2 Kulondolola 3 - Mukanda wa Nzambi Dihungila Dikulukulu ne Dihungila Dihia-dihia 2003

Solomo Udi Wibaka Nsubu wa Yehowa

¹ Hashishe Solomo wakabanga kuibaka ntempelo wa Yehowa mu Yelushalema ha mutu ha mukuna wa Moliya kuakamuenekela Yehowa kudi Davidi tatuʼandi ha muaba wakasungula Davidi ku tshihehuidi tshia Ônana, Muena Yebuse.

² Wakabanga mudimu mu dituku dibidi dia mu ngondo muibidi, mu tshidimu tshinai tshia bukelenge buandi.

³ Â mmalu akayishabo Solomo mua kuibakeye nsubu wa Yehowa. Bule buandi bua luidi lua kumudilu buakadi coudées makumi asambombo; butshiama buandi buakadi coudées makumi abidi.

⁴ Mbalanda wakadi ku mpala kua nsubu, bule buandi buakadi bu butshiama bua nsubu coudées makumi abidi; bule buandi bua mulu buakadi coudées lukama ne makumi abidi; wakalamika or mutambe buimpe munda muandi ku nseke yonso.

⁵ Wakateka mabaya a cyprès ku tshisasa tshia nsubu ne or muimpe ha mutu; wakadilengesha ne bifuanyikishi bia mabue a ngashi ne nkanu ya or.

⁶ Wakalengesha nsubu mujima ne mabue a mushinga mukole; or wakadi wa mu Pâwayima.

⁷ Wakalamika or ku nseke yonso ya munda mua nsubu, ku mabaya ne ku bilua bia bibi ne ku bimanu ne ku bibi kabidi; bakasonga bifuanyikishi bia bakeluba ku bimanu.

⁸ Wakalongolola muaba mutambe wa tshijila; bunene buandi buakadi bu butshiama bua nsubu coudées makumi abidi; ne butshiama buandi buakadi coudées makumi abidi; wakateka or ku nseke yonso; mushinga wandi wakadi bu ntalanta ya or nkama isambombo.

⁹ Bujitu bua misamadi buakadi bu nshekele ya or makumi atanu. Wakalamika or munda mua nsubu yonso yakadi ha mutu.

¹⁰ Wakatula bakeluba babidi bua kutekeye mu muaba mutambe wa tshijila; wakalamika or ku nseke yabo yonso.

¹¹ Bule bua mahuahua a bakeluba buakadi coudées makumi abidi; dihuahua dia mukeluba mukuabo diakadi bule bua coudées itanu; lusongo luadi luakafika tô ne ku tshimanu tshia nsubu; dihuahua dikuabo diakadi bule bua coudées itanu, diakafika tô ne ku dihuahua dia mukuabo.

¹² Dihuahua dia mukeluba mukuabo diakadi bule hua coudées itanu diakafika tô ne ku tshimanu tshia nsubu; dihuahua dikuabo diakadi bule bua coudées itanu diakatuangana ne dihuahua dia mukuabo.

¹³ Mahuahua a bakeluba akololodibua tô coudeês makumi abidi; bakeluba bakadi bimana ne makasa abo; mpala yabo yakatangilangana.

¹⁴ Wakakuma tshilulu tshikudika ne buanda bua bleu ne bukunzubile ne bukunzu-kunzû ne bua lin muimpe; bakenzamu bifuanyikishi bia bakeluba.

Makunshi Abidi

¹⁵ Wakajadika makunshi abidi ku mpala kua nsubu, bule buau buakadi coudées makumi asatu ne itanu; bunene bua mutu wa dikunshi ne dikunshi buakadi coudées itanu.

¹⁶ Wakatula nkanu mu muaba wa tshijila, wakayiteka ha mutu ha makunshi; wakatula bifuanyikishi bia mamuma a grenade lukama, wakabiteka ha nkanu.

¹⁷ Wakajadika makunshi ku mpala kua nsubu; dimue ku tshianza tshia balume, ne dikuabo ku tshianza tshia bakashi; wakidika dina dia ku tshianza tshia balume ne, Yakina, ne dina dia ku tshianza tshia bakashi ne, Boaza.