Va le Kolosi 2 - Tshwa Bible

¹ Hakuva nza ranza lezaku mu yi tiva a yimpi ya hombe leyi nzi mu lwelako yona, nwina ni va le Laodikea, ni vontlhe lava va nga wonangiko a nghohe ya mina,

² lezaku a timbilu tabye ti fela a ku tangaliswa, vona na va te gwa liranzweni, va amukela a kutala ka kupimisisa ku tiyileko, lezaku va fela ku tiva a fihlakalo wa Nungungulu, wu nga yena Kristu, 2 Kor. 1:6; 2 Ped. 3:18

³ loyi ku fihlilweko ka yena a titshomba tontlhe ta wutlhari ni kutiva.

⁴ Nzi wula lezo kasi mu nga kupetwi hi munhu hi timhaka ti wongako.

⁵ Hambu nzi nga hi kona hi miri, nzi na nwina hi moya, na nzi tsaka hi ku wona a kutshameka ka nwina ni kutiya ka kukholwa ka nwina ka Kristu.

⁶ Hikwalaho khwatsi hilezi mu nga amukela Kristu Jesu a Hosi, fambisani zalezo ka yena,

⁷ mu zima mitsu ka yena, ni ku akiwa ka yena, mu tiyiswa kukholweni, kota lezi mu nga gonziswa, mu tala hi ku bonga Nungungulu.

Paule a luleka hi tlhelo ga gonzo ya hava.

⁸ Ti woneleni lezaku a munhu a nga dzuki a mu koka hi tigonzo ta wutlhari ga hava hi ku lanzela a mikhuwo ya vanhu, ni mintamu yo sangula ya misava, na ku nga hi ka Kristu. Jer. 29:8; Mat. 15:2; Maheb. 13:9

⁹ Hakuva a kutala kontlhe ka wuNungungulu ku tshamile ka yena hi miri. Isa. 9:6; Joh. 1:14; Rom. 9:5; Tit. 2:13

¹⁰ Ka yena mu avelwe a kutala loku, yena loyi a nga hloko ya vafumeli vontlhe va mimoya ni mintamu. Joh. 1:16; 1 Ped. 3:22

¹¹ Ka yena mu enghenisilwe wukwera hi wukwera legi gi nga mahiwangiko hi mandla, kanilezi a wukwera ga Kristu, legi gi mahiwako hi ku tlhatlha a miri wa nyama, Deut. 10:16; Rom. 6:6

¹² na mu lahlilwe zinwe naye hi kubapatizwa, mu tlhela mu vuxiwa zinwe naye hi ku kholwa a ntamu wa Nungungulu, loyi a nga vuxa Kristu hi ka vafileko. Rom. 6:4; Efe. 3:7

¹³ Na nwina lava mu nga file hi kota ya zihambuko za nwina ni wukhuna ga nyama ya nwina, i lo mu vuxa zinwe naye; na a tsetselela zihambuko zontlhe za hina.

¹⁴ I lo vinya a papilo ga milanzu, legi gi nga hi kecara hi zileletelo za gona; i gi susile hi ku gi belela xihambanweni.

¹⁵ I lo wutla matlhari ya vafumeli va mimoya ni mintamu, a va wisa tingana kubaseni, a giyagiya hi ku va hlula kakwe xihambanweni. Gen. 3:15; Tis. 66:18; Isa. 53:12; Lu. 10:18; Joh. 12:31

¹⁶ Hikwalaho ngha ku nga hi kona munhu a mu lamulako hi kota ya zakuga kutani kunwa, kutani hi siku ga ximuse, kutani hi kuwoneka ka hweti, kutani hi masabado; Rom. 14:3; Gal. 4:10

¹⁷ lezi zi nga xiruti xa zilo lezi zi ta ngata; kanilezi a miri wa zona hi Kristu. Maheb. 8:5

¹⁸ Mu nga vumeli munhu a ku mu wutlela a nchachazelo wa nwina, hi kutikoramisa ka hava ni ku khozela tingelosi, a ti kulisa hi kota ya ziwoniso zakwe, a ti kukumukisa hava hi kupima kakwe ka nyama,

¹⁹ na a nga namareli ka loyi a nga Hloko, leyi ha yona a miri wontihe wu wundliwako ni ku tlhanganyiswa hi mahlakala ni misiha, wu kula hi kukula loku ku tako hi ka Nungungulu.

²⁰ Loku mu file zinwe na Kristu hi tlhelo ga mintamu yo sangula ya misava, hikuyini mu ti rwexa a mikhuwo, khwatsi hi loku ma ha hanyela misava ke?

²¹ Ku ngalo: U nga zi khomi, U nga zi danjhi, U nga zi henyi!

²² (Na ku wuliwa hi zilo zi ta nga lova hi kutirisiwa.) Kasi lezo zileletelo ni zigonzo za vanhu ntsena.

²³ Hakunene lezi zilo zi woneka ku khwatsi wutlhari, loku va khozela hi kuranza kabye, va ti koramisa ni ku xanisa mimiri yabye; kanilezi a zi vuni nchumu a ku tsimbetela a kunavela ka nyama.