1 Yone 5 - Mukanda wa Nzambi Dihungila Dikulukulu ne Dihungila Dihia-dihia 2003

Kuitabusha Muana wa Nzambi kudi kuhita malu onso bunene

¹ Muntu yonso udi witabusha ne, Yesu udi Kilisto udi muledibue kudi Nzambi; ne muntu yonso udi unanga wakamulela udi unanga kabidi wakuledibua kudiye.

² Mu muanda eu tudi bamanye ne tudi tunanga bana ba Nzambi hatuananga Nzambi ne hatuenza mikenshi yandi.

³ Bua edi ndinanga dia Nzambi, bua tuetu tutumikile mikenshi yandi; ne mikenshi yandi kayena itunemena bujitu.

⁴ Bualu bua muanda wonso udi muledibue kudi Nzambi udi uhita malu a ha buloba bukole; ne edi ndihita diakuhita malu a ha buloba bukole, nditabusha dietu.

⁵ Nganyi muntu udi uhita malu a ha buloba bukole? Anu yeye udi witabusha ne, Yesu udi Muana wa Nzambi.

⁶ Nyeyʼeu wakalua ne mai ne mashi, Yesu Kilisto mene; kene mai nkayau, kadi ne mai ne mashi.

⁷ Nyuma Muimpe ngudi umanyisha, bualu bua Nyuma udi bulelela.

⁸ Basatu badiku badi bamanyisha, Nyuma ne mai ne mashi: basatu aba badi bamanyisha bualu bumue.

⁹ Bituitabusha bumanyishi bua bantu, bumanyishi bua Nzambi budi butambe bunene, bualu bua ebu mbumanyishi bua Nzambi ne, Wakutumanyisha bualu bua Muana wandi.

¹⁰ Muntu udi witabusha Muana wa Nzambi, udi ne bumanyishi munda muandi; muntu udi kai witabusha Nzambi wakamuvuisha muenu mashimi, bualu bua kakuitabusha bumanyishi budi Nzambi umanyisha bualu bua Muana wandi.

¹¹ Ne ebu mbumanyishi ne, Nzambi wakatuha muoyo wa tshiendelele, ne muoyo eu udi munda mua Muana wandi.

¹² Udi ne Muana udi ne muoyo; udi kai ne Muana wa Nzambi kena ne muoyo.

Bama bakuitabusha Yesu Kilisto badi ne muoyo wa tshiendelele

¹³ Nakufunda malu â kunudi, bua nuenu mimanye ne, Tudi ne muoyo wa tshiendelele, kunudi nuenu badi bitabusha dina dia Muana wa Nzambi.

¹⁴ Edi ndikima ditudi nʼadi kudiye ne, Bituamulomba tshintu tshionso bu mu disua diandi, yeye udi utunvuila.

¹⁵ Biwamanya ne, Yeye udi utungila bituamulomba tshintu tshionso, nunku tudi bamanye ne, Tudi ne milombu ituakamulomba.

¹⁶ Biamona muntu muanʼabo wenza bualu bubi budi kabui bua lufu, nealombe Nzambi, yeye neamuhe mioyo ya badi benza bualu bubi budi kabui bua lufu. Bualu bubi budiku budi bua lufu; tshiena ngamba ne, Yeye amulombele Nzambi bua bualu abu.

¹⁷ Bualu buonso budi kabui buakane budi bualu bubi; ne bualu bubi budiku budi kabui bua lufu.

¹⁸ Tudi bamanye ne, Muntu yonso udi muledibue kudi Nzambi katu wenza malu mabi; kadi yeye udi muledibue kudi Nzambi udi udilama, ne mubi kena umulenga.

¹⁹ Tudi bamanye ne, Tuetu tudi ba Nzambi, ne ba ha buloba bonso badi balala mu bubi.

²⁰ Tudi bamanye ne, Muana wa Nzambi wakumana kulua wakutuha meshi bua tuetu tumumanye yeye udi wa bushua; ne tuetu tudi munda mua udi wa bushua, munda mua Muana wandi Yesu Kilisto mene. Eu udi Nzambi wa bushua, ne udi muoyo wa tshiendelele.

²¹ Bana bakese, nudilame kudi mpingu.