2 Tesalonike 1 - Mukanda wa Nzambi Dihungila Dikulukulu ne Dihungila Dihia-dihia 2003

Paulo ne Siluano ne Timote badi babatumina muoyo

¹ Paulo ne Siluano ne Timote kudi ekelesia wa bena Tesalonike wa mu Nzambi Tatu wetu ne mu Mukelenge Yesu Kilisto.

² Ngasa kunudi ne ditalala bia kudi Nzambi Tatu ne Mukelenge Yesu Kilisto.

Paulo udi usadikila Nzambi bua ditabusha diabo ne bua bukole buabo mu Nzambi

³ Bana betu, butudi nʼabu mbua kusakidila Nzambi misangu yonso bua bualu buenu, bu mudibu buakane, bua ditabusha dienu didi ditamba kudiunda, ne dinanga dia buonso buenu muntu ne muntu dinudi nunangangana nʼadi didi divulangana;

⁴ bua muanda eu tuetu tudi tutumbila bua bualu buenu mu ekelesia ya Nzambi bualu bua ditantamana dienu ne bua ditabusha dienu mu makenga enu onso ne mu matata onso anudi nuikala nʼau.

⁵ Malu â adi tshimanyinu tshia dilumbulula diakane dia Nzambi; bua nuenu nubadibue bakanangane ne bukelenge bua Nzambi bunudi nukengela bualu buabu kabidi;

⁶ bikalahu buakane bua Nzambi kuhingisha makenga kudi badi banukengesha;

⁷ ne bua kunuheye nuenu badi bakengeshibua dikisha hohamue nʼetu, ku dibuluibua dia Mukelenge Yesu halueye mu diulu ne banjelo ba bukole buandi mu kahia kadi kakenka.

⁸ Neadisombuele kudi bantu badi kabai bamanye Nzambi ne kudi badi kabai batumikila lumu luimpe lua Mukelenge wetu Yesu;

⁹ bobo aba nebahete dikenga, dibutuka dia tshiendelele mene, dia ku mesu kua Mukelenge ne ku butumbi bua bukole buandi,

¹⁰ halueye bua kutumbishibua mu basanto bandi, ne bua kukemibua mu dituku diadia kudi bantu bonso bamane kumuitabusha (bualu bua bumanyishi buetu kunudi buakitabushibua).

Paulo udi ubalombela Nzambi

¹¹ Bua bualu ebu tudi tunulombela kabidi misangu yonso bua Nzambi wetu anubale bakanangane ne dibikidibua dienu, ne bua yeye akumbashe ne bukole buandi disua dienu dionso dia buimpe ne mudimu wenu wa ditabusha;

¹² bua dina dia Mukelenge wetu Yesu ditumbishibue munda muenu, ne nuenu nutumbishibue munda muandi, bu mudi ngasa wa Nzambi wetu ne wa Mukelenge Yesu Kilisto.