2 Bakalenga 14 - Mukanda wa Nzambi Dihungila Dikulukulu ne Dihungila Dihia-dihia 2003

Bukokeshi bua Amasaya

¹ Mu tshidimu tshibidi tshia bukelenge bua Yoasha, muana wa Yehoaza, mukelenge wa Isalele, Amasaya, muana wa Yoasha, mukelenge wa Yuda, wakabanga kukokesha.

² Wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu makumi abidi ne tshitema; dina dia mamu wandi dia kadi Yehoadina wa mu Yelushalema.

³ Wakenza malu mimpe ku mesu kua Yehowa; kadi kakenza malu onso bu muakenza Davidi, kaku wandi; Wakenza malu onso bu muakenza Yoasha, tatu wandi.

⁴ Kadi kakumusha bitendelelu bia ku mikuna; bantu batshivua bafila milambu ya kuosha ha kahia ne musenga wa manananshi ha mutu ha mikuna

⁵ Hakajadikabo bukelenge mu bianza biandi, yeye wakashiha bena mudimu, bashihi ba tatu wandi, mukelenge.

⁶ Kadi yeye kakashiha bana ba bashihi aba, bu muakamba Yehowa mu mukanda wa mikenji ya Mose ne, Kabashihi batatu bualu bua malu a bana bakalelabo; kabashihi bana bua malu a batatuʼabo, kadi muntu yonso neafue anu bua bubi buandi.

⁷ Wakashiha binunu dikumi bia Bena Edome mu Tshibanda tshia Luehu; wakanyenga musoko wa Sela mu nvita, wakawidika ne, Yoketele tô ne ku difuku edi.

⁸ Hashishe Amasaya wakatumina Yehoasha, muana wa Yehoaza, muana wa Yehu, mukelenge wa Isalele, ba-messager bamba ne, Lua biebe, tutangilangane mpala ha mpala

⁹ Yehoasha, mukelenge wa Isalele, wakatumina Amasaya, mukelenge wa Yuda, dî ne, Dieba diakadi mu Lebanona diakatumina mutshi wa cèdre wa mu Lebanona dî ne, Umpe muanʼebe wa bakashi bu mukashi wa muanʼanyi wa balume. Kadi nyama wa mu Lebanona wakahitaku, wakadiata dieba munda mua dikama.

¹⁰ Bulelela, wewe wakuhita Bena Edome bukole, wakadibandisha mu mutshima webe, wakadisua; Shala biebe kuebe, uditumbishe nkayebe. Udi musue kudibuesha mu malu bua kudikengesha ne bua kuhona, wewe ne Bena Yuda hebe, bua tshinyi?

¹¹ Kadi Amasaya kakitabusha. Nunku Yehoasha, mukelenge wa Isalele, wakaya, wakamonangana ne Amasaya, mukelenge wa Yuda, ku mesu mu Bete-shemeshe wa ku luseke lua Yuda.

¹² Bena Yuda bakahitshibua bukole kudi Bena Isalele, bakanyemena ku ntenta yabo.

¹³ Yehoasha, mukelenge wa Isalele, wakakuata Amasaya, mukelenge wa Yuda, muana wa Yehoasha, muana wa Ahazaya, ku Bete-shemeshe; wakaya ku Yelushalema, wakashimbula lumbu lua Yelushalema ku tshibi tshia Efelayima tô ne ku tshibi tshikuabo tshia ku ditumba ntanta wa coudées nkama mai.

¹⁴ Wakahaula biamu bionso bia or ne bia argent ne malonga onso akadi mu nsubu wa Yehowa, ne bintu bimpe bionso bia mu nsubu wa mukelenge; wakakuata bantu lukola, wakahingana ku Samalea.

¹⁵ Bienzedi bia Yehoasha bikuabo biakenzeye ne bukole buandi ne muakaluanganeye ne Amasaya, mukelenge wa Yuda, kabiena bifunda mu mukanda wa kulondolola kua malu a bakelenge ba Isalele, anyi?

¹⁶ Yehoasha wakalala tulu ne bankambua bandi, bakamujika mu Samalea diatshimue ne bakelenge ba Isalele; Yalobama, muanʼandi, wakakokesha mu muaba wandi.

¹⁷ Amasaya, muana wa Yoasha, mukelenge wa Yuda, wakikala ne muoyo bidimu dikumi ne bitanu ku nyima kua lufu lua Yehoasha, muana wa Yehoaza, mukelenge wa Isalele.

¹⁸ Bienzedi bikuabo bia Amasaya kabiena bifunda mu mukanda wa kulondolola kua malu a bakelenge ba Yuda, anyi?

¹⁹ Bakamuelela tshifufu mu Yelushalema, kadi yeye wakanyemena ku Lakisha, bakamuihata ku Lakisha, bakamushihelaku.

²⁰ Bakalua nʼandi ha nyima ha tubalu, bakamujika ne bankambua bandi mu Yelushalema, musoko wa Davidi.

²¹ Bena Yuda bonso bakangata Uziya, wakadi ne bidimu dikumi ne bisambombo, bakamujadika mukelenge mu muaba wa Amasaya, tatu wandi.

²² Yeye wakasa musoko wa Elata, wakauhingisha kudi Bena Yuda; ku nyima kua bualu ebu yeye wakalala tulu ne bankambua bandi.

Bukokeshi hua Yalohama

²³ Mu tshidimu tshia dikumi ne bitanu tshia bukelenge bua Amasaya, muana wa Yoasha, mukelenge wa Yuda, Yalobama, muana wa Yoasha, mukelenge wa Isalele, wakabanga kukokesha mu Samalea, wakabakokesha tô bidimu makumi anai ne tshimue.

²⁴ Wakenza malu mabi ku mesu kua Yehowa; kakasesuka ku malu mabi onso a Yalobama, muana wa Nebata, akenzesheye Bena Isalele.

²⁵ Wakahingisha mukalu wa Isalele ku tshibi tshia ku Hamata tô ne ku dishiha dia mu Alabâ, bu mu dî dia Yehowa, Nzambi wa Isalele, diakambeye mukana mua muntu wandi Yona muprofete, muana wa Ambai wa mu Gata-hefê.

²⁶ Bualu bua Yehowa wakamona dikenga dia Bena Isalele ne diakadi dikole; kabakashala ne bantu mu nsubu anyi ku mbelu, kabakashila Bena Isalele mukuatshishi nansha.

²⁷ Yehowa kakanza kuamba ne, Nenjimishe dina dia Isalele muinshi mua diulu, kadi yeye wakatuma Yalobama, muana wa Yoasha, bua kubasungileye.

²⁸ Bienzedi bia Yalobama bikuabo biakenzeye ne bukole buandi ne nvita yandi, ne muakanyengeye Damaseke ne Hamata, misoko ya Yuda, wakayihingisha mu bianza bia Bena Isalele, kabiena bifunda mu mukanda wa kulondolola kua malu a bakelenge ba Isalele, anyi?

²⁹ Yalobama wakalala tulu ne bankambua bandi, bakelenge ba Isalele; Zekâya, muanʼandi, wakakokesha mu muaba wandi.