2 Kulondolola 11 - Mukanda wa Nzambi Dihungila Dikulukulu ne Dihungila Dihia-dihia 2003

¹ Hakahingana Lehabama ku Yelushalema, yeye wakasangisha Bena Yuda ne Bena Benyamina, bena nvita binunu lukama ne makumi muanda mukulu, bua kuluanganabo ne Bena Isalele ne bua kuhingisha bukelenge kudi Lehabama kabidi.

² Kadi dî dia Yehowa diakalua kudi Shemaya, muntu wa Nzambi, ne,

³ Wambile Lehabama, muana wa Solomo, mukelenge wa Yuda, ne Bena Isalele bonso ba mu Yuda ne Benyamina ne,

⁴ Yehowa udi wamba ne, Kanuyi, kanuluanganyi ne bana benu; nuhingane muntu ne muntu ku nsubu wandi bua bualu ebu budi bufuma kundi. Nunku bakitabusha dî dia Yehowa, bakalukila, kabakaya kuluangana ne Yalobama.

Bukokeshi bua Lehabama

⁵ Lehabama wakashikama mu Yelushalema, wakibaka misoko ya mabue mu Yuda.

⁶ Yeye wakasa Beteleheme ne Etama ne Tekoa

⁷ ne Betesû ne Soko ne Adulama

⁸ ne Gata ne Malesha ne Zifa

⁹ ne Adolayima ne Lakisha ne Azeka

¹⁰ ne Solea ne Ayalona ne Hebelone, idi mu Yuda ne Benyamina, misoko yakadi ne ngumbu.

¹¹ Yeye wakajadika misoko ya ngumbu bikole, wakatekamu tupitene tua masalayi ne bintu bia kudia ne manyi ne nvinyo.

¹² Yeye wakateka ngabu ne mafuma mu misoko yonso, wakayidika bikole. Bena Yuda ne Bena Benyamina bakadi ku luseke luandi.

¹³ Bakuidi ne Bena Lewi bakadi mu nseke yonso ya Isalele bakalamata kudiye.

¹⁴ Bualu bua Bena Lewi bakashiya misoko yabo ne mahianyi abo, bakalua ku Yuda ne Yelushalema; bualu bua Yalobama ne bana bandi balume bakabihata, bua bobo kabenzedi Yehowa mudimu wandi wa buakuidi;

¹⁵ yeye wakadisunguila bakuidi bua kufilabo milambu ha mutu ha mikuna ne milambu ya mpumbu ya mbushi ne ya bana ba ngombe yakeleye.

¹⁶ Bantu bonso ba mu Isalele bakadi bakeba Yehowa Nzambi wa Isalele ne mitshima yabo yonso bakalonda ku nyima kuabo ku Yelushalema bua kufilabo milambu kudi Yehowa, Nzambi wa bankambua babo.

¹⁷ Nunku bakajadika bukelenge bua Yuda, baka-vuisha Lehabama, muana wa Solomo, bukole bidimu bisatu; bualu bua bakenda mu nshila wa Davidi ne wa Solomo bidimu ebi bisatu.

¹⁸ Lehabama wakabaka mukashi, dina diandi Mahalata, muana mukashi wa Yelimota, muana wa Davidi ne wa Abihayila, muana mukashi wa Eliaba, muana wa Yishai;

¹⁹ yeye wakamulelela bana ba balume, Yeusha ne Shemaliya ne Zahama.

²⁰ Ku nyima kuandi yeye wakabaka Mâka, muana mukashi wa Abashaloma: yeye wakamulelela Abiya ne Atai ne ne Shelomita.

²¹ Lehabama wakananga Mâka, muana wa Abashaloma, ha mutu ha bakashi bandi bonso ne bakashi bahika bakadiye mubake (bualu bua yeye wakabaka bakashi dikumi ne muanda mukulu ne bakashi bahika makumi asambombo; wakalela nʼabo bana ba balume makumi abidi ne muanda mukulu ne ba bakashi makumi asambombo).

²² Lehabama wakasungula Abiya, muana wa Mâka muenyampala ku mutu kua bana babo balume; bualu bua yeye wakasua kumuhingisha mu bukelenge.

²³ Yeye wakadi ne budimu, wakamuangalasha bana bandi balume bonso mu misoko ya Yuda ne Benyamina, mu misoko yakadi ne ngumbu; yeye wakabaha bintu bia kudia bia bungi. Yeye wakabakebela bakashi ba bungi.