1 Timote 4 - Mukanda wa Nzambi Dihungila Dikulukulu ne Dihungila Dihia-dihia 2003

Bena Kilisto bakuabo nebatombokele Nzambi

¹ Kadi Nyuma udi wamba batoke ne, Halua bikondo bia kunshikidilu ha buihi, bantu bakuabo nebalekele ditabusha diabo, balamata ku nyuma idi ihambuisha ne ku mayisha a bademon;

² bualu bua lubombo lua bantu badi bamba mei a mashimi, badi boshibua mu muoyo-mukese wabo ne tshiamu tshibia ne kadilu.

³ Bobo badi bakanda bantu dibaka, badi babelela mukenshi ne, Jilai bia kudia bikuabo, biakafuka Nzambi bua bantu badi ne ditabusha ne badi bamanye bualu bulelela badie ne kusakidila.

⁴ Bifukibua bionso bia Nzambi bidi bimpe, ne bantu kabena ne bua kubimasha bikalabo babitabusha ne kusakidila;

⁵ bualu bua biobi bidi bijidibua ne dî dia Nzambi ne kutendelela.

Timote ende biandi mudimuke

⁶ Biwavuluisha bana benu ba mu Kilisto malu â, wewe newikale muena mudimu muimpe wa Kilisto Yesu, mudiundisha mu mei a ditabusha ne mu diyisha dimpe diwakulonda tô ne katataka.

⁷ Kadi uhidie nsumuinu ya malu a hatuhu a bakashi bakulukashi. Udienzeshe bua kuheta malu a buimpe bua Nzambi.

⁸ Bualu bua dikolesha dia mubidi didi ne mushinga muimpe kakese; kadi buimpe bua Nzambi budi ne mushinga muimpe mu malu onso, budi ne mulayi wa muoyo wa mpindiu ne wa muoyo ukadi ha kulua.

⁹ Di edi didi mua kueyemenyibua ndidi bonso bamanye mua kuitabusha.

¹⁰ Bua bualu ebu tudi tuenza mudimu mukole ne tudi tutshinta, bua tuakutekemena Nzambi udi ne muoyo, udi Musungidi wa bantu bonso, kadi mutambe kuikala Musungidi wa badi bamuitabusha.

¹¹ Elela bantu mukenshi bua malu â, ubayisheu.

¹² Muntu kakulenguludi bua bunsongalume buebe; kadi wikale tshileshilu kudi bena ditabusha mu mei ne mu tshikadilu tshiebe ne mu dinanga ne mu ditabusha ne mu butoke bua mutshima.

¹³ Tô ne hanalua, ulamate ku dibala dia Mukanda wa Nzambi, ku disengelela, ne ku diyisha.

¹⁴ Kulekedi kulama tshihedi tshidi munda muebe, tshiakakuhebua ku mei a baprofete ne hakatentekesha bakulu bianza ha mutu hebe.

¹⁵ Unanukile kuikala mu malu â, udiele ne mutshima webe wonso kudiu, bua kudiunda kuebe kumueneke kudi bonso.

¹⁶ Wikale mudimuke ku malu ebe ne ku diyisha diebe. Unanukile kushala mu malu â; bua bawenza nunku, neudisungile wewe ne bobo kabidi badi bunvue mei ebe.