Tisimu 118 - Tshwa Bible

Lisimu la kubonga sikwini ga ximuse.

¹ Bongani Jehova, hakuva i nene, Hakuva wuxinji gakwe gi simamisa kala kupinzuka.

² Ngha Israeli a wula aku: A wuxinji gakwe gi simamisa kala kupinzuka.

³ Ngha yindlu ya Aroni yi wula, yiku: A wuxinji gakwe gi simamisa kala kupinzuka.

⁴ Lava va chavako Jehova ngha va wula, vaku: A wuxinji gakwe gi simamisa kala kupinzuka.

⁵ Mhangweni ya mina nzi lo khongela Jehova, Jehova i lo nzi hlamula, a nzi veka wutshanwini gi anamileko.

⁶ Jehova i nzi yimela, nzi nga ta chava nchumu; Xana munhu a nga nzi mahela yini? Rom. 8:31; Maheb. 13:6

⁷ Jehova i zinwe na mina ni lava va nzi vunako, Hikwalaho nzi tava ni zigingi ha vona lava va nzi vengako.

⁸ Zi sasekile ku tsutsumela Jehova, Ku hunza ku tsumba vanhu.

⁹ Ku sasekile ku tsutsumela Jehova, Ku hunza ku tsumba tihosana.

¹⁰ A mifumo yontlhe yi nzi ranzele, Kanilezi nzi ta yi lovisa vitweni ga Jehova.

¹¹ Yona yi nzi ranzele, futsi yi nzi ranzele; Nzi ta yi lovisa vitweni ga Jehova.

¹² Yi nzi pomele khwatsi tinyoxi, Yi ta timeka khwatsi i nzilo wa mizwa; Nzi ta yi lovisa vitweni ga Jehova.

¹³ Nzi wa susumetilwe hi ntamu kasi nza fela kuwa, Kanilezi Jehova i lo nzi vuna.

¹⁴ Jehova hi ntamu wa mina ni lisimu la mina, Hi yena kuhanyiswa ka mina. Ekso. 15:2; Isa. 12:2

¹⁵ A gezu ga ku hlalela a kuhanyiswa Gi zwala matendeni ya vakululama: A canja ga xinene ga Jehova gi tira hi ntamu.

¹⁶ A canja ga xinene ga Jehova ga hlula, A canja ga xinene ga Jehova gi tira hi ntamu.

¹⁷ Nzi nga tafa, nzi ta hanya, Nzi tlhatlhambutela mitiro ya Jehova. Rom. 6:8

¹⁸ Jehova i nzi tsayisile, Kanilezi a nga nzi nyikelangi kufeni.

¹⁹ Nzi vululeleni a tinyangwa ta kululama, Nzi ta enghena ha tona nzi dumisa Jehova.

²⁰ A nyangwa ya Jehova hi leyi, A vakululama va ta enghena ha yona.

²¹ Nza ku bonga hakuva u nzi zwile, U nzi hanyisa.

²² A ribye legi gi nga aliwa hi vaaki, Gi mahile a hloko ya magumo. Isa. 28:16; Mat. 21:42; 1 Ped. 2:4

²³ Lexi xi mahilwe hi Jehova, Xa hlamalisa mahlweni ya hina.

²⁴ Legi hi gona siku gi nga mahiwa hi Jehova, A hi tsakeni, hi nengela ha gona.

²⁵ Jehova, hanyisa makunu, ha ku khongela, Jehova, hi katekise, ha ku kombela.

²⁶ A khesiwe yena loyi a tako vitweni ga Jehova, Ha mu katekisa na hi lomu ndlwini ya Jehova. Mat. 21:9; Mar. 11:9; Joh. 12:13

²⁷ Jehova hi Nungungulu, loyi a nga hiha kuwonekela, Bohani a xihari xa muphahlo hi tingoti, Mu xi yisa timhonzweni ta alati.

²⁸ Wena u Nungungulu wa mina, nzi ta ku bonga; Wena u Nungungulu wa mina, nzi ta ku kulisa.

²⁹ Bongani Jehova, hakuva i nene, Hakuva a wuxinji gakwe gi simamisa kala kupinzuka.