1 Korente 10 - Mukanda wa Nzambi Dihungila Dikulukulu ne Dihungila Dihia-dihia 2003

Bena ditabusha badimuke bua mahanga a Bena Isalele

¹ Bua tshiena musue nuenu nuhange kumanya, bana betu, ne, Bankambua betu bonso bakadi munshi mua ditutu, buonso buabo bakahita munkatshi mua mai manene;

² buonso buabo bakabatijibua mu bulombodi bua Mose mu ditutu ne mu mai manene;

³ buonso buabo bakadia bia kudia biobiumue bia Nyuma;

⁴ buonso buabo bakanua bia kunua biobiumue bia Nyuma; bua bakanua ku dibue dia Nyuma diakabalonda, ne dibue edi diakadi Kilisto.

⁵ Kadi Nzambi kakasanka ne bakuabo babo bakadi bahita bungi; bua bakahoneshibua bafue mu tshihela.

⁶ Malu â akalua bifuanyikishi bia malu etu, bua katukumi mitshima yetu ku malu mabi bu muakakumabo mitshima yabo.

⁷ Lekelai kuikala batendeledi ba mpingu, bu muakadi bakuabo babo; bu muakafundabo ne, Bantu bakashikama bua kudia ne bua kunua, bakabika bua kunaya.

⁸ Tulekelai kuenda masandi bu muakenda bakuabo babo, bakafua biabo mbombo ibidi ne binunu bisatu dituku dimue.

⁹ Tulekelai kuteta Mukelenge bu muakamuteta bakuabo babo, bakashihibua kudi nyoka.

¹⁰ Lekelai kutontolola, bu muakatontolola bakuabo babo, bakashihibua kudi mushihi.

¹¹ Malu â akadi abakuata bu bifuanyikishi, akafundibua bua kutudimusha, kutudi mene kuakufika nshikidilu wa bikondo.

¹² Nunku muntu udi wela meshi ne, Ndi muimane, adimuke bua kahonyi biandi.

¹³ Kakuena diteta diakunukuata didi kadi dikuata muntu yonso; kadi Nzambi udi mua kueyemenyibua, ngudi kai witabusha bua nuenu nutetshibue ne diteta didi dinuhita bukole; kadi halua diteta, yeye neanuenzele nshila wa kuhandukila, bua nuenu mimanye mua kutantamana mu diteta.

Bena ditabusha badimuke bua mpingu

¹⁴ Nunku, bananga banyi, nyemai kutendelela kua mpingu.

¹⁵ Ndi ngamba bu mundi ngambila bena meshi, nuenu jingululai bu mundi ngamba.

¹⁶ Luhanza lua disanka lutudi tuvuidishila disanka kaluena buobumue buetu mu mashi a Kilisto, anyi? Ne mutanda wa bidia utudi tutshibula kawena buobumue buetu mu mubidi wa Kilisto, anyi?

¹⁷ Bualu bua mutanda wa bidia udi umue, tuetu ba bungi tudi mubidi umue; bualu bua buonso buetu tudi tudisanga ku mutanda umue.

¹⁸ Tangilai badi Bena Isalele mu buntu buabo; bantu badi badia milambu ya ha tshioshelu kabena ne buobumue ne tshioshelu, anyi?

¹⁹ Nunku ndi ngamba tshinyi? Ndi ngamba ne, Tshintu tshidibo bashihela mpingu tshidi ne bualu, anyi luhingu ludi ne bualu, anyi?

²⁰ Kadi ndi ngamba ne, Bintu bidi bantu ba bisamba bia bende bashiha bu mulambu badi babishihela bademon, kabena babishihela Nzambi; tshiena musue nuenu nuikale ne buobumue ne bademon.

²¹ Kanuena mua kunua luhanza lua Mukelenge ne luhanza lua bademon hohamue; kanuena mua kudisanga ku mesa a Mukelenge ne ku mesa a bademon hohamue.

²² Anyi, tudi tufuisha Mukelenge mukau, anyi? Tudi tumutamba bukole, anyi?

Bantu ba Nzambi kabaleshi bantu bakuabo bualu bubi

²³ Malu onso adi mimpe a kuenza, kadi malu onso kêna atukuatshisha; malu onso adi mimpe a kuenza, kadi malu onso kêna atudiundisha.

²⁴ Muntu kakebi mua kudisankisha, kadi akebe mua kusankisha mukuabo.

²⁵ Tshintu tshionso tshidibo bahana ku tshisalu, nutshidie, kanukonkanganyi dikonka bualu bua muoyo-mukese;

²⁶ bualu bua buloba mbua Mukelenge ne tshiuwidi tshiabu.

²⁷ Biakulayidila umue wabo udi kai muena ditabusha, ne binuasua kuya, tshintu tshionso tshidibo bateka ku mpala kuenu, nutshidie; kanukonkanganyi dikonka bualu bua muoyo-mukese.

²⁸ Kadi biamu atu bila muntu ne, Tshintu etshi ntshishihela mpingu; kanutshidî, bua bualu buandi wakanumanyisha bualu ebu, ne bua muoyo-mukese kabidi.

²⁹ Tshiena ngamba bua muoyo-mukese webe, kadi bua muoyo-mukese wa mukuabo; bua budishikaminyi buanyi budi bulumbuluishi bua kudi muoyo-mukese wa mukuabo bualu kai?

³⁰ Bingadia tshintu ne disakidila, badi bampendela bualu kai, bua tshintu tshindi nsakidila nʼatshi Nzambi bualu buatshi?

³¹ Nunku binuadia anyi binuanua, anyi malu onso anudi nuenza, nuenze malu onso bua kutumbisha Nzambi.

³² Kanuikadi balenduishi anyi kudi Bena Yuda anyi kudi Bena Gelika anyi kudi ekelesia wa Nzambi;

³³ bu mundi nsankisha bantu bonso mu malu onso, tshi ndikebela dikuatshisha dianyi, kadi ndi nkeba dia bantu ba bungi, bua bobo basungidibue.