1 Timote 2 - Mukanda wa Nzambi Dihungila Dikulukulu ne Dihungila Dihia-dihia 2003

Bena Kilisto balombele bantu bonso Nzambi

¹ Nunku ku mpala kua malu onso, ndi nkusengelela bua milombu ne mitendelelu ne mitendekenu ne masakidila bikale bienzele bantu bonso.

² Ulombele banfumu bonso ne badi ne bukokeshi, bua tuetu tuikale ne muoyo muhola holâ ne mutalala talalâ mu buimpe buonso ne mu buneme buonso.

³ Bualu ebu budi buimpe ne mbudi Nzambi Musungidi wetu witabusha,

⁴ udi musue bantu bonso basungidibue, bafike ku dimanya dia malu malelela.

⁵ Bualu bua Nzambi udi umue, ne mutuanganyi umue udiku hankatshi ha Nzambi ne bantu, nyeye muntu mene, Kilisto Yesu;

⁶ wakadifila bu tshintu tshia kuhikula nʼatshi bantu bonso; bumanyishi bua muanda eu budi ne bua kumanyishibua mu bikondo biabu mene.

⁷ Bua bualu ebu nakatekibua muambi ne mupostolo (ndi ngamba dî dilelela, tshiena nshima nasha) muyishi wa ba bisamba bia bende mu ditabusha ne mu malu malelela.

Bakashi bikale ne kanemu mu nsubu wa Nzambi

⁸ Nunku ndi musue balume batendelele Nzambi mu miaba yonso, babishe bianza bia tshijila, kabai ne tshishi ne dielangana dia mpata.

⁹ Muomumue bakashi kabidi badilengeshe ne bilulu bidi bibakanyina; bikale ne kalolo ne buhuekele; kabaluki nsuki yabo bihia; kabaluatshi ngolo ne mabue ne bilulu bia mushinga muhite bungi;

¹⁰ kadi badilengeshe ne bienzedi bimpe, bu mudi buakane bua bakashi badi bamba ne, Tudi tutshina Nzambi.

¹¹ Mukashi ayile ne ditalala ne dikokela dionso.

¹² Kadi tshiena ngitabusha mukashi ayishe, anyi ikale ne bukokeshi ku mutu kua muteme; kadi ikale biandi talala.

¹³ Bualu bua Adama wakafukibua diambedi, ne hashishe Eva;

¹⁴ ne Adama kakateyibua, kadi mukashi hakamaneye kuteyibua, wakahona mu bubi.

¹⁵ Kadi yeye neasungidibue mu kulela kuandi kua bana, bikala bakashi bananukila mu ditabusha ne mu dinanga ne mu malu a tshijila adi ne buhuekele.