1 Kulondolola 15 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balua ne Mushete wa Nzambi mu Yelushalema

¹ Davidi wakibaka nsubu mu musoko wa Davidi; wakalongolola muaba wa kuteka mushete wa Nzambi, wakashimikaku ntenta wa kûteka.

² Hashishe Davidi wakamba ne, Anu Bena Lewi badi ne bua kutuala mushete wa Nzambi; bualu bua Yehowa wakabasungila bua kutualabo mushete ne bua kumukuatshilabo mudimu tshiendelele.

³ Davidi wakabikila Bena Isalele bonso ku Yelushalema bua kuangata mushete wa Yehowa, balue nʼau ku muaba wakaulongolueleye.

⁴ Davidi wakasangisha bana balume ba Alona ne Bena Lewi:

⁵ ba bana ba Kohata, Uliele mukelenge, ne bana babo lukama ne makumi abidi;

⁶ ba bana ba Melali, Asaya mukelenge wabo, ne bana babo nkama ibidi ne makumi abidi;

⁷ ba bana ne bana babo lukama ne makumi asatu;

⁸ ba bana balume ba Elisafana, Shemaya mukelenge wabo, ne bana babo nkama ibidi;

⁹ ba bana ba Hebelone, Eliele mukelenge wabo, ne bana babo makumi muanda mukulu;

¹⁰ ba bana ba Uziele, Aminadaba mukelenge wabo, ne bana babo lukama ne dikumi ne babidi.

¹¹ Davidi wakabikila Sadoka ne Ebeyatâ bakuidi, ne Bena Lewi ne miele ne Asaya ne Yoele ne Shemaya ne Eliele ne Aminadaba,

¹² wakabambila ne, Nuenu nudi ku mutu kua nsubu ya batatu ba mu nsubu ya Bena Lewi; nudijidile ne nuenu ne bana benu, bua nuenu nulue ne mushete wa Yehowa, Nzambi wa Isalele, ku muaba unakûlongoluela.

¹³ Bualu bua nuenu kanuakautuala diambedi, Yehowa Nzambi wetu wakahatuka kutudi bua kukukengesha, bualu bua tuetu katuakakeha disua diandi mu mukenji eu.

¹⁴ Nunku bakuidi ne Bena Lewi bakadijidila bua kuluabo ne mushete wa Yehowa, Nzambi wa Isalele.

¹⁵ Bena Lewi bakatuala mushete wa Nzambi ha maha abo ne mitshi, bu muakamba Mose bu muakadi dî dia Yehowa.

¹⁶ Davidi wakambila wakadi ku mutu kua Bena Lewi bua kusunguleye bimbi ba misambu munkatshi mua bana babo ne bintu bia kuimba nʼabi misambu, nzenze ne bisanji ne biamu bia kukumakasha, bua kuimbabo misambu ne dî dinene dia disanka.

¹⁷ Nunku Bena Lewi bakasungula Hemana, muana wa Yoele; ne ba bana babo, Asafa, muana wa Belekiya; ne ba bana ba Melali, Etana, muana wa Kushaya;

¹⁸ ne bana babo ba mu mulongo muibidi, Zekâya ne Bena ne Yaziele ne Shemilamota ne Yehiele ne Uni ne Eliaba ne Benaya ne Mâseya ne Matitiya ne Elifelehu ne Mikeneya ne Obeda-edome ne Yiele, balami ba ku bibi.

¹⁹ Nunku bakasungula bimbi ba misambu, Hemana ne Asafa ne Etana bua kuimbabo bikole ne biamu bia mitaku bia kukumakasha;

²⁰ ne Zekâya ne Aziele ne Shemilamota ne Yehiele ne Uni ne Eliaba ne Mâseya ne Benaya bakadi ne nzenze bua kuimbabo tshimbidi tshia Alamota;

²¹ ne Matitiya ne Elifelehu ne Mikeneya ne Obeda-edome ne Yiele ne Azazaya bakadi ne bisanji bua kuimbabo tshimbidi tshia Sheminita, bua kubishabo misambu.

²² Kenaniya, mukelenge wa Bena Lewi, wakadi ku mutu kua bimbi ba misambu; yeye wakabayisha mua kuimba bualu bua yeye wakadi ne lungenyi elu.

²³ Belekiya ne Elekana bakadi balami ba bibi bia nsubu wakadi mushete.

²⁴ Shebanya ne Yoshafata ne Netanele ne Amasai ne Zekâya ne Benaya ne Eliezê bakuidi bakela mpungi ku mpala kua mushete wa Nzambi; Obeda-edome ne Yehiya bakadi balami ba bibi bia nsubu wakadi mushete.

²⁵ Nunku Davidi ne bakulu ba mu Isalele ne tupitene tua binunu bia bantu bakaya bua kuangatabo mushete wa tshihungidi tshia mei a Yehowa ku nsubu wa Obeda-edome ne disanka dinene.

²⁶ Hashishe bakakuatshisha Nzambi Bena Lewi bakadi batuala mushete wa tshihungidi tshia mei a Yehowa, bobo bakamushihela balume ba ngombe muanda mutekete ne bimpanga muanda mutekete.

²⁷ Davidi wakadi uluata tshilulu tshia lin muimpe, ne Bena Lewi bonso bakadi batuala mushete ne bimbi ba misambu ne Kenaniya, mulombodi wa bimbi ba misambu, bakaluata lin muimpe; Davidi wakadi uluata efoda wa lin kabidi.

²⁸ Nunku Bena Isalele bonso bakalua ne mushete wa tshihungidi tshia mei a Yehowa bela mbila ne tshiona tshikole tshia nshiba ne mpungi ne tshia biamu bia kukumakasha, bakadi bimba nzenze ne bisanji ne dî dikole.

²⁹ Hakaluabo ne mushete wa tshihungidi tshia mei a Yehowa ku musoko wa Davidi, Mikala, muana wa bakashi wa Shaula, wakatangila ha disoso dia nsubu, ne hakamoneye Davidi uja maja utuhika, yeye wakamulengulula mu mutshima wandi.