Va le Filipi 3 - Tshwa Bible

Paule a tsika zontlhe hi kota ya Kristu.

¹ Vamakabye, hi kugumesa nzi ngalo: Tsakani Hosini! A nzi karali mina ku mu tsalela timhaka twaleti, hakuva za mu vuna.

² Ti woneleni ka timbyana, ti woneleni ka zitiri za kubiha, ti woneleni ka lava vo ti tsemelela. Rom. 2:28; Gal. 5:2, 15

³ Hakuva hina hi zitshiva, hina lava hi khozelako hi Moya wa Nungungulu, hi ti kulisako ha Kristu Jesu, na hi nga hi na kutsumba nyameni. Deut. 10:16; 30:6; Jer. 4:4; Joh. 4:23; Rom. 2:29; 4:11; Kol. 2:11

⁴ Kasi na minawu nzi ngava ni kutsumba nyameni. Loku munwani a alakanya lezaku i na ni kutsumba nyameni, mina nza hunzisa.

⁵ Nzi lo engheniswa wukwera hi siku ga wuntlhanu ni manharu, nzi wa lixaka la ka Israeli, wa nyimba ya ka Benjamini, nzi muHeberu nʼwana wa vaHeberu; hi tlhelo ga nayo nzi muFarisi. Miti. 23:6

⁶ Hi tlhelo ga kupinyamela, nzi wa xanisa a bandla; ni tlhelo ga kululama loku ku nga ka nayo nzi wa nga hi na kusoleka. Miti. 8:3; Gal. 1:13

⁷ Ahembalokoke, a zilo lezi zi nga hi bhinzu ka mina, nzi zi alakanyile lezaku kulahleka hi kota ya Kristu.

⁸ Ina, nza alakanya zilo zontlhe kulahlekelwa hi kota ya kusaseka ka ku tiva Kristu Jesu a Hosi ya mina; hakuva nzi lahlekelwe hi zilo zontlhe hi kota ya yena, nzi zi alakanya lezaku i chaka, kasi nzi fela ku bhinzula Kristu, Joh. 17:3; 1 Kor. 2:2

⁹ nzi kumiwa ka yena, na nzi nga hi na kululama ka mina loku ku nga ka nayo, kanilezi loku ku nga ka kukholwa ka Kristu, a kululama loku ku tako hi ka Nungungulu hi kukholwa, Tis. 143:2; Isa. 64:6; Rom. 1:17; 10:3; Gal. 2:16; 2 Ped. 1:1

¹⁰ Hakuva nzi ranza ku tiva yena, ni ntamu wa kuvuka kakwe, ni ku hlengela kuxaniseka kakwe, nzi mu ringanyeta kufeni kakwe; 1 Ped. 4:13

¹¹ lezaku kumbe xana nzi nga chikela a kuvukeni ka vafileko. Miti. 26:7

¹² A hi lezaku nzi sina nzi ku kumile, kutani nzi sina nzi mbhelele; kanilezi nzi tsimbeketa nziya mahlweni, lezaku kutani nzi ta zi khoma lezi nzi nga khomelwa zona hi Kristu Jesu. 1 Tim. 6:12; Maheb. 12:23

¹³ Vamakabye, a nzi wuli lezaku mina nzi zi khomile; kanilezi xilo xinwe nzi xi mahako, nzi rivala za lenzhako, nzi hlokolokela lezi zi nga mahlweni, Maheb. 6:1

¹⁴ nzi tsimbeketa mahlweni xiwindini nzi kala nzi ya kuma a nchachazelo wa kuvitanwa ku tlakukileko nzi nga vitanelwa kona hi Nungungulu ka Kristu Jesu. 2 Tim. 4:7, 8; Maheb. 3:1; 12:1

¹⁵ Hikwalaho ngha hina hontlhe hi mbheleleko hi hi ni kupima ka kunghaho. Kanilezi loku mu alakanya zinwani hi xilo xo kari, lexo kambe Nungungulu i ta xi vulula ka nwina. 1 Kor. 2:6; 14:20; Gal. 5:10

¹⁶ Kanilezi a hi fambeni hi lezi hi chikeleko ka zona.

¹⁷ Vamakabye, nzi ecanyiseni, mu cuwukisa lava va lanzako a xiwonelo lexi mu wonako ka hina. 1 Ped. 5:3

¹⁸ Hakuva nzi mu byelile kanyingi, makunu nza engeta nzi mu byela hi kurila, lezaku vanyingi va famba na va hi valala va xihambano xa Kristu.

¹⁹ A kugumelwa kabye hi kulova; a nungungulu wabye hi xingwengwe, va ti dzunza hi lezi zi nga tingana tabye, va khatalela a zilo za misava ntsena.

²⁰ Kanilezi hina a wusumbulwa ga hina gi le tilweni; ku nga leyo hi rinzelako Muhanyisi kuta ha kona, a nga Hosi Jesu Kristu. 1 Kor. 1:7; Kol. 3:1, 3; 1 Tes. 1:10; 2 Tim. 4:8; Tit. 2:13

²¹ Loyi a ta nga hunzula luswa a xiyimo xa miri wa hina wa kukoramiswa, kasi wu fanana ni miri wakwe wa kungangamela, hi ntamu lowu ha wona a zi kotako ku ti vekela zilo zontlhe lahasi kakwe. Isa. 63:1; Mat. 17:2; 1 Kor. 15:43; Efe. 1:19; Maheb. 7:25