Tisimu 89 - Tshwa Bible

A xivumelwano ni loyi a hlawulilweko.

Maxili ya Etani wa le muEzra.

¹ Nzi ta yimbelela a wunene ga Jehova kala kupinzuka, A nomu wa mina wu ta tlhatlhambutela a kutsumbeka ka wena titangeni tontlhe.

² Hakuva nzi te ngalo: A wuxinji ga wena gi ta akiwa kala kupinzuka, U tiyisile a kutsumbeka ka wena le matilweni.

³ Nzi mahile a xivumelwano ni a hlawulilweko wa mina, Nzi hlambanyile ka Davida a nanza ga mina,

⁴ Nziku: Nzi ta tiyisa a pswalo wa wena kala kupinzuka, Nzi ta yimisa a xitshamu xa wena xa wuhosi ka zontlhe zizukulwana. (Sela.) 2 Sam. 7:12; Isa. 55:3; Lu. 1:32

⁵ A matilo ma dumisa a zihlamaliso za wena, Jehova, Ni kutsumbeka ka wena hlengeletanweni wa vakubasa. Isa. 6:3; Efe. 3:10; Kuv. 4:8

⁶ Hakuva himani le tilweni a nga ecanyiswako na Jehova? Himani xikari ka vana va Nungungulu a fananako na Jehova?

⁷ Nungungulu wa chaveka hlengeletanweni wa vakubasa, A chabyiwa ku hunza vontlhe lava va mu ranzeleko.

⁸ Jehova, Nungungulu wa tiyimpi, Himani a nga ni ntamu wo fanana ni wa wena, Jehova; A kutsumbeka ka wena ku ku ranzele.

⁹ U fumela a kutikukumuxa ka bimbi, Loku a mabyandlati ya gona ma vindluka, wa ma rutisa.

¹⁰ Wena u pswandlasile Rahabe, khwatsi hi munhu a tlhabyilweko, U hangalasile a valala va wena hi woko ga wena ga ntamu.

¹¹ A tilo ni misava za wena, U vangile misava ni zilo zontlhe zi nga ka yona.

¹² U lo yimisa Nwalungu ni Dzonga, Tabori na Hermoni va tsaka vitweni ga wena.

¹³ U na ni woko gi tiyileko, A canja ga wena gi na ni ntamu; A canja ga wena ga xinene gi tlakukile.

¹⁴ A kululama ni nongameto ziseketelo za xitshamu xa wena xa wuhosi, A wuxinji ni zinene zi le nghoheni ya wena.

¹⁵ Gi katekile a tiko legi gi tivako a guwa ga litsako. Gi famba kuwonekeleni ka nghohe ya wena, Jehova. Mitse. 23:21

¹⁶ Masiku wontihe va tsaka vitweni ga wena, Va kuliswa kululameni ka wena.

¹⁷ Hakuva wena u wumbhuri ga ntamu wabye, Hi wuxinji ga wena u tlakusa a limhonzo la hina.

¹⁸ Hakuva a xitlhangu xa hina xi lumba Jehova, A hosi ya hina nja Wakubasa wa Israeli.

¹⁹ A kale u wulawulile hi muwoniso ka vakubasa va wena, Uku: Nzi vekile kuvuna mandleni ya nhenha, Nzi kulisile a jaha gi hlawulilweko xikari ka vanhu. 2 Sam. 7:4; 1 Kro. 17:4

²⁰ Nzi kumile Davida a nanza ga mina, Nzi mu totile hi mafura ya mina ya kubasa. 1 Sam. 16:13; Miti. 13:22

²¹ Nzi ta mu akisa hi canja ga mina, A woko ga mina gi ta mu tiyisa.

²² A nala a nga ta mu mahela xijumani, Ni nʼwana wa kubiha a nga ta mu xanisa.

²³ Mina nzi taba a valala vakwe mahlweni kakwe, Nzi ta tsayisa lava va mu vengako.

²⁴ Kanilezi a kutsumbeka ka mina ni wuxinji ga mina zi tava naye, A limhonzo lakwe li ta tlakuswa vitweni ga mina.

²⁵ Nzi ta yimisa canja gakwe kala bimbini, Ni canja gakwe ga xinene hehla ka micongo.

²⁶ I ta nzi vitana, aku: Wena u dadani wa mina, Nungungulu wa mina, a ribye ga kuhanyiswa ka mina. 2 Sam. 7:14; 1 Kro. 17:13; Maheb. 1:5

²⁷ Futsi, nzi ta mu maha matewula ya mina, Nzi mu maha wahombe xikari ka tihosi ta misava.

²⁸ Nzi ta mu hlayisela a wuxinji ga mina kala kupinzuka, A xivumelwano xa mina na yena xi ta tiya.

²⁹ Nzi ta maha lixaka lakwe li simamisa kala kupinzuka, Ni xitshamu xakwe xa wuhosi khwatsi hi masiku ya tilo.

³⁰ Loku a vana vakwe va tsika a nawo wa mina, Va nga fambi zilayelweni za mina,

³¹ Loku va hambunyeta ziyimiso za mina, Va nga hlayisi a milayo ya mina,

³² Nzi taba a zihambunyeto zabye hi nhonga, Nziba xigoho xabye hi limhika.

³³ Ahembaloko, nzi nga ta susa kakwe a wuxinji ga mina, A kutsumbeka ka mina ku nga ta hluleka.

³⁴ Nzi nga ta tshova a xivumelwano xa mina, Hambu ku hunzula a mhaka yi humileko nonwini wa mina. Mitse. 23:19

³⁵ Nzi hlambanyile kanwe hi kubasa ka mina, A nzi na ku hemba ka Davida.

³⁶ A mbewu yakwe yi ta simamisa kala kupinzuka, Ni xitshamu xakwe xa wuhosi xi ta simamisa mahlweni ka mina khwatsi i gambo. Joh. 12:34

³⁷ Xi ta tiya kala kupinzuka khwatsi hi hweti, A mboni ya le tilweni yi tsumbekile. (Sela.) Joba 16:19; Jer. 33:20

³⁸ Kanilezi makunu u hoxile a totilweko wa wena, U mu tsikile, u mu zangarela.

³⁹ U tsikile a xivumelwano lexi u nga xi maha ni nanza ga wena, U nyenyezisile a xidlodlo xakwe, u xi hoxa lahasi.

⁴⁰ U hohlomele a lihlavu lakwe lontlhe, A makhokhola yakwe u ma mahile marumbi.

⁴¹ Vontlhe vahunzi va mu phanga, I mahile xiruko ka vaakelwane vakwe.

⁴² U tlakusile a canja ga xinene ga valala vakwe, U tsakisile a valala vakwe vontlhe.

⁴³ U vinyile a wukari ga supado yakwe, A ku mu tiyisangi kulweni.

⁴⁴ U mahile a wudumo gakwe gi khawula, U hoxile lahasi a xitshamu xakwe xa wuhosi.

⁴⁵ U komisile a masiku ya wuswa gakwe, U mu fenengetile hi tingana. (Sela.)

⁴⁶ Jehova, ku ta kuva kala rini, U ta ti fihla kala kupinzuka ke? Kala rini a zanga ya wena na ya ha vura kota nzilo ke?

⁴⁷ Alakanya lezaku a xikhati xa mina xi komile, Lezaku vontlhe lava u va vangileko va hatla ku hunza.

⁴⁸ Himani loyi a hanyako, loyi a to kala a nga woni kufa ke? Himani a nga tlhatlhisako muhefemulo wakwe hi le Xeole ke? (Sela.)

⁴⁹ Jehova, gi kwihi a wunene ga wena ga kale, Legi u nga hlambanyela Davida hi kutsumbeka ka wena ke?

⁵⁰ Jehova, alakanya a kurukatelwa ka malanza ya wena; Nzi rwele xifuveni xa mina a xiruko xa matiko manyingi.

⁵¹ Jehova, alakanya a kutseketsela ka valala va wena, Lezaku va tseketselisa kuyini a mabatha ya mikonzo ya a totilweko wa wena.

⁵² A khesiwe Jehova kala kupinzuka, Amen ni Amen!