2 Korente 2 - Mukanda wa Nzambi Dihungila Dikulukulu ne Dihungila Dihia-dihia 2003

¹ Kadi nakadisunguila bualu ebu munda muanyi bua meme tshilu kunudi kabidi ne kanyinganyinga.

² Bua binanyingalasha mitshima yenu, muntu kai udi unsankisha, anu muntu udi ne mutshima wandi munyingalashibue kundi?

³ Nakanufundila bualu ebu mene bua meme, hanalua, tshikadi ne kanyinganyinga kudi bantu bandi ne bua kuikala ne disanka kudibo; ndi ne ditekemena kunudi bonso ne, Disanka dianyi didi dia buonso buenu.

⁴ Nakanufundila ne kanyinganyinga ka bungi ne mutshima munemu bujitu bua bungi ne binsonshi bia bungi ku mesu; kembua mitshima yenu inyingalashibue, kadi bua nuenu mimanye dinanga dindi ntamba kukumbasha kunudi.

Paulo udi musue Bena Kolinto balekelele muntu mubi wa munkatshi muabo bualu bubi buandi

⁵ Kadi bikala muntu mumane kunyingalasha mitshima, yeye kakanyingalasha mutshima wanyi (tshiena musue kutamba kukolesha bualu), kadi wakanyingalasha mitshima ya buonso buenu tshituha.

⁶ Dikenga diakangateye kudi bungi buenu didi dikumbana kudi muntu wa nunku;

⁷ kadi nudi ne bualu bua kumulekelela bubi buandi ne kumusamba, bua bumue muntu wa nunku katambi bu ku kanyinganyinga kakole.

⁸ Nunku ndi nusengelela bua nuenu nûjadike luse luenu kudiye.

⁹ Bua bualu ebu kabidi nakunufundila bua meme kumanya bu mudi dijadikibua dienu, ne nudi ne ditumikila mu malu onso, anyi?

¹⁰ Kadi kudi muntu unudi nulekelela bualu buonso, meme nemulekelelebu kabidi; bua bualu bunakunulekelela kabidi, bingikala munulekelele bualu buonso, nakunulekelelabu bua bualu buenu ku mesu kua Kilisto;

¹¹ bua Satana kikadi ne muaba wa kutuhitshila budimu; bualu bua tuetu katuena tuhanga kumanya madimu andi.

Paulo udi ne ntatu mu mudimu wandi; udi ne masanka andi kabidi

¹² Hanakalua ku Toa bualu bua lumu luimpe lua Kilisto ne hakadi tshibi tshinene tshingunzuluila mu Mukelenge;

¹³ tshiakadi ne dikisha mu mutshima wanyi, bualu bua tshiakasangana Tito, muanʼetu wa ma Kilisto; kadi nakalayangana nʼabo, nakaya ku Makedonia.

¹⁴ Kadi tuasakidila kudi Nzambi udi utulombola misangu yonso bu bantu batambibue mu Kilisto, udi ununkishila dihembu dia lungenyi luandi mu bianza bietu ku miaba yonso.

¹⁵ Bualu bua tudi bu dihembu dimpe dia Kilisto mu Nzambi kudi bantu badi basungidibua ne kudi bantu badi bajimishibua;

¹⁶ kudi bakuabo tudi bu dihembu dia lufu ku lufu, ne kudi bakuabo tudi bu dihembu dia muoyo ku muoyo. Muntu kai udi ukumbana malu â?

¹⁷ Bualu bua tuetu katuena bu ba bungi badi banyanga dî dia Nzambi! kadi mu Kilisto tudi tuamba dî ne mitshima mitoke bu mutudi ba kudi Nzambi ne ku mesu kua Nzambi.