Va le Filipi 1 - Tshwa Bible

¹ Paule na Timote, a malanza ya Jesu Kristu, ha losa a vobasa ka Kristu Jesu, lava va nga le Filipi, zinwe ni varisi ni madikoni, hiku:

² A tipswalo ni kurula a zive na nwina na zi huma ka Nungungulu a Dadani wa hina ni Hosi Jesu Kristu,

³ Nza bonga Nungungulu wa mina xikhati xontlhe lexi nzi mu alakanyako ha xona. Kol. 1:3

⁴ Na nzi kari nzi mu khongelela nza mu kombelela nwentlhe hi kutsaka,

⁵ hi kota ya kuhlengela ka nwina ntirweni wa ku fambisa ivangeli kusukela a siku go ranga kala ni lezi. 2 Kor. 8:1

⁶ Nza tsumba lezaku loyi a nga sangulisa a ntiro wo saseka ka nwina, i ta wu mbhelelisa ka kala sikwini ga Jesu Kristu. Joh. 6:29

⁷ Nzi fanele a kuva nzi alakanya lezo ha nwina nwentlhe, hakuva nzi na nwina mbilwini ya mina; hakuva hambu lomu makhotsweni ya mina, kutani loku nzi yima nzi vikela ivangeli ni ku yi tiyisa, nwina nwentlhe mu vahlengeli va tipswalo zinwe na mina. Efe. 3:1; 6:20; Xip. 4:14; Kol. 4:3; 2 Tim. 1:8

⁸ Hakuva Nungungulu hi kustumunyu wa mina, lezaku nwina nza xuva ku mu wona hi liranzo la Kristu Jesu.

⁹ Nzi kombela lezaku a liranzo la nwina li fela ku anziswa nguvunguvu a kutiveni ni kupimeni kontlhe, File. 6

¹⁰ kasi mu fela ku hlawula lezi zi nga zi nene, lezaku mu fela kuva mu basile, mu nga hi na kusoleka kala sikwini ga Kristu; Miti. 24:16; Rom. 12:2

¹¹ na mu tele hi mihanzu ya kululama leyi yi tako ha Jesu Kristu, a ka wudumo ni wudzunzo ga Nungungulu. Joh. 15:4

Ka mina ku hanya hi Kristu.

¹² Vamakabye, nza ranza a kuva mu zi tiva, lezaku a zilo lezi zi nga nzi humelela zi vunile nguvu ku fambisa a ivangeli.

¹³ Zi wonekile ziku dlunya ka vanyakasani vontlhe va hosi ni ka vontlhe vanwani lezaku mina nzi bohilwe hi kota ya Kristu. Xip. 4:22

¹⁴ A linyingi la vamakabye le Hosini va tiyilehlana hi kota ya ziboho za mina, va tiyisa nguvu a ku kanela a mhaka ya Nungungulu na va nga chavi nchumu.

¹⁵ Hakunene a vanwani va kanela Kristu hi wukhuxu ni kukanetana; kanilezi vanwani va kanela hi kuranza ku nene. Xip. 2:3

¹⁶ Va zi maha hi liranzo, na va tiva lezaku nzi yimiselwe ku vikela ivangeli;

¹⁷ kanilezi a vanwani vaba hungu ha Kristu hi mubango, na ku nga hi timbilu ti nene, va alakanya lezaku va nzi vuxela kuxaniseka makhotsweni ya mina.

¹⁸ Zi na yini xana? Loku ku biwa hungu hi Kristu, hambu ku mahiwa hi kukanganyisa, kutani hi timbilu ti nene, mina nza tsaka ha kona, futsi nza ha ta tsaka.

¹⁹ Hakuva nza zi tiva lezaku lezi zi ta nzi vangela kuhanyiswa, hi kota ya mikhongelo ya nwina, hi ku vuna ka Moya wa Jesu Kristu, Rom. 8:9; 2 Kor. 1:11

²⁰ hi kulangutela ni kutsumba ka mina lezaku nzi nga ta chelwa tingana ha nchumu, kanilezi Kristu i ta dumisiwa mirini wa mina hi kutiya kontlhe, makunu khwatsi hi zikhati za kale, kutani hi kuhanya, kutani hi kufa. Rom. 5:5

²¹ Hakuva ka mina, a ku hanya hi Kristu, ni kufa hi kubhinzula.

²² Kanilezi a ku hanya lomu nyameni, loku ku humesa mihanzu ntirweni wa mina, xana nzi ta hlawula yini? A nzi zi koti ku mu byela.

²³ Hakuva nzi kokiwa hi matlhelo mambiri; nzi navela ku suka nzi ya tshama na Kristu, hakuva zi sasekile nguvu; 2 Kor. 5:8; 2 Tim. 4:6

²⁴ kanilezi a ku tshama nyameni za laveka hi kota ya nwina.

²⁵ Na nzi nga hi na kukanakana mhakeni leyi, nza zi tiva lezaku nzi ta simama, nzi tshama na nwina nwentlhe, kasi maya mahlweni muva ni kutsaka kukholweni;

²⁶ lezaku a kutidzunza ka nwina ku fela ku enzeleka ka Kristu Jesu ha mina, hi kota ya kuva kona ka mina zinwe na nwina kambe.

²⁷ Ntsena ngha na mahanyela ya nwina ma fanela a ivangeli ya Kristu; lezaku hambu nzita nzi ta mu wona, hambu nzi ngati, nzi fela kuzwa timhaka ta nwina lezaku mu yimile muku nde moyeni munwe, na mu lwela a kukholwa ka ivangeli hi mbilu yinwe,

²⁸ na mu nga dzukiswi ha nchumu hi valala. A kutiya ka nwina xikombiso ka vona xa kulobyiswa kabye, kanilezi ka nwina xi tava xa kuhanyiswa ka nwina, ni lexi xita hi ka Nungungulu. Isa. 41:10; Mat. 10:28; Rom. 8:17; Maheb. 13:5

²⁹ Hakuva hi kota ya Kristu mu nyikilwe a thomo a kuva mu kholwa, na ku nga hi lezi ntsena, kanilezi mu nyikilwe a thomo ga ku xaniseka hi kota va vena. Miti. 5:41; Rom. 5:3; Efe. 2:8

³⁰ Hakuva mu na ni kulwa kwaloku mu nga nzi wona nzi hi nako, mazwa ni lezi lezaku ku kona ka mina. Miti. 16:19; Kol. 2:1; 1 Tes. 2:2