2 Samuele 19 - Mukanda wa Nzambi Dihungila Dikulukulu ne Dihungila Dihia-dihia 2003

Davidi Udi Uhingana ku Yelushalema

¹ Bakambila Yoaba ne, Mona, mukelenge udi udila madilu bua Abashaloma.

² Luhandu lua dituku adi luakandamuka madilu, bualu bua bantu bonso bakulua lumu ne, Mukelenge udi ne kanyinganyinga bua muanʼandi.

³ Bantu bakahingana ku musoko mu musokoko dituku adi, bu bantu badi ne bundu batshimukabo mu nvita.

⁴ Mukelenge wakabuikila mutu wandi, wakadila ne dî dikole ne, Muanʼanyi Abashaloma, Abashaloma muanʼanyi, muanʼanyi!

⁵ Yoaba wakabuela mu nsubu wa mukelenge, wakamuambila ne, Wewe wakafuisha bantu bebe bonso bundu lelu, bakusungila muoyo webe lelu, ne mioyo ya bana bebe balume ne ya bana bebe bakashi, ne mioyo ya bakashi bebe ne ya bakashi bahika babakibue kudi,

⁶ bualu bua wewe udi unanga badi bakuona, udi ukina badi bakunanga. Bualu bua wewe wakuamba lelu ne, Baminyampala ne bantu badi tshianana ku mesu kuanyi; ndi ngelangana meji munda ne, Bu Abashaloma muikale ne muoyo, ne bu tuetu bonso bafue, bualu ebu buakadi kunsankisha.

⁷ Nunku juka biebe, uluhuke, wambile bantu bebe mei a kubasamba nʼau; bualu bua ndi muditshihe kudi Yehowa ne, Biwahidia kuluhuka kudibo, nansha muntu umue neikale nʼebe butuku ebu; dikenga edi neditambe makenga onso akakukuata ku buana buebe tô ne katataka bubi.

⁸ Hashishe mukelenge wakabika, wakashikama ku tshibi tshia musoko. Bakambila bantu bonso ne, Monai, mukelenge udi ushikama ku tshibi; ne bantu bonso bakalua ku mpala kua mukelenge. Bena Isalele bonso bakadi banyema muntu ne muntu ku ntenta wandi.

⁹ Bantu bonso ba mu bisamba bionso bia Bena Isalele bakatandangana bamba ne, Mukelenge wakatusungila mu bianza bia bena lukuna betu; wakatusungila mu bianza bia Bena Peleshete kabidi, ne katataka yeye wakanyema mumuke mu buloba bualu bua Abashaloma.

¹⁰ Abashaloma utuakela manyi bua kuikaleye ku mutu kuetu wakafua mu mata. Bualu kai kanuena ne di bua kuhingisha mukelenge?

¹¹ Mukelenge Davidi wakatuma mukenji kudi Sadoka ne Ebeyatâ bakuidi wamba ne, Nukonke bakulu ba mu Yuda ne, Nuenu nutshidi bashadile ku nyima bua kuhingisha mukelenge ku nsubu wandi bualu kai? Bualu bua Bena Isalele bonso hakamana kuhunga dî bua kuhingisha mukelenge ku nsubu wandi.

¹² Nuenu nudi bana betu, nudi bu mifuba ya mifuba yanyi ne musunyi wa mu misunyi yanyi; nunku nutshidi bashadile ku nyima bua kuhingisha mukelenge bua tshinyi?

¹³ Nuenu nukonke Amasa kabidi ne, Wewe kuena mufuba wa mu mifuba yanyi ne musunyi wa mu misunyi yanyi, anyi? Nzambi angenzele malu onso adiye musue, binahanga kukuhingishila kapitene ka masalayi mu muaba wa Yoaba.

¹⁴ Yeye wakalekesha mitshima ya Bena Yuda bonso, wakakasha mitshima yabo bu mutshima umue; nunku bakatumina mukelenge di ne, Hingana ne bantu bebe bonso.

¹⁵ Davidi wakalukila, wakafika ku Yadene. Bena Yuda bakaya ku Gilegala bua kusangakenabo ne mukelenge wabo, ne bua kusambula mukelenge Yadene.

¹⁶ Shimei, muana wa Gela, Muena Benyamina wa mu Bahulima, wakaya lubilu ne Bena Yuda bakuabo bua kusangakeneye ne mukelenge Davidi.

¹⁷ Bena Benyamina tshinunu bakadi nʼandi, ne Siba, muena mudimu wa Shaula, ne bana bandi balume dikumi ne batanu, ne bena mudimu bandi makumi abidi bakadi nʼandi; bakasabuka Yadene ku mesu kua mukelenge.

¹⁸ Bakatuma buatu bunene bua kusambula ba mu nsubu wa mukelenge, ne bua kuenza nʼabu bu muakasueye. Hakasabuka mukelenge Yadene, Shimei, muana wa Gela, wakamukukuila.

¹⁹ Yeye wakambila mukelenge ne, Mukelenge wanyi kanfunkununyi bua bubi buanyi, kavuluki bualu buhote buakakuenzela muntu webe dituku diakumuka mukelenge mu Yelushalema, mukelenge kateki bualu ebu mu mutshima wandi.

²⁰ Muntu webe udi mumanye ne, Nakuenza bibi; nunku, mena, nakadianjila ku mpala kua bantu bonso ba mu nsubu wa Yosefe lelu bua kusangakena ne mukelenge wanyi.

²¹ Kadi Abishai, muana wa Seluya, wakakonka ne, Kabena bashiha Shimei bualu bua yeye wakahenda muntu wakela Yehowa manyi ha mutu, anyi?

²² Davidi wakamba ne, Nuenu bana ba Seluya, nakanuenzela bualu kai bua nuenu nuikale bena lukuna kundi lelu? Nebashihe muntu mu Isalele lelu, anyi? Meme tshiena mumanye ne, Ndi mukelenge wa ku mutu kua Bena Isalele lelu, anyi?

²³ Mukelenge wakambila Shimei ne, Wewe kuena utua. Mukelenge wakaditshiha kudiye.

²⁴ Mefibosheta, muana wa Shaula, wakalua bua kusangakeneye ne mukelenge; yeye kakanza kulongolola makasa andi anyi kubeya muedi wandi anyi kuvuwa bilulu biandi ku dituku diakumuka mukelenge tô ne hakahinganeye talalâ.

²⁵ Hakafikeye ku Yelushalema bua kusangakeneye ne mukelenge, mukelenge wakamuebesha ne, Mefibosheta, kuakumuka nʼanyi bua tshinyi?

²⁶ Yeye wakamukudimuna ne, Mukelenge wanyi, muena mudimu wanyi wakundinga; bualu bua muntu webe wakamba ne, Nendielele tshiseba ha nyima ha nyama wa mpunda, bua meme mbande ha nyima handi, nye ne mukelenge; bualu bua muntu webe udi mulema.

²⁷ Ne yeye wakashiminyina muntu webe kudi mukelenge wanyi; kadi mukelenge wanyi udi bu muanjelo wa Nzambi, wenze malu adi mimpe ku mesu kuebe.

²⁸ Bualu bua bantu bonso ba mu nsubu wa tatu wanyi bakadi bu bantu bafue ku mesu kua mukelenge wanyi, kadi wewe wakashilaku muntu webe munkatshi mua bantu bakadi badia ku mesa ebe mene. Nunku ntshidi ne bua kudila kudi mukelenge kabidi bualu kai?

²⁹ Mukelenge wakamuambila ne, Utshidi ungambila bualu buebe bua tshinyi? Ndi ngamba ne, Wewe ne Siba nuabanyangane buloba.

³⁰ Mefibosheta wakambila mukelenge ne, Bimpe, yeye angate buloba buonso, bualu bua mukelenge wanyi wakahingana mu nsubu muandi talalâ.

³¹ Bâzilai, Muena Gilada, wakafuma ku Logelima, wakasabuka Yadene ne mukelenge, bua kumusambula Yadene.

³² Bâzilai wakadi muntu mununu, bidimu biandi biakadi makumi muanda mukulu; yeye wakadisha mukelenge hakadiye mushale ku Mahanayima, bualu bua yeye wakadi muntu mubanji be.

³³ Mukelenge wakambila Bâzilai ne, Lua, usabuka nʼanyi ne meme nenkudishe mu Yelushalema.

³⁴ Bâzilai wakebesha mukelenge ne, Matuku a muoyo wanyi adi bungi munyi bua meme kuya ne mukelenge ku Yelushalema?

³⁵ Lelu eu bidimu bianyi bidi makumi muanda mukulu; ndi mumanye mua kujingulula ne bidi bimpe ne bidi bibi, anyi? Muntu webe udi mumanye mua kulabula bintu bidiye udia ne bidiye unua, anyi? Ntshidi kabidi mua kunvua mei a balume anyi bakashi himbabo misambu, anyi? Muntu webe udi ne bua kuikala bujitu kudi mukelenge wandi bua tshinyi?

³⁶ Muntu webe udi musue anu bua kusabuka Yadene ne mukelenge; mukelenge udi ne bua kunfuta difutu bunene nunku bualu kai?

³⁷ Ndi nkusengelela ne, Witabushe bua muntu webe alukile, bua meme kufuila mu musoko wanyi, hehi ne lukita lua tatu wanyi ne mamu wanyi. Kadi tangila muntu webe Kimehama; aye biandi ne mukelenge wanyi, umuenzele budi buimpe kûdi.

³⁸ Mukelenge wakamba ne, Kimehama neaye nʼanyi, nemmuenzele budi buimpe kûdi; nenkuenzele tshionso tshiudi ungebesha.

³⁹ Bantu bonso bakasabuka Yadene, ne mukelenge wakasabuka; mukelenge wakatua ne Bâzilai mishiku, wakamuvudishila disanka; yeye wakahingana kuandi.

⁴⁰ Nunku mukelenge wakaya ku Gilegala, ne Kimehama wakaya nʼandi; Bena Yuda bonso ne tshituha tshia Bena Isalele kabidi bakalua ne mukelenge.

⁴¹ Monai, Bena Isalele bonso bakalua kudi mukelenge, bakamuebesha ne, Bualu kai bana betu, Bena Yuda, bakakeba, bakasambula mukelenge ne bonso ba mu nsubu wandi ne bantu bonso ba Davidi dia munemu dia Yadene?

⁴² Bena Yuda bonso bakakudimuna Bena Isalele dî ne, Bualu bua mukelenge udi muikulu wetu wa mu diku dietu; nudi nufuila tshiji bua bualu ebu tshinyi? Mukelenge wakatudisha tshianana, anyi? Yeye wakatuha bukenji, anyi?

⁴³ Bena Isalele bakakudimuna Bena Yuda dî ne, Tuetu tudi bituha dikumi bia mukelenge, nunku tudi tunuhita bungi bualu bua Davidi; nuakatulengulula bua tshinyi? Kanuakatukonka diambedi hanuakahingisha mukelenge wetu bualu kai? Kadi mei a Bena Yuda akatamba mei a Bena Isalele bukole.