2 Kulondolola 4 - Mukanda wa Nzambi Dihungila Dikulukulu ne Dihungila Dihia-dihia 2003

Bintu bia mu Ntempelo

¹ Wakenza tshioshelu tshia tshiamu tshia mitaku, bunene buatshi buakadi coudées makumi abidi, ne butshiama buatshi buakadi coudées makumi abidi, ne bule buatshi buakadi coudées dikumi.

² Wakenza kabidi tshiowelu tshia tshiamu, bunene buatshi ku mubangu ne ku mubangu buakadi coudées dikumi; bule buatshi buakadi coudées itanu; bule bua dinyungulula diatshi buakadi coudées makumi asatu.

³ Muinshi muatshi muakadi bifuanyikishi bia ngombe yakanyunguluka ku nseke yonso, ku coudées dikumi ku nseke yonso ya tshiowelu. Ngombe yakadi mu milongo ibidi, yakatudibua diatshimue nʼatshi.

⁴ Tshiotshi tshiakimana ha nyima ha ngombe dikumi ne ibidi; isatu yakatangila ku nôde, isatu ku wesete, isatu ku sude ne isatu ku esete; tshiowelu tshiakadi ha nyima hai; mikila yai yakadi mituangane muinshi mua tshiowelu.

⁵ Muhimbu watshi wakadi bu ntanta wa tshianza; wakalengeshibua bu mubangu wa luhanza, bu tshifuanyikishi tshia tshilongo; tihiakûla tente ne bihiminu bia mai binunu bisatu.

⁶ Wakenza biowelu bikuabo dikumi, wakateka bitanu ku tshianza tshia halume ne bitanu ku tshianza tshia bakashi, bua kuoweshamu bintu biakafilabo bu milambu ya kuosha; kadi bakuidi bakowela mu tshiowelu tshinene.

⁷ Wakatula bitekelu bia minda bia or dikumi bu muakamba mukenji wakabiteka mu ntempelo, bitanu ku tshianza tshia balume ne bitanu ku tshianza tshia bakashi.

⁸ Wakenza mesa dikumi; wakâteka mu ntempelo, atanu ku tshianza tshia balume ne atanu ku tshianza tshia bakashi. Wakatula mpanza ya or lukama.

⁹ Bualu bukuabo kabidi, wakalongoluela bakuidi tshiendedi tshinene; wakenza bibi bia tshiendedi, wakalamika tshiamu tshia mitaku ha mutu hahi.

¹⁰ Wakajadika tshiowelu ku tshianza tshia balume tshia ntempelo ku luseke lua ku sude-esete.

¹¹ Hulama wakatula bivuadi ne nkasu ne mpanza. Nunku Hulama wakashikisha mudimu wakakuatshileye mukelenge Solomo mu nsubu wa Nzambi;

¹² makunshi au abidi ne mpanza ne bintu bilengele biakadi ku mutu kua makunshi, ne bintu bia kulengesha nʼabi mitu ya makunshi au,

¹³ ne bifuanyikishi bia mamuma a grenade nkama inai bia kulengesha nʼabi makunshi, milongo ibidi ya grenade ku dikunshi ku dikunshi bia kuteka ku bintu bilengele biakadi ku mutu kua makunshi.

¹⁴ Wakenza biowelu ne bitekelu biabi kabidi;

¹⁵ Wakenza tshiowelu tshinene ne ngombe dikumi ne ibidi yakadi muinshi muatshi kabidi.

¹⁶ Bivuadi ne nkasu ne bitubuidi bia munyinyi ne mpanza yonso, Hulama tatu wandi wakatudila Solomo bintu ebi bionso ne tshiamu tshia mitaku tshiakadi tshikenka bia kutekeye mu nsubu wa Yehowa.

¹⁷ Mukelenge wakabitula mu mpata wa Yadene, mu muaba muakadi dima, hankatshi ha Sukota ne Zeleda.

¹⁸ Nunku Solomo wakatula bintu ebi bia bungi bionso; kabakamanya mua kubala bujitu bua tshiamu tshia mitaku.

¹⁹ Solomo wakatula bintu bionso bia kuteka mu nsubu wa Nzambi, ne tshioshelu tshia or ne mesa a bidia bilesha;

²⁰ ne bitekelu bia minda bia or mimpe bia kutemenabi mu nsubu bu muakadi mukenji;

²¹ ne bilongo ne minda ne mpandu bia or mimpe;

²² ne bijimishi bia minda ne mpanza ne nkutu ne bivuadi bia kutekamu kahia, bia or mimpe; ne ku bibuelelu bia nsubu wakateka bibi bia ku muaba wa tshijila ne bibi biakadi munda mua nsubu, ntempelo mene, biakadi bia or.