Tisimu 145 - Tshwa Bible

Jehova ngwa hombe ni wa tipswalo.

Lisimu la Davida la kudumisa.

¹ Nungungulu wa mina, nzi ta ku dumisa, Hosi; Nzi ta khesa vito ga wena kala kupinzuka.

² Wontihe masiku nzi ta ku khesa, Nzi ta dumisa a vito ga wena kala kupinzuka.

³ Jehova ngwa hombe, i fanekelwe hi kudumiswa, A wukulu gakwe a gi na ku pimiwa.

⁴ A xizukulwana xi ta hlawutela mitiro ya wena ka xinwani, Xi ta khesa a mitiro ya wena ya hombe. Deut. 4:10

⁵ Nzi ta ehleketa hi wukulu ga wudzunzo ga wena, Ni mitiro ya wena yi hlamalisako.

⁶ A vanhu va ta wulawula hi ntamu wa mitiro ya wena yi chavisekako, Mina nzi ta tlhatlhambutela hi wukulu ga wena.

⁷ Va ta hangalasa a, wudumo ga wunene ga wena ga hombe, Va ta yimbelela hi kululama ka wena.

⁸ Jehova i na ni tipswalo, i tele hi wuxinji, Wa nonoka ku zangara, i na ni wunene ga hombe. Ekso. 34:6; Joeli 2:13; Jona 4:2

⁹ Jehova i nene ka vontlhe, I hawukela mitiro yakwe yontlhe.

¹⁰ Jehova, a mitiro ya wena yontlhe yi ta ku bonga, A vabasileko va wena va ta ku khesa.

¹¹ Va ta wulawula hi wukulu ga mufumu wa wena, Vaba hungu hi ntamu wa wena,

¹² Kasi va tivisa ka vana va vanhu a mitiro ya wena ya hombe, A wukulu ga wudzunzo ga mufumu wa wena.

¹³ A mufumu wa wena ngwa kala kupinzuka, Ni wuhosi ga wena gi simama zizukulwaneni zontlhe. Dan. 4:3; 4:34; 6:26; 7:14

¹⁴ Jehova wa seketela vontlhe lava va khunguvanyekako, A olola lava va koramisilweko.

¹⁵ A mahlo ya zontlhe zivangwa ma cuwukele wena, U zi nyika kuga ka zona hi xikhati xa kona.

¹⁶ U vulula canja ga wena, U xurisa zontlhe lezi zi hanyako. Miti. 14:17

¹⁷ Jehova i lulamile tindleleni takwe tontlhe, I na ni tipswalo mitirweni yakwe yontlhe.

¹⁸ Jehova i kusuhi ni vontlhe lava va mu khongelako, Lava va mu vitanako hi zinene.

¹⁹ Lava va mu chavako va nyikwa lezi va zi ranzako, I tazwa kurila kabye, a va ponisa.

²⁰ Jehova wa lonzowota vontlhe lava va mu ranzako, Kanilezi i ta lovisa vontlhe vakubiha.

²¹ A nomu wa mina wu ta tshawutela kudumisa ka Jehova, A zivangwa zontlhe ngha zi khesa a vito gakwe gi basileko kala kupinzuka.