Tisimu 115 - Tshwa Bible

A wudzunzo a give ka Jehova yece.

¹ U nga dzunzi hina, Jehova, u nga dzunzi hina, Kanilezi dzunza a vito ga wena, Hi kota ya wuxinji ga wena ni zinene za wena.

² Hi yini a matiko ma wulako, maku: I kwihi makunu Nungungulu wabye ke?

³ Nungungulu wa hina i le tilweni, Wa maha ni zihi a zi ranzako.

⁴ A zifananiso zabye i siliva ni nzalama, A mitiro ya mandla ya vanhu. Isa. 44:9

⁵ Zi na ni milomu, kanilezi a zi wulawuli, Ni mahlo zi nawo, kanilezi a zi woni.

⁶ Zi na ni tindleve, kanilezi a zi ingisi; Zi na ni tinhovu, kanilezi a zi nuheti;

⁷ Zi na ni mandla, kanilezi a zi weleli nchumu; Ni mikonzo zi nayo, kanilezi a zi fambi; A zi wulawuli hi minkolo ya zona.

⁸ Lava va zi mahako va ta fanana na zona; Ni vontlhe lava va zi tsumbako.

⁹ Nwina va ka Israeli, tsumbani Jehova, Hi yena muvuni wabye ni xitlhangu xabye.

¹⁰ Nwina yindlu ya ka Aroni, tsumbani Jehova, Hi yena muvuni wabye ni xitlhangu xabye.

¹¹ Nwina lava mu chavako Jehova, tsumbani Jehova, Hi yena muvuni wabye ni xitlhangu xabye.

¹² Jehova i hi alakanyile, i ta katekisa, Yena i ta katekisa a yindlu ya Israeli, I ta katekisa a yindlu ya Aroni.

¹³ Yena i ta katekisa lava va chavako Jehova, Vontlhe vatsongwani ni vahombe.

¹⁴ Jehova a mu enzelekise kambe ni kambe, Nwina ni vanana va nwina. Deut. 1:11

¹⁵ Nwina mu katekisilwe hi Jehova, Loyi a mahileko a tilo ni misava. Mat. 25:34

¹⁶ A matilo nja Jehova, Kanilezi a misava i yi nyikile ka vanana va vanhu.

¹⁷ A vafileko a va dumisi Jehova, Hambu ni lava va relelako kumiyeleni.

¹⁸ Kanilezi hina hi ta dumisa Jehova, Ku sukela xikhati lexi kala kupinzuka. Dumisani Jehova!