Zakaria 5 - Tshwa Bible

A muwonuo wa pupilo gi hahako.

¹ Zonake nzi lo tlakusa a mahlo ya mina kambe, nzi wona a papilo gi nga haha.

² A ngelosi yiku ka mina: Xini u xi wonako? Nziku ka yona: Nzi wona a papilo gi hahako, ga 20 wa mikono kuleha ka gona, ni 10 wa mikono kuanama.

³ Yona yiku ka mina: Lowu i nzhukano wu tako hehla ka tiko gontlhe; hakuva munwe ni munwani loyi a yivako i ta susiwa laha hi ntamu wa wona; munwe ni munwani a hlambanyako i ta susiwa laha hi ntamu wa wona.

⁴ Nzi wu humesile, ku wula Jehova wa tiyimpi, wu ta enghena lomu ndlwini ya khamba, ni lomu ndlwini ya loyi a hlambanyako mawunwa hi vito ga mina; wu ta tshama ndlwini yakwe, wu mbheta a timhanze ta yona ni maribye ya yona.

A wasati lomu ka efa.

⁵ Zonake a ngelosi leyi yi nga wulawula na mina yi lo tshinela, yiku ka mina: Tlakusa a mahlo ya wena, u wona a xilo xi humako lahaya lezaku xini.

⁶ Mina nziku: Xini? Yona yiku: I efa gi humako. Yi engeta yiku: Mufananiso wa vona va nga kona tikweni gontlhe.

⁷ Ku lo tlakusiwa a xifenengeto xa tsovu, ku lo woneka a wasati a nga tshamile nzeni ka efa.

⁸ Zonake yiku: Hi yena Kubiha. Zonake yi lo hoxa wasati nzeni ka efa, a veka a xifenengeto xa tsovu nonwini wa gona.

⁹ Nzi lo tlakusa a mahlo ya mina, nzi wona na ku huma a vavasati vambiri, a mheho na yi tatisa tipapa tabye, hakuva va wa hi ni tipapa to fanana ni ta sekwa. Va lo tlakusa a efa xikari ka tilo ni misava.

¹⁰ Mina nziku ka ngelosi leyi yi nga wulawula na mina: Va gi yisa kwihi a efa ke?

¹¹ Yona yiku ka mina: Va gi yisa tikweni ga Xinari, kasi ku ya gi akela a yindlu; loku yi akilwe, gona gi ta vekiwa wutshanwini ga gona.