Amosa 8 - Mukanda wa Nzambi Dihungila Dikulukulu ne Dihungila Dihia-dihia 2003

Tshibondo tshia Mamuma Mabobe

¹ Mukelenge Yehowa wakandesha tshikena kumona etshi: Monai, tshibondo tshia mamuma mabobe.

² Yeye wakankonka ne, Amosa, udi umona tshinyi? Nakamuitaba ne, Tshibondo tshia mamuma mabobe. Hashishe, Yehowa wakangambila ne, Nshikidilu wakufika kudi bantu banyi Bena Isalele; tshiena mbabuikidila bubi kabidi tshiendelele.

³ Mukelenge Yehowa udi wamba ne, Misambu ya mu nsubu wa mukelenge neyandamuke miadi dituku adi. Bitalu bia bafue nebikale bia bungi; nebabimashe mu miaba yonso, bahuwe talalâ.

Dibutuka dia Bena Isalele Didi ha Buihi

⁴ Unvuai bualu ebu, nuenu badi badiata bakengi mu makasa, ne badi babutule bahele ba mu ditunga,

⁵ nuambe ne, Ngondo neafue diba kai bua tumanye mua kuhana manvua? Dituku dia Lumingu nedishike diba kai bua tumanye mua kuhatula blé ya kuhana, tukeheshe tshihiminu tshia épha ne tubandishe mushinga wa blé, tudinge bantu ne tshidikishilu tshia mafi;

⁶ bua tusumbe bahele ku tshiamu tshia argent ne bakengi ku bisabata bibidi, ne bua tuhane bisote bia blé bu blé miakane?

⁷ Yehowa wakuditshiha ku bulengele bua Yakoba ne, Bulelela, tshiena mpua bienzedi biabo bionso muoyo tshiendelele.

⁸ Buloba kabuena mua kuzakala bua muanda eu, anyi? Bonso badi bashikamemu kabena mua kuasa miadi, anyi? E, buloba buonso nebubande bu mudi musulu wa Nile ubanda; nebunyungishibue, nebuhueke kabidi bu mudi musulu wa Ejipitu wenza.

⁹ Mukelenge Yehowa udi wamba ne, Hamueneka malu â dituku adi, nengenzeshe diba bua kubueladi munda munya, nenfikishe buloba hatshidi diba mulu.

¹⁰ Nenkudimune bikondo bienu bia kudia bia disanka bua kulabi bu bia madilu, ne misambu yenu yonso bua kuluayi miadi; nenvuadike bantu bonso bilulu bikayabala mu bifuka biabo, nentule dibala ha mutu wonso; nenvuishe tshikondo atshi bu tshia madilu adibo bashila muana umuehele muledibue, ne kunshikidilu kuatshi nekuikale bu dituku dia kanyinganyinga kakole.

¹¹ Mukelenge Yehowa udi wamba ne, Monai, mu matuku ulualua, nentume tshiole mu buloba, tshidi katshiyi bu tshiole tshia bia kudia, ne nyota idi kayiyi bu nyota ya mai, kadi ntshiole tshia kunvua mei a Yehowa.

¹² Nebendakane ku mai manene tô ne ku mai manene makuabo, ne ku node tô ne ku esete; nebendakane eku ne eku bua kukebabo dî dia Yehowa, kadi kabena badisangana.

¹³ Mu dituku adi mishikankunde ya mpala mimpe ne bansongalume nebahungile ne nyota.

¹⁴ Badi baditshiha ku bubi bua Samalea, bamba ne, Wewe Dana, bu mudi nzambi webe ne muoyo! Bu mudi nshila wa ku Bê-sheba mutshikaleku, bobo aba nebahone hanshi, kabena bajuka kabidi tshiendelele!