2 Kulondolola 9 - Mukanda wa Nzambi Dihungila Dikulukulu ne Dihungila Dihia-dihia 2003

Mukelenge Mukashi wa mu Sheba Udi Ulua Kutangila Solomo

¹ Hakunvua mukelenge mukashi wa Sheba lumu lua Solomo, yeye wakalua ku Yelushalema ne tshisumbu tshia bantu tshinene bua kuteteye Solomo ne makonka makole; wakadi ne tumelo tua bungi tutuala bintu bia muhuya muimpe ne or ya bungi ne mabue a mushinga mukole. Hakafikeye kudi Solomo, yeye wakamuambila malu onso akadi mu mutshima wandi.

² Solomo wakitaba ku makonka andi onso; yeye kakamusokoka bualu bumue, wakamuambila malu onso.

³ Hakamona mukelenge mukashi wa Sheba lungenyi lua Solomo, ne nsubu wakaseye,

⁴ ne bintu bia kudia bia ku mesa andi, ne muakushikikeye bena mudimu bandi ne bakuatshishi bandi, ne bilulu biabo, ne batuadi ba makoho andi ne bilulu biabo, ne tshibandilu tshiakadiye ubandila ku nsubu wa Yehowa, yeye kakadi ne mutshima wa kumukudimuna di.

⁵ Yeye wakambila mukelenge ne, Lumu lunakunvua mu buloba buanyi lua bienzedi biebe ne lua lungenyi luebe luakadi lua bushuwa.

⁶ Kadi meme tshiakitabusha mei a bantu tô ne hanakulua nkayanyi ne hanakubimona ne mesu anyi; tangila, kabakungambila tshituha tshia bunene bua lungenyi luebe; wewe udi uhita lumu lunakunvua bunene.

⁷ Bantu aba ne bena mudimu bebe badi bimana ku mpala kuebe badi bunvua lungenyi luebe badi ne disanka dinene.

⁸ Yehowa Nzambi webe, wakasanka bualu buebe bua kukushikika ha nkuasa wandi wa butumbi bua wewe kuikala mukelenge ku mpala kua Yehowa Nzambi webe, avudishibue disanka! Bualu bua Nzambi webe wakananga Bena Isalele bua kubajadika tshiendelele, nunku yeye wakakuhingisha mukelenge ku mutu kuabo bua wewe kuenza malu mimpe ne makane.

⁹ Mukelenge mukashi wakamuha ntalanta ya or lukama ne makumi abidi, ne bintu bia muhuya muimpe bia bungi, ne mabue a mushinga mukole; kakuakadi bintu bia muhuya muimpe bikuabo bu biakaha mukelenge mukashi wa Sheba mukelenge Solomo.

¹⁰ Bantu ba Hulama ne bantu ba Solomo bakalua ne or wa ku Ofî, bakalua ne mitshi ya sandal ne mabue a mushinga mukole.

¹¹ Mukelenge wakenza bintu bilengele bia mu nsubu wa Yehowa ne bia mu nsubu wandi ne bisanji ne nzenze bia bimbi ba misambu ku mitshi ei ya sandal; kabakatangila bintu bu ebi diambedi mu buloba bua Yuda.

¹² Mukelenge Solomo wakaha mukelenge mukashi wa Sheba bintu bionso biakanangeye, tshionso tshiakalombeye ha mutu ha bintu biakalueye nʼabi kudi mukelenge. Nunku yeye ne bantu bandi bonso bakahingana ku buloba buandi.

Bubanji ne Lumu Lunene bia Solomo

¹³ Bujitu bua or buakasangisha Solomo mu tshidimu tshimue buakadi bua ntalanta ya or nkama isambombo ne makumi asambombo ne isambombo,

¹⁴ ha mutu ha or yakalua nʼai bendi ba mushinga; bakelenge bonso ba mu Alabâ ne ba-gouverneur ba mu nseke ai yonso bakalua ne or ne argent kudi Solomo.

¹⁵ Mukelenge Solomo wakatula ngabu ya or nkama ibidi; bakatula ngabu ne ngabu ku nshekele ya or nkama isambombo.

¹⁶ Wakatula ngabu ya or nkama isatu mikuabo; wakatula ngabu ne ngabu ku nshekele ya or nkama isatu; mukelenge wakayiteka mu nsubu wa ditu dia Lebanona.

¹⁷ Bualu bukuabo, mukelenge wakenza nkuasa wa bukelenge ne mibanga, wakateka or ku nseke yonso.

¹⁸ Nkuasa wa bukelenge wakadi ne tshibandilu tshia bidiatshilu bisambombo, ne tshitekelu tshia makasa tshia or tshitue ne nkuasa; bitekelu bibidi bia maboko biakadi ku luseke ne luseke lua nkuasa; tshifuanyikishi tshia nyama wa ntambue tshiakadi tshilamata ku tshitekelu ne tshitekelu tshia maboko.

¹⁹ Bifuanyikishi bia nyama ya ntambue dikumi ne bibidi biakadi biteka ku bidiatshilu bisambombo, bibidi ku tshidiatshilu ne tshidiatshilu, tshimue ku luseke, tshimue ku luseke. Kabakadi benza tshintu bu etshi mu bukelenge bukuabo to!

²⁰ Mpanza yonso ya kunuina mukelenge Solomo yakadi ya or, ne mpanza yonso ya mu nsubu wandi wa ditu dia Lebanona yakadi ya or kabidi; kabakabala argent bu tshintu tshia mushinga mukole mu matuku a Solomo.

²¹ Bualu bua mukelenge wakadi ne matu akaya ku Tâshishi ne bantu ba Hulama; matu au akafuma ku Tâshishi musangu umue mu bidimu bisatu ne or ne argent ne mibanga ne nkima ne nyunyu ya kayiba.

²² Nunku mukelenge Solomo wakatamba bakelenge bonso ba ha buloba bubanji ne mu meji.

²³ Bakelenge bonso ba ha buloba bakalua kudi Solomo bua kunvuabo meji akamuha Nzambi mu mutshima wandi.

²⁴ Bakalua muntu ne muntu ne mulambu wandi, mpanza ya or ne ya argent ne bilulu ne bintu bia nvita ne bintu bia muhuya muimpe ne tubalu ne nyama ya mpunda ku tshidimu ku tshidimu,

²⁵ Solomo wakadi ne nsubu ya tubalu ne ya makalu binunu binai, ne bantu bakadi benda ha nyima ha tubalu binunu dikumi ne bibidi bakatekeye mu misoko yakadi ne makalu andi ne mu Yelushalema muakadi mukelenge.

²⁶ Yeye wakakokesha bakelenge bonso ku musulu wa Pelata tô ne ku buloba bua Bena Peleshete ne ku mukalu wa buloba bua Ejipitu.

²⁷ Mukelenge wakakumbasha argent mu Yelushalema bu mabue; wakakumbasha mitshi ya cèdre bu bungi bua mitshi ya sycomore ya mu bibanda.

²⁸ Bakangatshila Solomo tubalu mu Ejipitu ne mu maloba onso.

Lufu lua Solomo

²⁹ Bienzedi bia Solomo bikuabo, bia kumudilu ne bia kunshikidilu, kabiena bifunda mu kulondolola kua Natana muprofete, ne kua Ahiya, Muena Shiloa, ne mu kulondolola kua bikena kumona bia Ido, mumonyi wa malu, biakamoneye bia Yalobama, muana wa Nebata, anyi?

³⁰ Solomo wakakokesha mu Yelushalema ku mutu kua Bena Isalele bidimu makumi anai.

³¹ Solomo wakalala tulu diatshimue ne bankambua bandi, bakamujika mu musoko wa Davidi, tatuʼandi. Lehabama, muanʼandi, wakakokesha mu muaba wandi.