1 Tesalonike 5 - Mukanda wa Nzambi Dihungila Dikulukulu ne Dihungila Dihia-dihia 2003

Bantu kabena bamanye ditahi dialua Mukelenge; bamutekemene ku dituku ku dituku

¹ Kadi bana betu, bua bikondo ne bidimu kanuena ne bualu bua muanda wabi ufundibue kunudi.

² Bualu bua nuenu nkayenu nudi bamanye bimpe ne, Dituku dia Mukelenge dilualua bu mudi muibi ulua butuku.

³ Hatshidibo bamba ne, Tudi ne ditalala, katui ne bualu; ahu dibutuka dia tshintuluntulu dilualua kudibo, bu mudi kanyinganyinga kalua kudi mukashi udi ne difu; ne bobo kabena bahanduka nasha kakese.

⁴ Kadi nuenu bana betu, kanuena mu midima bua dituku adi dinukuate bu muibi;

⁵ bua buonso buenu nudi bana ba munya ne bana ba dituku, katuena ba butuku anyi ba midima.

⁶ Nunku katuladi tulu bu mudi bakuabo benza; kadi tutabale, tuikale ne meshi mahole.

⁷ Bua badi balala tulu badi balala tulu butuku; ne badi bakuatshika maluvu badi bakuatshika butuku.

⁸ Kadi tuetu, bualu bua tudi ba dituku, tuikale ne meshi mahole; tuluate tshibuikilu tshia ha tshiadi tshia ditabusha ne tshia dinanga, tuluate ditekemena dia luhandu bu tshifulu ku mutu.

⁹ Bualu bua Nzambi kakatusungula bua kutulekela tshishi, kadi bua tuetu kuheta luhandu bualu bua Mukelenge wetu Yesu Kilisto,

¹⁰ wakatufuka, bua tuetu, nasha batabale nasha balale tulu, tuikale ne muoyo hohamue nʼandi.

¹¹ Nunku nusambangane, nudiundishangane muntu ne muntu, bu munudi nuenza kabidi.

Paulo udi ubadimusha

¹² Kadi tudi tunulomba, bana betu, bua nuenu mimanye badi benza mudimu munkatshi muenu ne badi ku mutu kuenu mu Mukelenge ne badi banudimusha;

¹³ bua nuenu nubabale bu banudi nutamba kutumbisha mu dinanga bua mudimu wabo. Nuikalangane ne ditalala munkatshi muenu.

¹⁴ Bana betu, tudi tunusengelela ne, Nudimushe batshimbakanyi, nukoleshe badi ne mitshima yamba kuhanga, nukuatshishe badi batekete, nuikale ne lutulu kudi bantu bonso.

¹⁵ Numone ne muntu kahingishidi mukuabo bubi ku bubi buandi; kadi misangu yonso nulondelangane malu adi mimpe muntu ne muntu, ne kudi bonso.

¹⁶ Nusanke misangu yonso;

¹⁷ nuikale nutendelelatendelele;

¹⁸ mu malu onso nusakidile Nzambi, bua edi ndisua dia Nzambi mu Kilisto Yesu bua bualu buenu.

¹⁹ Kanujimi Nyuma Muimpe.

²⁰ Kanuhetudi mayisha a baprofete.

²¹ Nujingulule malu onso; nulamate malu adi mimpe;

²² nuehuke ku malu mabi a mushindu wonso.

²³ Nzambi wa ditalala nkayandi anujidile tshishiki; ne nyuma yenu ne misûke yenu ne mibidi yenu ilamibue mu buakane buonso, kanui ne kudiu, mu dilu? dia Mukelenge wetu Yesu Kilisto.

²⁴ Yeye udi unubikila udi mua kueyemenyibua, yeye kabidi nênze buala budiye munubikidile.

²⁵ Bana betu, nundombele Nzambi.

²⁶ Nuele bana betu bonso ba mu Kilisto muoyo ne kutuangana kua mishiku kua tshijila.

²⁷ Ndi nutshihisha mu Mukelenge bua babadile bana betu bonso ba mu Kilisto mutanda eu.

²⁸ Ngasa wa Mukelenge wetu Yesu Kilisto ikale nʼenu.