Va le Filipi 2 - Tshwa Bible

Kristu i lo ti koramisa.

¹ Hikwalaho loku ku hi kona a kutangaliswa ka Kristu, loku ku hi kona a kuchavelelwa ka liranzo, loku ku hi kona a kutlhangana ka Moya, loku ku hi kona wuxinji ni ku zwela wusiwana. 2 Kor. 13:14

² tatisani a kutsaka ka mina hi ku alakanya xilo xinwe, na mu hi ni liranzo linwe, ni mbilu yinwe, mu xuva xilo xinwe; Joh. 3:29; 1 Ped. 3:8

³ mu nga mahi nchumu hi mubango ni kutikukumukisa, kanilezi ngha munwe ni munwani a ti koramisa a wula munwani aku i chukwana ku hunza yena. Jak. 3:14; 1 Ped. 5:5

⁴ Ngha munwe ni munwani a nga khataleli a zakwe ntsena, kanilezi a khatalela ni za vanwani. 1 Kor. 10:24

⁵ Ngha mu hi ni kupima loku a nga hi nako Kristu Jesu; Joh. 13:15

⁶ loyi, hambu lezi a nga hi xiyinweni xa Nungungulu, a nga alakanyangi lezaku a ku ecana ni Nungungulu xilo a faneleko ku namarela ka xona. Isa. 9:6; Joh. 1:1, 2; 2 Kor. 4:4; Kol. 1:15

⁷ Kanilezi i lo ti maha wa nyalidede, a teka xiyimo xa wunanza, ava loyi a fananako ni vanhu, Isa. 53:5, 11; Tis. 22:6; Dan. 9:26; Joh. 1:14; Gal. 4:4

⁸ na a kumilwe a hi ni tshamela ga munhu, i lo ti koramisa, a ingisa kala kufeni, ina, ni kufa ka xihambano. Maheb. 12:2

⁹ Hi kota ya lezo Nungungulu i lo mu tlakusa nguvu, a mu nyika vito gi nga hehla ka mavito wontihe; Isa. 52:13; Joh. 17:1; Maheb. 1:4

¹⁰ lezaku hi vito ga Jesu a madzolo ya vontlhe lava va nga le tilweni, ni laha misaveni, ni lahasi ka misava, ma ta mu khizamela, Isa. 45:23; Kuv. 5:13

¹¹ kasi a tirimi tontlhe ti fela ku wulela lezaku Jesu Kristu i Hosi, a dumiswa Nungungulu Dadani. Joh. 13:13

¹² Hilezoke, varanzekako va mina, khwatsi hi lezi mu ingisileko xontlhe xikhati, na ku nga hi loku nzi hi kona ka nwina ntsena, kanilezi nguvunguvu makunu loku nzi ngha nzi hi hava, tirelani a kuhanyiswa ka nwina hi kuchava ni kururumela.

¹³ Hakuva hi Nungungulu a vangako ka nwina a kuxuva ni kutira, hi kota ya wunene gakwe. Maheb. 13:21

¹⁴ Mahani zontlhe hi ku nga kalali ni kukanetisana;

¹⁵ kasi ma fela ku kala mu nga hi na kusoleka, mu basa, mu hi vanana va Nungungulu, lava va nga hiko na bala xikari ka xizukulwana xi gombonyekileko ni xi bihileko, lexi mu woningako xikari ka xona khwatsi hi kuwonekela laha misaveni,

¹⁶ na mu khomisile a mhaka ya wutomi. Zonake nzi tava ni nchumu wa ku ti kulisa ha wona sikwini ga Kristu, wo komba lezaku a nzi tsutsumangi mahala hambu ku tira mahala.

¹⁷ Hambu loku a nkhata wa mina wu lombelwa muphahlelweni laha ku mahiwako muphahlo wa kukholwa ka nwina, ni lezo kambe nzi ta tsaka na nwina nwentlhe.

¹⁸ Hizalezo tsakani na nwinawu, mu tsaka zinwe na mina.

Timote na Epafroditusi.

¹⁹ Kanilezi nza tsumba ka Hosi Jesu lezaku nzi ta hatla nzi mu rumela Timote, lezaku na minawu nzi fela ku tangaliswa loku nzi tiva hi matshamela ya nwina.

²⁰ Hakuva a nzi na munwani a nga ni mbilu yo kota yakwe, loyi a ta nga ti karata timhakeni ta nwina.

²¹ Hakuva vona vontlhe va ti lavela a za wutsumbu gabye, a va lavi za Jesu Kristu.

²² Kanilezi nwina ma ku tiva a kutsumbeka kakwe, lezaku i tirile zinwe na mina a ku fambisa ivangeli, khwatsi hi nʼwana a tirelako a raru wakwe.

²³ Nza tsumba lezaku nzi ta mu rumela hi xikhanzakanya xa lezi nzi ta nga wona lezaku a mhaka ya mina yi fambisa kuyini.

²⁴ Kanilezi nza tsumba ka Hosi lezaku na minawu nzi tata zalezi.

²⁵ Kanilezi nzi lo alakanya lezaku zi lavekile a kuva nzi ruma ka nwina Epafroditusi, a makabye wa mina ni xitiri-kulori ni sochwa-kulori, a nga xirunwa xa nwina xa ku nzi vuna kuvumaleni ka mina. 2 Kor. 8:23; 11:9; Xip. 4:18

²⁶ Hakuva wa xuva ku mu wona nwina nwentlhe; i lo karateka nguvu hilezi mu nga zwile lezaku i wa kari a babya.

²⁷ Kunene i wa babya a nghumbe ya mahati; kanilezi Nungungulu i lo mu mahela wuxinji, na ku nga hi ka yena yece, kanilezi ni ka mina kambe, kasi nzi nga engetelwi kuxaniseka hlomulweni wa mina.

²⁸ Hikwalaho nza xuva a ku mu rumela hi xihatla, lezaku kasi mu fela ku tsaka loku mu tlhela mu mu wona, kasi na minawu nza hehukelwa hlomulweni.

²⁹ Mu amukeleni Hosini hi kutsaka kontlhe; dzunzani a vanhu va kunghahi.

³⁰ Hakuva i wa hi kusuhani ni kufa hi kota ya ntiro wa Kristu, a nyikela wutomi gakwe mhangweni kasi ku ta nzi nyika lezi zi nga kiyela a ku nzi khozeleni ka nwina. 1 Kor. 16:17; Xip. 4:10