Titusi 2 - Tshwa Bible

A gonzo yi nene.

¹ Kanilezi wena kanela lezi zi faneleko a gonzo yi nene: 1 Tim. 6:3

² lezaku a vavanuna va kale va ti khoma, vave lava va dzunzekako, lava va tlharihileko, va hi ni kukholwa ku nene, ni liranzo, ni kutimisela.

³ Hizalezo ni vavasati va kale a vave ni matshamela ma khesekako, na va nga hi na mahlevo, va nga ti nyikeliko kunweni ka byala; kanilezi va gonzisa lezi za zinene; 1 Ped. 3:3, 4

⁴ lezaku va gonzisa a timbelekana a ku ranza vanuna vabye ni vana vabye,

⁵ vava va tlharihileko, va basileko, va ti tshamela makaya, va hi va nene, va ingisa a vanuna vabye, kasi a mhaka ya Nungungulu yi nga soliwi. Kol. 3:18

⁶ Hizalezo ni majaha, ma luleke a kuva ma ti khoma;

⁷ Uva xiwonelo xa mitiro yontlhe yo saseka; a kugonziseni ka wena u kombisa a kubasa ni kudzunzeka, Efe. 6:24; 1 Ped. 3:1, 5; 5:3

⁸ Ngha u nga soleki kuwulawuleni ka wena, kasi loyi a kanetako a fela ku koyo tingana, hi kuva a nga hi na zo biha a ku wula ha hina. Neh. 5:9; 1 Tim. 6:3

⁹ Luleka a malanza lezaku ma ingisa a venyi va wona, ma va tsakisa timhakeni tontlhe, ma nga va kaneti;

¹⁰ va nga yivi nchumu, kanilezi va tsumbeka; kasi zilweni zontlhe va fela ku bombisa a gonzo ya Nungungulu a Muhanyisi wa hina.

¹¹ Hakuva a tipswalo ta Nungungulu ti wonekile, ti neha kuhanyiswa ka vanhu vontlhe, Joh. 1:9; 1 Tim. 2:4

¹² ti hi gonzisa ku tsika lezi zi nga lulamangiko ni kunavela ka misava, hi hanya ka nguva leyi hi kutikhoma ni kululama hi chava Nungungulu; Lu. 1:75

¹³ na hi cuwukela a kutsumba ka hina ku bongekako ku nga kuwoneka ka kungangamela ka Nungungulu wa hina wa hombe tlhelo Muhanyisi wa hina Kristu Jesu. Miti. 24:15

¹⁴ loyi a nga ti nyikela hi kota ya hina, kasi a fela ku hi tirula kubiheni kontlhe, a ti basisela a vanhu lava va ta ngava vakwe, va pinyamileko mitirweni yo saseka. Ekso. 15:16; Deut. 7:6; 14:2; Maheb. 9:14

¹⁵ Kanela timhaka leti, u luleka ni ku kawuka hi ntamu wontihe. Ngha a nga hi kona loyi a ku kanyisako.