1 Petro 2 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi dibue dia ku ditumba

¹ Nunku hanumusha malu mabi onso, ne kudinga kuonso, ne lubombo, ne mukau, ne njianu yonso;

² bu bana balela katataka, nujinge mabele a meshi adi kâi ne kudinga, bua nuenu nudiundeku tô ne ku luhandu;

³ binuikala balabule ne Mukelenge udi muimpe;

⁴ nulue kudiye ndibue didi ne muoyo, diakahidiabo kudi bantu, kadi didi disungula kudi Nzambi, ndia mushinga mukole;

⁵ nunku nuenu kabidi, bu mabue adi ne muoyo, nuakashibua nsubu wa Nyuma, bua kuikala bakuidi ba tshijila; bua nuenu kufila milambu idi ya nyuma mitabushibue kudi Nzambi bualu bua Yesu Kilisto.

⁶ Bualu bua dî didi mu Mukanda wa Nzambi ne, Tangilai, udi nteka mu Siona dibue dinene dia mu ditumba dia nsubu, disungula ne dia mushinga mukole; Weyemena kudidi kena ufuishibua bundu.

⁷ Nunku mushinga mukole wadi udi kunudi badi bamuitabusha; kadi kudi badi kabai bamuitabusha, udi dibue diakahidiabo kudi bibaki ba nsubu, diodio diakavuishibua mutu wa ditumba;

⁸ ne dibue dia kukumabo dikasa, ne mutunda wa dibue wa kubalenduisha: bobo badi balenduka ku dî dia Nzambi bualu bua buhidia buabo; bakatekibua ku bualu ebu kabidi.

⁹ Kadi nuenu nudi tshisamba tshisungudibua, ne bakuidi ba bukelenge, ne tshisamba tshia tshijila, bantu badi bikale ba Nzambi muine, bua nuenu nuambe bua buimpe bua Nzambi wakanubikila bua kunuhatula mu mîdima bua kunubuesha mu munya wandi wa dikema.

¹⁰ Mu tshikondo tshia diambedi kanuakadi bantu, kadi katataka nudi bantu ba Nzambi; kanuakafuidibua luse, kadi katataka nuakufuidibua luse.

Bienza, bena ditabusha bimpe, bakuabo nebitabushe

¹¹ Bananga, udi nutendekena bu benyi ne bena luendu ba ha buloba ne, Nuehuke ku nkuka ya mibidi idi iluangana ne mioyo yenu;

¹² nuikale ne bienzedi bienu bimpe munkatshi mua bisamba bia bende, bualu bua, mu mianda idibo banusonguela nuenu bu benji ba malu mabi, bobo batumbishe Nzambi mu dituku dialueye, bua midimu yenu mimpe idibo bamona.

¹³ Nudikokesha ku bukokeshi buonso bua bantu bualu bua Mukelenge; nasha kudi nfumu munene udi ku mutu;

¹⁴ nasha kudi bangovena bu batumibua kudiye bua kudisombuela kudi benji ba malu mabi, ne bua kutumbisha benji ba malu mimpe.

¹⁵ Bualu bua disua dia Nzambi didi nunku, bua nuenu nuhuishe buhote bua bantu batshimbakane ku kuenza kuenu kua malu mimpe;

¹⁶ bu badishikamine, kadi kembu badi bangata budishikaminyi buabo bu tshibuikilu tshia malu mabi; kadi mikale bu bahika ba Nzambi.

¹⁷ Nunemeke bantu bonso. Nunange bana benu ba ma Kilisto. Nutshine Nzambi. Nunemeke nfumu munene.

Bualu bua bena mudimu ne banfumu

¹⁸ Bena mudimu, nudikokeshe kudi bakelenge benu ne ditshina dionso; kenganu kudi badi bimpe ne badi ne buhole, kadi kudi badi ne tshinyangu kabidi.

¹⁹ Bua muanda eu udi wa kusakidila, bikala muntu udikankamika mu kanyinganyinga bualu bua muoyo-mukese wandi kudi Nzambi hakengeye kai ne bualu.

²⁰ Butumbi budi hanyi binuadikankamika hanuenza bualu bubi ne badi banukuma? Kadi binuadikankamika hanuenza bualu buimpe ne nudi mikenga, bualu ebu budi bua kusakidila ku mesu kua Nzambi.

²¹ Bua nuakabikidibua bua muanda eu, bualu bua Kilisto wakakenga bua bualu buenu, wakanushila tshileshilu bua nuenu numulonde mu makasa andi.

²² Yeye kakenza bualu bubi, kabakamusangana ne didinga mukana muandi;

²³ hakamuhendabo, yeye kakabahenda kabidi; hakakengeye, yeye kakabakanyina, kadi wakadifila mu bianza bia udi ulumbulula biakane.

²⁴ Yeye muine wakututuadila malu mabi etu mu mubidi wandi ku mutshi mutshiamakane, bua tuetu, bamane kufua ku malu mabi, tuikale ne muoyo wa ku buakane; kunuakuondahibua ku mibundabunda yandi.

²⁵ Bualu bua nuakadi nuhambuka bu mikoko, kadi katataka nuakuhingana kudi Mulami ne Mutangidi wa mioyo yenu.