2 Kulondolola 5 - Mukanda wa Nzambi Dihungila Dikulukulu ne Dihungila Dihia-dihia 2003

¹ Nunku mudimu wonso wakenza Solomo wa mu nsubu wa Yehowa wakashikishibua. Solomo wakalua ne bintu biakajidila Davidi tatu wandi ne argent ne or ne mpanza yonso, wakabiteka mu bibutshilu bia mu nsubu wa Nzambi.

Solomo Udi Ubuesha Mushete wa Tshihungidi mu Ntempelo

² Hashishe Solomo wakabikila bakulu bonso ba Bena Isalele, ne bonso bakadi ku mutu kua bisamba, ne bakadi ku mutu kua biota bia batatuʼabo ba mu Isalele ku Yelushalema, bua kuangatabo mushete wa tshihungidi tshia mei a Yehowa ku musoko wa Davidi, Siona mene.

³ Bantu bonso ba mu Isalele bakadisangisha kudi mukelenge ku dituku diakadiabo bidia bia disanka mu ngondo wa muanda mutekete.

⁴ Bakulu bonso ba Bena Isalele bakalua; Bena Lewi bakambula mushete wa Nzambi;

⁵ bakalua ne mushete wa Nzambi ne ntenta wa kusambakena ne bintu bionso bia tshijila biakadi mu nsubu wa ntenta; bakuidi Bena Lewi bakalua ne bintu ebi bionso.

⁶ Mukelenge Solomo ne Bena Isalele bonso bakadi badisangisha kudiye, bakaya ku mpala kua mushete wa Nzambi, bafile milambu ya mikoko ne ya ngombe idibo kabayi bamanye mua kubala bualu bua bungi buai.

⁷ Bakuidi bakalua ne mushete wa tshihungidi tshia mei a Nzambi mu muaba wau, mu muaba wa tshijila mene muinshi mua mahuahua a bakeluba.

⁸ Bualu bua bakeluba bakadi bolola mahuahua abo ha mutu ha muaba wa mushete; bakeluba bakabuikila mushete ne mitshi yau kabidi.

⁹ Mitshi ei yakatamba bule, bakamanya mua kumona nsongo yai mu muaba wa tshijila ku mpala kua mushete; kadi kabakamanya mua kuyitangila ha mbelu; udiku tô ne ku dituku edi.

¹⁰ Nansha tshintu tshikuabo tshiakadi munda mua mushete, anu mabue abidi akatekamu Mose ku Holeba kuakahunga Yehowa tshihungidi ne Bena Isalele, hakaluhukabo mu Ejipitu.

¹¹ Hashishe bakahatuka bakuidi ku muaba wa tshijila (bualu bua bakuidi bonso bakadiku bakadijidila, kabakenza mudimu wa mu milongo yabo tshikondo atshi;

¹² ne Bena Lewi kabidi bakadi bimbi ba misambu, buonso buabo mene, Asafa ne Hemana ne Yedutuna, ne bana babo balela ne bana babo balume baluate bilulu bia lin muimpe, bakadi ne biamu bia kukumakasha ne nzenze ne bisanji, bakimana ku luseke lua tshioshelu tshia ku esete, ne bakuidi lukama ne makumi abidi bakadi nʼabo bela mpungi);

¹³ hakelabo mpungi kudi bena mpungi ne bimbi ba misambu diatshimue bua kutumbishabo ne bua kusakidilabo Yehowa, ne hakimbabo ne mpungi ne biamu ne biombelu bia kutumbishabo nʼabi Yehowa, bamba ne Yeye udi muimpe, bualu bua luse luandi ludi lujalame tshiendelele, nsubu wakûla tente ne ditutu, nsubu wa Yehowa mene.

¹⁴ Nunku bakuidi kabakamanya mua kuimana bua kuenzabo mudimu wabo bualu bua ditutu; bualu bua butumbi bua Yehowa buakûsha nsubu wa Nzambi tente.