluka ha nyima ha mpunda wandi: Kaleba wakamukonka ne, Udi musue tshinyi?

¹⁵ Yeye wakamuambila ne, Unvudishile disanka; wewe wakamana kumpa buloba bua ku luseke lua Sude, Umpe kabidi mishimi ya mai. Kaleba wakamuha mishimi ya mai yakadi ku mutu ne yakadi kumanda kabidi.

Miaba Yakanyengabo kudi Bena Yuda ne Bena Benyamina

¹⁶ Bana ba Muena Kena, tatuʼandi-muenu wa Mose, bakumuka ku musoko wakadi ne mabue a ngashi, bakaya ne Bena Yuda ku tshihela tshia Yuda, tshidi ku luseke lua ku sude wa Alada; bakaya, bakashikama ne bantu aba.

¹⁷ Yuda wakaya ne muanʼabo Shimeona, bakashiha Bena Kanâna bakadi bashikama mu Sefata, bakabutula musoko mene. Dina dia musoko diakadi Homa.

¹⁸ Bena Yuda bakanyenga Gaza kabidi ne matshika au, ne Ashekelona ne matshika au, ne Ekelona ne matshika au.

¹⁹ Yehowa wakadi ne Bena Yuda, bakihata bakadi ku mikuna, kadi kabakamanya mua kuihata bakadi bashikama mu bibanda bualu bua bobo bakadi ne makalu a biamu.

²⁰ Bakaha Kaleba Hebelone, bu muakamba Mose; yeye wakihata bana balume ba Anaka basatu bakadimu.

²¹ Bena Benyamina kabakihata Bena Yebuse hakadi bashikama mu Yelushalema; kadi Bena Yebuse badi bashikama ne Bena Benyamina mu Yelushalema tô ne lelu.

Bena Yosefe Badi Banyanga Betele

²² Bena Yosefe bakaya bua kuluisha Bena Betele; Yehowa wakadi nʼabo.

²³ Bena Yosefe bakatuma bantu bua kutentekelabo Betele. (Dina dia Betele diambedi diakadi Luza.)

²⁴ Batentekedi aba bakamona muntu ufuma mu musoko, bakamuambila ne, Tudi tukusengelela ne utuleshe tshibuelelu tshia mu musoko, ne tuetu netukufuile luse.

²⁵ Yeye wakabalesha tshibuelelu tshia mu musoko, bakashiha bena musoko ne muele wa nvita; kadi bakalekela muntu eu ne bantu bonso ba mu nsubu muandi.

²⁶ Muntu eu wakaya ku buloba bua Bena Hiti, wakasaku musoko, wakawidika ne Luza; edi ndina diau tô ne lelu.

Miaba Yakadi Bena Manashe ne Bena Efelayima Kabayi Banyenge

²⁷ Bena Manashe kabakihata Bena Bete-sheana ne misoko yau, anyi Bena Tanaka ne misoko yau, anyi Bena Dô ne misoko yau, anyi Bena Yibelama ne misoko yau, anyi Bena Megido ne misoko yau; kadi Bena Kanâna bakadi bashikama mu buloba abu.

²⁸ Hashishe hakakumbana Bena Isalele ba bungi, bobo bakenzesha Bena Kanâna mudimu wa mulambu, kabakabihata mene.

²⁹ Bena Efelayima kabakihata Bena Kanâna bakadi bashikama mu Gezê; kadi Bena Kanâna bakashikama mu Gezê munkatshi muabo.

Miaba Yakadi Bisamba Bikuabo bia Bena Isalele Kabayi Banyenge

³⁰ Bena Zebuluna kabakihata bantu ba mu Kitîlona anyi ba mu Nahalola; kadi Bena Kanâna bakashikama munkatshi muabo, bakabenzesha mudimu wa mulambu.

³¹ Bena Ashe kabakihata bantu ba mu Ako, anyi bantu ba mu Sidona, anyi ba mu Alabâ, anyi ba mu Akiziba, anyi ba mu Heleba, anyi ba mu Lehoba;

³² kadi Bena Ashê bakashikama munkatshi mua Bena Kanâna, bena buloba; bualu bua kabakabihata nansha.

³³ Bena Nafatale kabakihata bantu ba mu Bete-shemeshe, anyi ba mu Bete-anata; kadi bakashikama munkatshi mua Bena Kanâna, bena buloba; kadi Bena Bete-shemeshe ne Bena Bete-anata bakabakuatshila mudimu wa mulambu.

³⁴ Bena Amole bakasemesha Bena Dana ku mukuna, bualu bua kabakitabusha bua bahueke mu tshibanda;

³⁵ kadi Bena Amole bakashikama ku mukuna wa Helese, wa mu Ayalona, ne mu Shâlabima; kadi tshianza tshia Bena Yosefe tshiakabahita, bobo bakabakuatshila mudimu wa mulambu.

³⁶ Matshika a Bena Amole akabangila ku dibue dinene, akabanda tô ne ku mutu kua Akalabima.