Tisimu 83 - Tshwa Bible

A mukombelo wa ku kuma xivuno.

Lisimu la Asafa.

¹ Nungungulu, u nga miyeli, U nga rutisi, Nungungulu, u nga su tiwitiwi bhi!

² Hakuva a valala va wena va maha guwa, Ni lava va ku vengako va tlakusa hloko.

³ Va maha gujeguje go vukela a vanhu va wena, Va tsema xikungo xo vukela lava u va lonzowotako.

⁴ Vaku ngalo: Ngonani hi ta va lovisa va nga have tiko, Kasi a vito ga Israeli gi nga ha alakanyiwi.

⁵ Va bohile xikungo hi mbilu yinwe, Va vumelene kasi ku ku vukela:

⁶ A va matenda ya Edome ni vaIxmaeli, A vaMoabi ni vaHagari;

⁷ Gebali na Amoni, na Amaleki, A maFilistia ni vaaki va le Tire,

⁸ Assiria kambe i tlhangene navo, Va ya vuna a vana va Loti. (Sela.) Gen. 19:37

⁹ Maha kabye kota lezi u nga mahisa zona ka vaMidiani, Ni ka Sisera, ni ka Jabini le congwaneni wa Kixoni; Vala. 4:7; 7:22

¹⁰ Lava va nga lobyiswa le Endor, Va mahile koho wa misava.

¹¹ Maha tihosana tabye tiku khwatsi hi Orebi na Zeebi, Ni tihosana tabye tontlhe tiku khwatsi hi Zeba na Zalmunna. Vala. 7:25; 8:12, 21

¹² Hakuva ve ngalo; A hi tekeni a tindlu ta Nungungulu.

¹³ Nungungulu wa mina, va mahe va fanana ni tsutsungwani wa xihuhuri, Ni mungu wu kukuletwako hi mheho. Joba 21:18; Isa. 17:13

¹⁴ Kukotisa a nzilo wu hisako khwati, Ni khwatsi hi nhova yi swako zitsungeni,

¹⁵ Va hlongolisise lezo hi bhubhutsa ga wena, U va chavisa hi xingulu xa wena.

¹⁶ Chela tingana tinghoheni tabye, Kasi va lava a vito ga wena, Jehova.

¹⁷ Ngha va kanganyiseka, va karateka kala kupinzuka, Ina, a va wise tingana va lova.

¹⁸ Kasi va fela ku tiva lezaku hi wena wece u nga ni vito ga Jehova, Loyi a Hunzeleleko Kutlakuka misaveni yontlhe.