Tisimu 46 - Tshwa Bible

Nungungulu wuchavelo ga hina.

Ka muchuli wa vana va Kora. Lisimu la Alamote.

¹ Nungungulu wuchavelo ga hina ni ntamu, Kuvunetela ku nga kona kusuhani xikhatini xa zikarato.

² Hi kota ya lezo hi nga ta chava hambu loku misava yi hunzulwa, Ni loku zitsunga zi ninginiswa giwa bimbini.

³ Hambu loku mati ya gona ma go bhoza ma vindlukiswa, Ni loku a zitsunga zi tsekatseka hi kukumuka ka wona. (Sela.)

⁴ Wu kona a congo lowu a mati ya wona ma nengelisako a muti wa Nungungulu, A wuakelo go basa ga Loyi a Hunzeleleko Kutlakuka.

⁵ Nungungulu i kona xikari ka wona, a wu tsekatsekiswi, Nungungulu i ta wu vunetela laha mavingwini ya wuca.

⁶ A matiko ma maha pfilupfilu, ni mifumo yi tsekatsekiswa, I lo zwata gezu gakwe, misava yi nyeka.

⁷ Jehova wa tiyimpi i na hina, Nungungulu wa Jakobe wuchavelo ga hina. (Sela.) Rom. 8:31

⁸ Tanani, mu wona mitiro ya Jehova, A zihangalaso lezi a zi mahileko misaveni.

⁹ Yena i maha a tiyimpi ti khawula kala magumelweni ya misava, Wa tshova wura, ni ku tsema tlhari gi pulakanyeka; A hisa tikareta nzilweni.

¹⁰ Yimani, mu tiva lezaku mina nzi Nungungulu; Nzi ta tlakuswa xikari ka matiko, nzi ta tlakuswa misaveni. Isa. 30:15

¹¹ Jehova wa tiyimpi i na hina, Nungungulu wa Jakobe wuchavelo ga hina. (Sela.)