1 Petro 4 - Mukanda wa Nzambi Dihungila Dikulukulu ne Dihungila Dihia-dihia 2003

Buala bua Kilisto wakatukengela, tuikale ne mitshima mimpe

¹ Nunku, bualu bua Kilisto wakakenga mu mubidi, nuenu nudiluatshishe ne meshi momumue; bua wakakenga mu mubidi wakumana kulekela malu mabi,

² bua nuenu kanuikadi ne muoyo kabidi mu nkuka ya bantu matuku enu atshidi mashale mu mubidi, kadi nuikale ne muoyo bu mudi disua dia Nzambi.

³ Bualu bua matuku mahite akakumbana bua nuenu nulonde disua dia bisamba bia bende, ne bua nuenu nuende mu tshienzenza tshia masandi, mu nkuka, mu kukuatshika kua malulu, mu manaya a bundu, mu tshingu tshia banu ba malulu, ne mu kutendelela kua mpingu mibi.

⁴ Mu malu â badi bakema bualu bua nuenu kanuena nuenda nʼabo tô ne ku dihitshibua diodiumue dia malu manyanguka, badi banuhenda;

⁵ bobo nebababadile malu abo kudiye udi udilongolola bua kulumbuluisha badi ne muoyo ne badi bafue.

⁶ Bua muanda eu kabidi bakambila bafue mene lumu luimpe, bua bobo balumbuluishibue bu mudibo balumbuluisha bantu badi ne mibidi, kadi bua kuikalabo ne muoyo mu nyuma bu mudi Nzambi musue.

⁷ Kadi kunshikidilu kua malu onso kudi ha buihi; nunku nuikale ne meshi majalama, ne nuikale bahole mu mitendelelu;

⁸ ku mutu kua malu onso nuikalangane ne dinanga dikole munkatshi muenu, bualu bua dinanga didi dibuikila malu mabi a bungi;

⁹ nusankidilangane ne benyi kanui ne kutontolola;

¹⁰ bu muakangata muntu ne muntu tshihedi, nukuatshishangane nkatshi munkatshi muenu, bu balami bimpe ba ngasa muvulangane wa Nzambi.

¹¹ Biakula muntu, akule mei bu mudiu mamba kudi Nzambi; biakuata muntu mudimu, enze bu mudi bukole buakamuha Nzambi; enze biandi bua Nzambi atumbishibue mu malu onso bua Yesu Kilisto; kudiye kuikale butumbi ne bukokeshi tô ne ku bikondo bia bikondo. Amen.

Bena Kilisto bakenge ba muakakenga Kilisto

¹² Bananga, kanukemi bua dikenga didi bu kahia munkatshi muenu diakaluila kunudi bu diteta, bu bualu buhia-buhia buakanukuata;

¹³ kadi bualu bua nudi babanyanganyi ba makenga a Kilisto, nusanke; bua nuenu nusanke kabidi ne disanka dinene ku dibuluibua dia butumbi buandi.

¹⁴ Bianuhendabo bua dina dia Kilisto, nudi ne disanka; bualu bua Nyuma wa butumbi ne Nyuma wa Nzambi udi unuikila hamʼbidi henu.

¹⁵ Kadi umue wenu kakengeshibu bu mushihianganyi, anyi bu muibi, anyi bu muenji wa malu mabi, anyi bu mudibueshi wa mu malu a bantu bakuabo;

¹⁶ kadi biakenga muntu bu umena Kilisto, kikadi biandi ne bundu, kadi atumbisha biandi Nzambi bua dina edi.

¹⁷ Bualu bua tshikondo tshia dilumbuluisha kubangadi ku ba mu nsubu wa Nzambi tshiakulua, ne biadianjiladi kubanga kutudi, kunshikidilu kua badi kabai batumikila lumu luimpe lua Nzambi nekuikale tshinyi?

¹⁸ Ne biasungidibua muntu muakane anu ne bualu bukole, muntu udi kai wa Nzambi ne udi mubi neamueneke kudi kunyi?

¹⁹ Nunku bantu badi bakenga bu mu disua dia Nzambi bafile mioyo yabo mu kuenza kua malu mimpe kudi Mufuki udi wa kueyemenyibua.