2 Tesalonike 3 - Mukanda wa Nzambi Dihungila Dikulukulu ne Dihungila Dihia-dihia 2003

Paulo udi musue bobo bamulombele Nzambi

¹ Tshiashadidi mpindiu, bana betu, nutulombele Nzambi, bua dî dia Mukelenge diendakane ne ditumbishibue, bu mudidi munkatshi muenu kabidi;

² ne bua tuetu tuhanduke mu bianza bia bena tshinyangu ne bantu babi; bualu bua bonso kabena ne ditabusha.

³ Kadi Mukelenge udi mua kueyemenyibua, yeye neanujadike, neanulame ku bubi.

⁴ Tudi ne ditekemena mu Mukelenge bua bualu buenu ne, Nudi nuenza, ne nenuenze malu atudi tunuelela mikenshi.

⁵ Ne Mukelenge alombole mitshima yenu mu dinanga dia Nzambi ne mu dinanukila diakadi Kilisto nʼadi.

Kababuelakanyi ne bantu babi

⁶ Bana betu, tudi Umuelela mukenshi mu dina dia Mukelenge Yesu Kilisto bua nuenu nudilamune kudi muanʼenu yonso wa mu Kilisto udi wenda utshimbakana, ne udi kai wenda bu mudi bilele biambibua kutudi binuakangata.

⁷ Bua nuenu bine nudi bamanye bu munudi ne bualu bua kuidikisha, bua katuakenda tutshimbakana munkatshi muenu;

⁸ ne katuakadia bidia bia muntu mukuabo hatuhu, kadi mu mudimu mukole ne mu lutatu, tuakenza mudimu ne bianza bufuku ne munya, bua katuikadi bujitu hamʼbidi ha umue wenu.

⁹ Kembua katui ne bukokeshi bua kunulomba dikuatshisha, kadi bua kudivuisha tshifuanyikishi kunudi bua nuenu kutuidikisha.

¹⁰ Bua hatuakadi munkatshi muenu mene, tuakanuelela mukenshi eu ne, Bikala muntu kai witabusha kuenza mudimu, kadi biandi tshintu.

¹¹ Bua tudi tunvua lumu lua banga badi benda batshimbakana munkatshi muenu, kabai benza mudimu nasha kakese, kadi badi bena bienzenza.

¹² Tudi tuelela bantu aba ba nunku mukenshi ne tudi tubasengelela mu Mukelenge Yesu Kilisto ne, Benze mudimu wabo talala, ne badidile bidia biabo.

¹³ Kadi nuenu, bana betu, kabiteketshi mu kuenza kua malu mimpe.

¹⁴ Bikala muntu mukuabo kai utumikila dî dietu dia ku mukanda eu, mimanye muntu au bua kanubuelakanyi nʼandi, bua ku-fuishibueye bundu ku mesu.

¹⁵ Ne kanumubadi bu muena lukuna, kadi numudimushe bu muanʼenu wa mu Kilisto.

¹⁶ Mukelenge wa ditalala anuhe ditalala misangu yonso mu mianda yonso. Mukelenge ikale ne buonso buenu.

¹⁷ Diela dia muoyo dia kudi meme Paulo difunda ne tshianza tshianyi, ntshimanyinu mu mukanda wonso; nunku mundi nfunda.

¹⁸ Ngasa wa Mukelenge wetu Yesu Kilisto ikale ne buonso buenu.