1 Kulondolola 5 - Mukanda wa Nzambi Dihungila Dikulukulu ne Dihungila Dihia-dihia 2003

Tunkanunuina tua Lubena

¹ Bana ba balume ba Lubena, muanʼa bute wa Isalele (yeye wakadi muanʼa bute; kadi bualu bua yeye wakanyanga bulalu bua tatu wandi, bakaha bana ba balume ba Yosefe, muana wa Isalele, bintu biandi bia buanʼa bute; kulondolola kuandi kakuena bu kua buanʼa bute.

² Bualu bua Yuda wakatamba bana babo bukole ne mukelenge wakafuma kudiye; kadi bintu bia buanʼa bute biakadi bia Yosefe).

³ Bana ba balume ba Lubena, muanʼa bute wa Isalele: Hanoka ne Palu, Heselona ne Kâmi.

⁴ Bana ba balume ba Yoele: Shemaya muanʼandi, ne Gogo muanʼandi, ne Shimei muanʼandi,

⁵ Mika muanʼandi, ne Leaya muanʼandi, ne Bâla muanʼandi,

⁶ ne Bela muanʼandi; Tigelata-pilenesê wakaya nʼandi mu buhika; yeye wakadi mukelenge wa Bena Lubena.

⁷ Bana babo ba mu meku abo, hakabalabo kulondolola kuabo, bakadi tulala Yiele ne Zekâya,

⁸ ne Bêla, muana wa balume wa Azaza, muana wa balume wa Sheme, muana wa balume wa Yoele, wakashikama mu Aloe tô ne ku Nebo ne Bâla-meona;

⁹ ne ku esete bakamuangalaka tô ne ku tshibuelelu tshia tshihela ku musulu wa Pelata, bualu bua bimuna biabo biakavulangana mu buloba bua Gilada.

¹⁰ Mu matuku a Shaula bobo bakaluangana ne Bena Hageli, bakabashiha; bakashikama mu ntenta yabo mu buloba buonso ku esete kua Gilada.

Tunkanunuina tua Gada

¹¹ Bana ba balume ba Gada bakashikama ha buihi nʼabo mu buloba bua Bashana ku Saleka;

¹² Yoele wakadi ha mutu habo ne Shafama wakamulonda, ne Yanai ne Shafata mu Bashana.

¹³ Bana babo ba mu nsubu wa batatuʼabo: Mikaele ne Meshulama ne Sheba ne Yolai ne Yakana ne Zia ne Ebê, muanda mutekete bonso.

¹⁴ Aba bakadi bana ba balume ba Abihayila, muana wa balume wa Huli, muana wa balume wa Yaloa, muana wa balume wa Gilada, muana wa balume wa Mikaele, muana wa balume wa Yeshishai, muana wa balume wa Yado, muana wa balume wa Buza;

¹⁵ Ahi, muana wa balume wa Abediele, muana wa balume wa Guni, wakadi ha mutu ha nsubu ya batatuʼabo.

¹⁶ Bakashikama mu Gilada mu Bashana ne mu misoko yai ne mu miaba yonso ya ku matshika a Shalona tô ne ku mpenge yabo.

¹⁷ Buonso buabo bakabadibua mu kulondolola kuabo mu matuku a Yotama, mukelenge wa Yuda, ne mu matuku a Yalobama, mukelenge wa Isalele.

Malu a Bisamba Bibidi ne Tshituha

¹⁸ Bana ba balume ba Lubena ne ba Bena Gada ne ba tshituha tshia tshisamba tshia Manashe, bantu ba bukitu, bantu bakadi ne bukole bua kutuala nʼabu ngabu ne muele wa nvita, ne bua kuela nʼabu buta, ne bakadi ne dikima dia nvita, bakadi binunu makumi anai ne binai ne nkama muanda mutekete ne makumi asambombo, bakadi bena nvita.

¹⁹ Bobo bakaluangana ne Bena Hageli ne Yetû ne Nafisha ne Nodaba.

²⁰ Bakuabo bakakuatshishangana nʼabo, ne bobo ne bakadi nʼabo bakahita Bena Hageli bukole; bualu bua bobo bakadila kudi Nzambi mu nvita, ne yeye wakabunvuila, bualu bua bobo bakamueyemena.

²¹ Bobo bakanyenga bimuna biabo; tumelo tuabo bu binunu makumi atanu, ne mikoko bu binunu nkama ibidi ne makumi atanu, ne nyama ya mpunda binunu bibidi, ne bantu binunu lukama.

²² Ba bungi bakashihibua bualu bua nvita ei yakadi ya Nzambi. Bobo bakashikama mu miaba yabo tô ne hakayabo mu buhika.

²³ Bantu ba mu tshituha tshia tshisamba tshia Manashe bakashikama mu buloba; bakavulangana ku Bashana tô ne ku Bâla-hêmona ne ku Senî ne ku mukuna wa Hêmona.

²⁴ Aba bakadi ku mutu kua nsubu ya batatuʼabo: Efê ne Ishi ne Ebele ne Azeliele ne Yelemiya ne Hodaweya ne Yadiele, bena bukitu ne ba butumbi ba ku mutu kua nsubu ya batatuʼabo.

²⁵ Bobo bakenzela Nzambi wa batatuʼabo bibi, bakalonda malu a masandi ne nzambi ya bantu ba mu buloba abu bakashihibua kudi Nzambi ku mpala kuabo.

²⁶ Nzambi wa Isalele wakasonsola mutshima wa Pula, mukelenge wa Ashû, ne mutshima wa Tigelata-pilenesê, mukelenge wa Ashû, ne bobo bakaya nʼabo, Bena Lubena ne Bena Gada ne tshituha tshia tshisamba tshia Manashe mene mu buhika; bakaya nʼabo tô ne ku Halaha ne Habo ne Hala ne ku musulu wa Gozana tô ne ku didiku edi.