1 Kulondolola 12 - Mukanda wa Nzambi Dihungila Dikulukulu ne Dihungila Dihia-dihia 2003

Masalayi a Davidi

¹ Aba mbantu bakatua kudi Davidi ku Sikelaga hakadiye musokome bualu bua Shaula, muana wa Kishi; bakadi munkatshi mua bena bukitu bandi, bakadi bakuatshisha bandi mu nvita.

² Bakadi batuadi ba mata a mikete, bakamanya mua kuela mabue ne tshianza tshia balume ne tshia bakashi, bakamanya mua kuela mata abo nunku kabidi; bakadi bana babo ne Shaula, Bena Benyamina.

³ Ahiezê wakadi kapitene kabo; hashishe Yoasha, ne bana balume ba Shemâ, Muena Gibea, ne Yeziele ne Pelete, bana balume ba Asemaweta, ne Belaka ne Yehu, Muena Anatota,

⁴ ne Yishemaya, Muena Gibeona, muena bukitu wa munkatshi mua bantu makumi asatu ne ku mutu kua bantu makumi asatu, ne Yelemiya ne Yahaziele ne Yohanana ne Yozabada, Muena Gedela,

⁵ ne Eluzai ne Yelimota ne Bealeya ne Shemaliya ne Shefataya, Muena Halufa,

⁶ ne Elekana ne Yishiya ne Azalele ne Yoezê ne Yashobeama, Bena Kola,

⁷ ne Yoela ne Zebadaya, bana ba Yelohama wa mu Gedô.

⁸ Bena Gada bakuabo bakaya kudi Davidi ku musoko wa lumbu wa mu tshihela, bena bukitu bakayishibua malu onso a nvita, bakamanya mua kuluangana ne ngabu ne mafuma; mpala yabo yakadi bu mpala ya nyama ya ntambue, bakamanya mua kunyema lubilu bu ntole ya mu mikuna;

⁹ Ezê wakadi ha mutu habo, Obadaya muibidi, ne Eliaba muisatu,

¹⁰ Mishemana muinai, ne Yelemiya muitanu,

¹¹ ne Atai muisambombo, ne Eliele wa muanda mutekete,

¹² ne Yohanana wa muanda mukulu, ne Elezabada wa tshitema,

¹³ Yelemiya wa dikumi, Makebanai wa dikumi ne umue.

¹⁴ Aba mba mu bana balume ba Gada bakadi tupitene tua masalayi; wakatamba buhuekele wakadi ku mutu kua bantu lukama; wakatamba bunene wakadi ku mutu kua bantu tshinunu.

¹⁵ Aba mbantu bakasabuka dishiya dia Yadene mu ngondo wa kumudilu hakadi musulu mûle muhatuke mu mielelu yau; bakihata bantu bonso bakadi mu bibanda ku esete ne ku wesete.

¹⁶ Bantu ba Benyamina ne ba Yuda bakalua ku musoko wa lumbu wa Davidi.

¹⁷ Davidi wakahatuka bua kusambakena nʼabo, wakabambila ne, Bulualua kundi ne ditalala bua kukuatshishangana neanyi, mutshima wanyi neunvuangane ne mitshima yenu; kadi bulualua bua kuntangila tshitungu kudi bena lukuna banyi, hashishe Nzambi wa batatu betu atangile bualu ebu, anuhele, bualu bua tshiena ne bualu bubi mu bianza bianyi.

¹⁸ Hashishe Nyuma wakatulukila Amasai, wakadi ku mutu kua bantu makumi asatu, yeye wakamba ne, Tudi bantu bebe, Davidi; tudi ku luseke luebe, wewe muana wa Yishai! Ditalala, ditalala dikale kûdi, ditalala dikale kudi bakuatshishi bebe! Bualu bua Nzambi webe udi ukukuatshisha. Hashishe Davidi wakabitabusha, wakabavuisha tupitene tua masalayi andi makuabo.

¹⁹ Bakuabo ba Bena Manashe bakalua kudi Davidi hakayeye ne Bena Peleshete bua kuluangana ne Shaula; kadi bobo kabakabakuatshisha nansha; bualu bua bakelenge ba Bena Peleshete hakamanyabo bualu ebu bakabatuma kuabo, bamba ne, Yeye neaye kudi mukelenge wandi Shaula bua kufueye mioyo yetu kudiye.

²⁰ Hakadiye uya ku Sikelaga, bakuabo ba Bena Manashe bakalamata kudiye, Adena ne Yozabada ne Yediele ne Mikaele ne Yozabada ne Elihu ne Siletai, tupitene tua binunu bia bantu ba Manashe.

²¹ Bobo bakahitshisha Davidi kudi bisumbu bia bena tshinyangu; bualu bua buonso buabo bakadi bena bukitu, bakadi tupitene tua masalayi.

²² Bantu bakalua kudi Davidi ku difuku ku dituku bua kunukuatshisha; bakalua tshisumbu tshinene tshia masalayi bu misumba ya Nzambi.

²³ Ebu mbungi bua bakadi ku mutu kua bena nvita bakalua kudi Davidi mu Hebelone bua kukudimunabo bukelenge bua Shaula kudiye bu muakadi dî dia Yehowa.

²⁴ Ba munkatshi mua Bena Yuda bakadi bambila ngabu ne mafuma bakadi bena nvita binunu bisambombo ne nkama muanda mukulu.

²⁵ Ba munkatshi mua Bena Shimeona bena nvita ba bukitu bakadi binunu muanda mutekete ne lukama.

²⁶ Ba munkatshi mua Bena Lewi binunu binai ne nkama isambombo.

²⁷ Yehoyada wakadi muenyampala wa mu nsubu wa Alona; bantu binunu bisatu ne nkama muanda mutekete bakadi nʼandi,

²⁸ ne Sadoka, nsongalume muena bukitu, ne ba mu nsubu wa tatu wandi bakadi tupitene makumi abidi ne tubidi.

²⁹ Ba munkatshi mua Bena Benyamina, bana babo ne Shaula, binunu bisatu; bualu bua diambedi bungi buabo bakalamata kudi Shaula.

³⁰ Ba munkatshi mua Bena Efelayima, bena nvita ba bukitu, bantu ba butumbi mu nsubu ya batatuʼabo binunu makumi abidi ne nkama muanda mukulu.

³¹ Ba munkatshi mua tshituha tshia tshisamba tshia Manashe binunu dikumi ne muanda mukulu bakadi ne menʼabo mafunda bua kusungulabo Davidi mukelenge.

³² Ba munkatshi mua Bena Yisakâ, bakamanya mua kujingulula malu a tshikondo atshi, bua kumanyabo malu akadi Bena Isalele ne bua kuenza, bakadi nkama ibidi ku mutu kuabo; bana babo bonso bakalonda mikenji yabo.

³³ Ba munkatshi mua Bena Zebuluna bakadi ne bukole bua kuluangana nvita mu musumba, bakamanya mua kuasa mualu wa nvita ne bintu bia nvita bionso, bakadi binunu makumi atanu; bakamanya mua kuluangana bimpe, kabakadi ne mitshima ibidi.

³⁴ Ba munkatshi mua Bena Nafatale bakadi tupitene tshinunu, ne bantu binunu makumi asatu ne muanda mutekete bambudi ba ngabu ne mafuma.

³⁵ Ba munkatshi mua Bena Dana bakamanya mua kuasa mualu wa nvita bakadi binunu makumi abidi ne muanda mukulu ne nkama isambombo.

³⁶ Ba munkatshi mua Bena Ashê bakamanya mua kuluangana nvita mu musumba ne mua kuasa mualu wa nvita bakadi binunu makumi anai.

³⁷ Dishiya dia Yadene ba Bena Lubena ne ba Bena Gada ne ba mu tshituha tshia tshisamba tshia Bena Manashe bakadi binunu lukama ne makumi abidi bakadi ne bintu bia nvita bionso.

³⁸ Bantu aba bonso, bena nvita bakamanya mua kuasa mualu wa nvita, bakatua ne mitshima mitoke ku Hebelone bua kuhingishabo Davidi mu bukelenge bua Isalele mujima; ne bonso bakuabo ba Isalele bakadi ne mutshima umue bua kuhingisha Davidi mu bukelenge.

³⁹ Bakashala ne Davidi matuku asatu, bakadia ne bakanua nʼandi; bualu bua bana babo bakamana kubalongoluela bia kudia.

⁴⁰ Bakadi ha buihi nʼabo tô ne ku Yisakâ ne Zebuluna ne Nafatale bakatua ne bia kudia ha nyima ha nyama ya mpunda ne ya tumelo ne ya mpunda mikuabo, ne ya ngombe, bintu bia kudia bia bukula ne bia nfigi ne bia tumuma tukese ne bia nvinyo ne bia manyi ne ngombe ne mikoko ya bungi; bualu bua disanka diakadi mu Isalele.