1 Korente 5 - Mukanda wa Nzambi Dihungila Dikulukulu ne Dihungila Dihia-dihia 2003

Paulo udi ubabela bua muena masandi udi munkatshi muabo

¹ Badi bunvua kuonso ne, Masandi adi munkatshi muenu, masandi a bu nunku mene adi kâi munkatshi mua bisamba bia bende, ne, Umue wenu udi ne mukashi wa tatu wandi.

² Ne nuenu nuakadisua, ne kanuakadila bu muakadibi kuikala bimpe, bua yeye wakenza bualu ebu umushibue munkatshi muenu, anyi?

³ Bua meme, tshî munkatshi muenu mu mubidi, kadi muikale nʼenu mu nyuma wanyi, nakumana kulumbuluisha muntu wakenza bualu ebu nunku, bu mundi muikaleku.

⁴ Nakamalumbaluisha mu dinu dia Mukelenge Yesu, hanuakadisangishaku ne nyuma wanyi nʼenu, mu bukole bua Mukelenge wetu Yesu,

⁵ bua kufila muntu wa nunku kudi Satana bua kushihesha malu a mubidi, bua nyuma wandi asungidibue mu dituku dia Mukelenge Yesu.

⁶ Kuditumbisha kuenu kakuena kuimpe. Kanuena bamanye ne luevene lukese ludi lumuangalaka mu mutanda wa bidia mujima, anyi?

⁷ Umushai luevene lukulukulu bua nuenu nuikale bu mutanda muhia-muhia, bu munudi kanui ne luevene. Bualu bua mulambu wetu wa Kuhita kua Yehowa wakashihibua, Kilisto mene.

⁸ Nunku tuikale tudie bidia bia disanka edi; katudidî ne luevene lukulukulu, anyi luevene lua meshi mabi ne lua malu mabi, kadi tudie disanka ne bidia bidi kabi ne luevene, bia malu a hatoke ne a bushua.

⁹ Nakanufundila mu mutanda wanyi ne, Kanubuelakanyi ne bena masandi;

¹⁰ tshiakamba dî nasha kakese bua bena masandi ba ha buloba ebu, anyi bena lukuka lua bintu, anyi banyengi ba bintu, anyi bena mpingu; nunku nuakadi kuikala ne bualu bua kumuka mu buloba ebu.

¹¹ Kadi mpindiu ndi nufundila ne, Kanubuelakanyi ne muntu udi ne dina dia muanʼenu wa ma Kilisto bikaleye muena masandi, anyi muena lukuka lua bintu, anyi muena mpingu, anyi muhendanganyi, anyi mukuatshiki wa maluvu, anyi munyengi wa bintu; kanudî mene ne muntu wa nunku.

¹² Bua ndi ne bualu bua kulumbuluisha badi kabai mu ekelesia kudi kunyi? Nuenu kanuena nulumbuluisha badi mu ekelesia, anyi?

¹³ Kadi badi kabai mu ekelesia, Nzambi nkayandi udi ubalumbuluisha. Umushai muntu mubi au munkatshi muenu.