Amosa 9 - Mukanda wa Nzambi Dihungila Dikulukulu ne Dihungila Dihia-dihia 2003

Kabena mua Kuehuka ku Dilumbulula dia Yehowa

¹ Nakatangila Yehowa muimane ha buihi ne tshioshelu; yeye wakamba ne, Kuma ku mitu ya makunshi a ku bibuelelu bia nsubu bua azakale; wâtshibule bituha ha mitu ha bantu bonso; nenshihe bakuabo badi bashala ne muoyo ku muele wa nvita, kakuena umue wabo wanyema, kakuena umue wabo wahanduka.

² Nansha biumbulabo dina tô ne ku Muaba wa Bafue, tshianza tshianyi netshibakuateku; nansha biabandabo tô ne mu diulu, nembatulule hanshi.

³ Nansha biabutamabo ku mutu kua Kâmele, nembakebeku ne nembakuate bua kubumushaku; nansha biasokomabo ku mesu kuanyi mu ndondo wa mai manene, nengele nyoka dî mu muaba wawa bua yeye abasume.

⁴ Nansha biayabo mu buhika hatungunusha ku mpala kudi badi nʼabo lukuna, mu muaba au nengele muele wa nvita dî, bua wowo ubashihe; nentangishe disu dianyi kudibo bua kubenzela bibi, kembua kubenzela bimpe.

⁵ Bualu bua Yehowa, Nzambi wa misumba, nyeye udi ulenga buloba tshianza ne budi buvingutuka, ne bonso badi bashikamehu badi basa muadi. Buloba buonso budi bubanda bu mudi musulu wa Nile ubanda, budi buhueka kahidi, bu mudi musulu wa Ejipitu uhueka.

⁶ Nyeye udi wibaka nsubu yandi mu diulu, udi ujadika diulu diandi didi ha mutu ha buloba; udi Ubikila mai a mu mai manene kudiye, udi wahongolola hanshi ha buloba; Yehowa ndina diandi.

⁷ Yehowa udi ukonka ne, Nuenu Bena Isalele, kanuena bu bana ba Bena Atiopa kundi, anyi? Tshiakaluhula Bena Isalele mu buloba bua Ejipitu, ne Bena Peleshete ku Kefetô ne Bena Sulia ku Kî, anyi?

⁸ Monai, mesu a Yehowa Nzambi adi matangishe ku bukelenge budi ne malu mabi; nembubutule ne nembûmushe hanshi ha buloba; kadi tshiena mbutula tshisamba tshia Yakoba kabutu nansha. Yehowa udi wamba nunku.

⁹ Monai, nengele dî dianyi, nennyungishe tshisamba tshia Bena Isalele munkatshi mua bisamba bionso, bu mudi muntu usenga manvua mu munyingu, diteta nansha dimue kadiyi dihona hanshi.

¹⁰ Nebashihe bantu babi bonso ba munkatshi mua bantu banyi ku muele wa nvita, babo bamba ne, Bualu bubi kabuena butuheta, kabuena bufika kutudi nansha.

Yehowa Neumushe Bena Isalele mu Buhika

¹¹ Mu dituku adi nengibake kabidi nsubu wa Davidi wakadi muhuke, nengibake kabidi bituha bia bimanu biandi bidi bishimbuke; nengibake bituha biandi biakanyanguka, nemmuase bua kuikaleye bu muvueye diambedi.

¹² Bua bebe bangate difuka dia Bena Edome didi dishala ne ba mu bisamba bionso bidi dina dianyi ditedibue munkatshi muabo; mmudi Yehowa, udi wenza muanda eu, wamba.

¹³ Yehowa udi wamba ne, Monai, matuku alualua adi mudimi ne munowi balondangane ha buihi, ne mudiatshi wa tumuma tua nvinyo neihatshile mukunyi wa maminu; mikuna minene neyimatshishe nvinyo mishemakane, ne mikuna mikese yonso neyihatuke mai.

¹⁴ Nengumushe bantu banyi Bena Isalele mu buhika bua kubaha diakalengele, nebibake kabidi misoko yakadi bikulu, nebashikamemu; nebakune tumuma tua nvinyo mu madimi, nebanue nvinyo yatu; nebadime madimi, nebadie mamuma aluamu.

¹⁵ Meme nembajadike mu buloba buabo mene; kabena bumushibue kabidi mu buloba bunakubaha. Yehowa Nzambi webe udi wamba mei â.