2 Kulondolola 2 - Mukanda wa Nzambi Dihungila Dikulukulu ne Dihungila Dihia-dihia 2003

Solomo Udi Uhunga Di ne Mukelenge Hulama

¹ Solomo wakasua kuibakila dina dia Yehowa nsubu ne bukelenge buandi nsubu.

² Solomo wakabala bantu binunu makumi muanda mutekete bua kutualabo majitu, ne binunu makumi muanda mukulu bua kutahabo mitshi ku mikuna, ne tuhita binunu bisatu ne nkama isambombo bua kuikalatu ku mutu kuabo.

³ Solomo wakatumina Hulama, mukelenge wa mu Tulo, dî ne, Bu muwakenzela Davidi tatuʼanyi, wakamutumina mitshi ya cèdre bua kuibakeye nsubu wandi, ungenzele meme nunku kabidi.

⁴ Tangila, meme ndi ngamba kuibakila dina dia Yehowa Nzambi wanyi nsubu wa kumujidila ne bua kuoshelamu musenga wa manananshi, ne bua kutekamu bidia bia kulesha, ne bua kuoshelamu milambu dinda ne dilolo ne ku dituku dia lumingu ne habala ngondo ne hadiabo bidia bia disanka ku mpala kua Yehowa Nzambi wetu. Eu udi mukenji mujalame wa Bena Isalele tshiendelele.

⁵ Nsubu undi ngibaka udi munene; bualu bua Nzambi wetu udi munene ku mutu kua nzambi yonso.

⁶ Kadi nganyi udi mua kumuibakila nsubu, bualu bua yeye udi uhita diulu ne diulu didi ku mutu kua diulu bunene? Meme nganyi bua kumuibakila nsubu, anu bua kuoshelamu musenga wa manananshi ku mpala kuandi?

⁷ Nunku untumine bantu badi ne lungenyi bua kuenza mudimu mu or ne mu argent ne mu tshiamu tshia mitaku ne mu tshiamu tshifike ne mu bilulu bikunzubile ne bikunzu-kunzû ne bia bleu; ne badi bamanye mua kusonga bintu bionso, bua kuikalabo ne bena lungenyi banyi badi nʼanyi mu Yuda ne Yelushalema bakasungulabo kudi Davidi tatu wanyi.

⁸ Untumine mitshi ya cèdre ne ya cyprès ne ya sandal ku Lebanona; bualu bua ndi mumanye ne bantu bebe badi bamanye mua kutaha mitshi mu Lebanona; ne mona, bantu banyi nebakuatshilangane ne bantu bebe,

⁹ bua kutahabo mitshi ya bungi; bualu bua nsubu undi ngibaka newikale munene ne wa butumbi.

¹⁰ Nempe bantu bebe badi bataha mitshi bihiminu bia bukula binunu makumi abidi ne bia orge binunu makumi abidi; ne bihiminu bia nvinyo binunu makumi abidi ne bia manyi binunu makumi abidi.

¹¹ Hashishe Hulama, mukelenge wa Tulo, wakafundila Solomo mukanda ne, Bualu bua Yehowa udi unanga bantu bandi, yeye wakakuhingisha mu bukelenge.

¹² Hulama wakamba kabidi ne, Yehowa, Nzambi wa Isalele, ikale ne disanka; yeye nguakafuka diulu ne buloba, wakaha Davidi muana wa lungenyi udi ne meji makane ne mutshima muimpe bua kuibakileye dina dia Yehowa nsubu ne bukelenge buandi nsubu.

¹³ Nakamana kukutumina muntu wa meji udi ne lungenyi lule, muana wa Hulama, tatu wanyi mene,

¹⁴ udi muana wa mukashi wa Bena Dana; tatu wandi wakadi Muena Tulo, wakadi ne lungenyi lua kuenza mudimu mu or ne mu argent ne mu tshiamu tshia mitaku ne mu tshiamu tshifike ne mu mabue ne mu mabaya ne mu bilulu bikunzubile ne bia bleu ne mu lin muimpe ne bilulu bikunzu-kunzû; wakamanya mua kusonga bintu bionso ne bua kuenzeye bintu bionso; bua wewe kumuha muaba munkatshi mua bantu bebe ba lungenyi bakasungula mukelenge wanyi Davidi, tatu webe.

¹⁵ Blé ne orge ne manyi ne nvinyo biakuambila mukelenge wanyi, anji kutuminabi bantu bandi;

¹⁶ tuetu nenutahe mitshi ya mu Lebanona bungi bûdi musue; netulue nʼai mu matu ha mutu ha mai manene tô ne ku Yopa; wewe neuye nʼai ku Yelushalema.

¹⁷ Solomo wakabala benyi bonso bakadi mu buloba bua Isalele, bu muakababala Davidi, tatu wandi; bakabala bantu nunku binunu lukama ne makumi atanu ne bisatu ne nkama isambombo.

¹⁸ Yeye wakasungula binunu makumi muanda mutekete bua kutualabo majitu, ne binunu makumi muanda mukulu bua kutahabo mitshi mu mikuna ne tuhita binunu bisatu ne nkama isambombo bua kuenzeshatu bantu mudimu.