Amosa 5 - Mukanda wa Nzambi Dihungila Dikulukulu ne Dihungila Dihia-dihia 2003

Yehowa Udi Ubasengelela bua Kukudimunabo Mitshima

¹ Unvuai dî edi dia muadi dindi nnuashila, nuenu Bena Isalele.

² Muana mukashi utshidi kamama, Isalele mene, udi muhone hanshi; kena ujuka kabidi kashidi; bakamuela hanshi; kakuena muntu wa kumujula kabidi.

³ Bualu bua Mukelenge Yehowa udi wamba ne, Mu musoko mudi muhatuke bantu tshinunu nemushale anu lukama; ne mu musoko mudi muhatuke bantu lukama nemushale anu dikumi dia Bena Isalele.

⁴ Bua Yehowa udi wambila Bena Isalele dî edi ne, Nkeba! meme ne nenuikale ne muoyo;

⁵ kadi kanukebi Betele, kanuyi ku Gilegala, kanuyi ku Bê-sheba. Bualu bua ba mu Gilegala nebabuele mu buhika bulelela, ne Betele nealue muaba wa hatuhu.

⁶ Kebai Yehowa, nenuikale ne muoyo; bua yeye katemeshi kahia mu tshiota tshia Yosefe, bua koko kakabashidishi, kakuyi muntu mu Betele udi mua kukajima;

⁷ nuenu mbadi bakudimuna kulumbulula kuakane bua kuluaku anu bululu, mbadi badiate buakane ne makasa.

⁸ Yeye wakafuka mitoto ya Tshidiminanzashi ne ya Nyama ne Mbua ne Muntu, udi ukudimuna mundidimbi wa lufu bua kuluau bu dinda, udi ukudimuna munya bua kuluau butuku; udi Ubikila mai a mu mai manene kudiye, ne udi wahongoluela ha buloba; Yehowa ndina diandi.

⁹ Yeye udi utuma dibutuka kudi bena bukitu, ne udi ubutula misoko ya ngumbu.

¹⁰ Badi ne muntu udi ubabela ku tshibuelelu tshia musoko lukuna, badi bahetula muntu udi wamba mei malelela.

¹¹ Nudi nudiata muntu muhele muinshi mua makasa enu, ne nudi numunyenga milambu ya blé ku bukole; nunku bua bualu ebu nsubu ya mabue masonga inuakuibaka, kanuena nushikamamu; tumuma tuimpe tua nvinyo tunuakukuna, kanuena nunua nvinyo yatu.

¹² Bualu bua ndi mumanye ne malu mabi enu adi mavule, ne mibi yenu idi mihite bukole; nuenu nudi nukengesha badi bakane, nudi nuangata mbueshilu, nudi nusesuishe bahele ku tshibuelelu tshia musoko.

¹³ Nunku muntu udi ne budimu neahuwe mu tshikondo atshi, bualu bua ntshikondo tshibi.

¹⁴ Kebai malu makane, kanukebi malu mabi, bua nuenu nuikale ne muoyo; nunku Yehowa, Nzambi wa misumba, neikale nʼenu, bu munutu nuamba.

¹⁵ Kinai malu mabi, nangai malu mimpe, jadikai kulumbulula kuakane ku tshibuelelu tshia musoko. Bumue Yehowa, Nzambi wa misumba, nealeshe luse luandi kudi ba mu tshiota tshia Yosefe badi bashala ne muoyo.

¹⁶ Nunku Yehowa, Nzambi wa misumba, Mukelenge, udi wamba ne, Muadi newikale mu misesu minene yonso, ne mu misesu yonso bantu nebambe ne, Aka! Aka! Nebabikile ba bidime bua kuasabo madilu, nebabikile bena kasala bonso badi bamanye mua kudila muadi.

¹⁷ Yehowa udi wamba ne, Mu madimi onso a tumuma tua nvinyo nemuikale muadi; hualu bua nempite munkatshi muenu.

¹⁸ Mulau unukuate nuenu badi ba sue dituku dia Yehowa dimuenekele! Nudi ntekemena tshinyi mu dituku dia Yehowa? Didi mîdima, kadiena munya nansha.

¹⁹ Didi bu muntu munyeme nyama wa ntambue ne udi usambakena ne nyama wa nkashama! Anyi didi bu muntu mubuele mu nsubu muandi, muteke tshianza tshiandi ku tshimanu tshia nsubu, ne nyoka udi umusuma!

²⁰ Kanuena bamanye ne dituku dia Yehowa nedikale mîdima, kadiyi ne munya, anyi? Didi mufitu, kadiyi ne dinkenke nansha kakese.

²¹ Ndi mbenga bidia bienu bia disanka, bidi bintonda; tshiena ngunvua disanka hua masangisha enu.

²² Bulelela, nansha binuafila milambu yenu kundi mudi nungoshila, ne milambu yenu ya bia kudia, tshiena ngiyitabusha; tshiena ntangisha mesu anyi ku milambu yenu ya bimuna bidi ne manyi bua kuyuisha nʼai ditalala.

²³ Umukai kundi ne mutoyi wa misambu yenu, tshiena nteleja matshu anyi ku muadi wa bisanji bienu.

²⁴ Kadi kulumbulula kuakane kuhueke hanshi bu mai, ne buakane buikaleku bu musulu udi uhueka tshiendelele.

²⁵ Nuenu Bena Isalele, nuakulua budi ne milambu ya nyama minshihela ne ya bia kudia bidimu makumi anai mu tshihela, anyi?

²⁶ Kadi nuakuambula ntenta wa mukelenge wenu, ne tshitekelu tshia mpingu yenu, mutoto wa nzambi wenu binuakudifudila.

²⁷ Nunku meme nennutume mu buhika mu buloba budi buhita Damaseke kule. Yehowa, Nzambi mene wa misumba, udi wamba dî edi.