2 Samuele 22 - Mukanda wa Nzambi Dihungila Dikulukulu ne Dihungila Dihia-dihia 2003

Musambu wa Luhandu wa Davidi

¹ Mu dituku diakasungila Yehowa Davidi mu bianza bia bantu bakadi nʼandi lukuna ne mu bianza bia Shaula kabidi, Davidi wakimbila Yehowa mei a musambu eu;

² yeye wakamba ne, Yehowa udi dibue dianyi, ne musoko wanyi wa lumbu, ne musungidi wanyi mene,

³ Nzambi, dibue dianyi, nengeyemene kudiye, ngabu wanyi, ne lusengu lua luhandu luanyi, tshibumba tshianyi tshile ne tshinyemenu tshianyi, musungidi wanyi, udi usungila ku malu makole onso.

⁴ Nembikile dina dia Yehowa, udi ne bua kutumbishibua, nunku nensungidibue kudi badi nʼanyi lukuna.

⁵ Mavuala a lufu akungela munkatshi, bantu babi bu mai adi atuntumuka bakuntshinyisha.

⁶ Nshinga ya mu Muaba wa Bafue yakunjingila, mateyi a lufu akamba kunkuata.

⁷ Mu kunyingalala kuanyi nakabikila Yehowa; e, nakadila kudi Nzambi wanyi. Yeye wakunyua dî dianyi mu ntempelo wandi, muadi wanyi wakafika mu matshu andi.

⁸ Hashishe buloba buakakanka, buakazakala; makunshi a diulu akanyunga, akazakishibua, bualu bua yeye wakadi ne tshiji.

⁹ Muishi wakahatuka mu diulu diandi, kahia ka mukana muandi kakosha bintu; makala a kahia akatemeshibue kudiku.

¹⁰ Yeye wakatubula diulu kabidi wakahueka hanshi; mîdima mikole yakadi munda mua makasa andi.

¹¹ Wakabanda ha nyima ha mukeluba, wakahahala; e, bakamutangila wenda ha mahuahua a luhehele.

¹² Yeye Wakenza midima bu ntenta wandi, mai masangisha ne matutu mafike a mu diulu.

¹³ Ku dinkenka diakadi ku mpala kuandi, makala a kahia akatemeshibua

¹⁴ Yehowa wakakunguisha mikungulu ya mu diulu, Mutambe Bunene wa mulu wakela dî diandi.

¹⁵ Wakela mikete, yakabamuangalasha; wakahenyisha miele ya nvula, yakabatatshisha.

¹⁶ Hashishe lusenga lua mu mai manene luakamueneka, ntakunshi a buloba akasokoloka, bualu bua kubela kua Yehowa, bua bukole bua muhuya wakahatuka mu diulu diandi.

¹⁷ Wakolola tshianza tshiandi mu diulu, wakangata, wakankoka mu mai manene a bungi.

¹⁸ Wakasungila kudi muena lukuna wanyi mukole, mu bianza bia bakadi bankina, bualu bua bobo bakampita bukole.

¹⁹ Bobo bakantulukisha mu didiku dia dikenga dianyi; kadi Yehowa wakadi tshieyemenu tshianyi.

²⁰ Yeye wakalua nʼanyi mu muaba munene; wakasungila, bualu bua wakadi ne disanka bualu buanyi.

²¹ Yehowa wakanfuta ku buimpe buanyi; wakampingishila bintu ku butoke bua bianza bianyi.

²² Bualu bua meme nakalamata nshila ya Yehowa; tshiakenza bibi bua kusesuka kudi Nzambi wanyi.

²³ Bualu bua mikenji yandi yonso mijalame yakadi ku mpala kuanyi; tshiakasesuka ku mikenji yandi mifunda.

²⁴ Nakadi ne mutshima mutoke kudiye, nakadilama ku bubi buanyi.

²⁵ Nunku Yehowa wakanfuta ku buimpe buanyi, ne ku butoke kunakadi nʼabu ku mesu kuandi.

²⁶ Wewe neuleshe luse kudi badi ne luse, neuleshe mutshima mutoke kudi badi ne mutshima mutoke.

²⁷ Wewe neudileshe muakane kudi badi ne buakane; neuleshe mutshima mukole kudi badi ne mutshima mukole.

²⁸ Wewe neusungile bantu badi mu dikenga; kadi mesu ebe adi kudi badi badisue anu bua wewe kubahuekesha.

²⁹ Wewe Yehowa, udi muinda wanyi; Yehowa neatokeshile mîdima yanyi.

³⁰ Bua bualu buebe ndi mumanye mua kuihata tshisumbu tshia bantu; bua Nzambi wanyi ndi mua kutuhika lumbu.

³¹ Nshila wa Nzambi udi muakane tshishiki; dî dia Yehowa didi ditetshibua; yeye udi ngabu kudi bantu bonso badi banyemena kudiye.

³² Nganyi udi Nzambi bikaleye kayi Yehowa? Nganyi udi dibue, bikaleye kayi Nzambi wetu?

³³ Nzambi udi musoko wanyi wa lumbu; udi ulombola badi bakane mu nshila yandi.

³⁴ Yeye udi uvuisha makasa anyi bu makasa a ngulungu; udi unshikika ha miaba yanyi mibanda.

³⁵ Udi uyisha bianza bianyi mua kuluangana nvita; nunku maboko anyi adi mamanye mua kunana buta bua tshiamu tshia mitaku.

³⁶ Wewe wakumpa ngabu wa luhandu luebe; lutulu luebe luakunvuisha munene.

³⁷ Wewe wakadimusha biendedi bianyi, nunku makasa anyi kakahalamuka.

³⁸ Nakihata bakadi nʼanyi lukuna, nakabashiha, tshiakalukila kabidi tô ne hanakabashiha.

³⁹ Nakabajimisha, nakababutula, ne kabakamanya mua kubika kahidi; e, bakahona muinshi mua makasa anyi.

⁴⁰ Bualu bua wewe wakunduatshisha ne bukole bua kuluangana nʼabu; wewe wakuntekeshila bakajuka bua kunduisha.

⁴¹ Wewe wakangelesha nyima ya bakadi nʼanyi lukuna, bua meme kushiha bakadi bankina.

⁴² Bakakebulula, kadi kakuakadi wa kubasungila; bakadila kudi Yehowa, kadi yeye kakabitaba.

⁴³ Hashishe nakababotesha bu kasoka ka buloba, nakabadiata bu bitotshi bia mu misesu, nakabamuanga lasha.

⁴⁴ Wewe wakasungila kabidi ku matandu a bantu banyi; wakajadika bua meme kuikala ku mutu kua bisamba bia bantu; bantu bandi tshiyi mumanye nebankuatshile mudimu.

⁴⁵ Bantu ba bende nebadikokeshe kundi; hunvuabo lumu luanyi nebatumikile.

⁴⁶ Bantu ba bende nebashinguke, nebumuke mu bisokomenu biabo, bazakale.

⁴⁷ Yehowa udi ne muoyo; dibue dianyi disankishibue, Nzambi atumbishibue, dibue dia luhandu luanyi.

⁴⁸ Nzambi mene udi unsombuela, udi untekeshila bantu,

⁴⁹ udi ungumusha kudi badi nʼanyi lukuna; e, udi umbandisha ku mutu kua bantu bakajuka bua kunduisha, wewe udi usungila mu bianza bia muntu mubuluke.

⁵⁰ Nunku Yehowa, nenkusakidile munkatshi mua bisamba bionso, nengimbile dina diebe misambu ya butumbi.

⁵¹ Yeye udi uhesha mukelenge wandi luhandu lunene, yeye udi ulesha wakeleye manyi ha mutu luse lujalame, kudi Davidi ne kudi tunkanuniuna tuandi tshiendelele.