Tisimu 88 - Tshwa Bible

A kubayiseka ka hombe.

Lisimu la vana va Kora, ka muchuli hehla ka Mahalate Leanote, Maxili ya Hemani wa le MuEzra.

¹ Jehova, Nungungulu wa kuhanyiswa ka mina, Nza rila mumu ni wusiku mahlweni ka wena.

² A mukombelo wa mina ngha wu chikela mahlweni ka wena, Ingisa a kurila ka mina.

³ A muhefemulo wa mina wu kolwile hi zikarato, Ni wutomi ga mina gi kusuhi ni Xeole.

⁴ Nzi hlayiwa zinwe ni lava va releleko nkeleni, Nzi fanana ni munhu loyi a mbhelileko ntamu.

⁵ Nzi siyilwe xikari ka vafileko, Khwatsi hi lava va delweko va etleleko nkeleni, Lava wena u nga ha va alakanyiko, Va susilweko canjeni ga wena.

⁶ U nzi hoxile lomu kueteni ka nkele, Lomu lieswileni la munyama.

⁷ A zanga ya wena ya nzi tikela, Nzi hlokiswa hi mabyandlati ya wena wontihe. (Sela.)

⁸ U nzi ahlukanisile kule ni vanghana va mina, U nzi maha xinyenyeko mahlweni kabye; Nzi valelwe ku kota peresu, a nzi zi koti ku huma.

⁹ A mahlo ya mina ma wonza hi kota ya hlokiselelo; Jehova, nza ku khongela wontihe masiku; Nza ku nawulutela mawoko ya mina.

¹⁰ U ta mahela a vafi a zihlamaliso za wena ke? A vafileko va ta vuka va ku dumisa ke? (Sela.)

¹¹ Xana va ta hlawutela hi wunene ga wena lomu nkeleni ke? Kutani a kutsumbeka ka wena lomu kulobyisweni ke?

¹² A zirewukiso za wena za tibyiwa lomu munyameni ke? Ni kululama ka wena lomu tikweni ga kurivala ke?

¹³ Kanilezi nza rila ka wena, Jehova, A mukombelo wa mina wu ta ku khinga laha mixweni.

¹⁴ Jehova, u nzi cukumetela yini, Hikuyini u nzi fihlelako a nghohe ya wena ke?

¹⁵ Nza xaniseka kusukela wusweni, na nzi lava kufa, Nza dzukiswa hi kuchavisa ka wena kasi nzi rereka.

¹⁶ A zanga ya wena yi chavisako yi nzi wele, A kuchavisa ka wena ku nzi lobyisile.

¹⁷ Ku nzi ranzele khwatsi i mati gontlhe siku, Ku nzi renzelekele wontihe matlhelo.

¹⁸ U nzi ahlukanisile kule ni munghana wa mina ni xaka ga mina, Nzi sele ni munyama ntsena. Joba 17:13