Tisimu 104 - Tshwa Bible

Lisimu lo dumisa muvangi wa misava.

¹ Khesa Jehova, muhefemulo wa mina! Jehova, Nungungulu wa mina, u wa hombe nguvu; U ambele wukosi ni kungangamela.

² U ambele kuwonekela kukotisa nguwo, U andlala matilo kukotisa a tenda. Gen. 1:1; Isa. 40:22

³ U aka a tiyindlu ta wena matini ya le hehla, U maha kareta ya wena hi marefu; U famba tipapeni ta mheho.

⁴ U maha timheho tiva zirunwa za wena, Malangavi ya nzilo hi malanza ya wena.

⁵ V yimisile misava ziseketelweni za yona, Yi nga tsekatseki kala kupinzuka.

⁶ U yi fenengetile hi kueta ka bimbi khwatsi hi nguwo, A mati ma wa yima hehla ka zitsunga.

⁷ Kanilezi hi ku ma kawuka ka wena ma lo tsutsuma, Hi kudzinza ka gezu ga wena ma lo hatlisa mapswa.

⁸ A zitsunga zi lo tlakuka, ni minkova yi relela, A matshanwini lawa u zi yimiseleko.

⁹ U vekile a mbhingano lezaku a mati ma nga wu hunzi, Ma nga tlheli ma fenengeta misava. Joba 38:10; Mav. 8:29; Jer. 5:22

¹⁰ U lo velisa zibuka lomu minkoveni, A mati ya zona ma khulunga xikari ka zitsunga.

¹¹ Zi nwisa zontlhe zihari za nkova, Ni timbongola ta khwati ti tima a tora ga tona.

¹² A tinyanyani ta tilo ti akela zisaka kusuhani ka zona, Ti yimba maravini ya tisinya.

¹³ U tsakamisa zitsunga hi lomu ndlwini ya wena, A misava yi xura hi mihanzu ya mitiro ya wena.

¹⁴ U milisela tihomu a byanyi, Ni matsawu ya ku vuna munhu; Kasi a humesa zakuga hi lomu misaveni,

¹⁵ Ni vinya legi gi tsakisako a mbilu ya munhu, Ni mafura yo nyukisa a nghohe yakwe, Ni xibaba lexi xi tiyisako a mbilu ya munhu. Vala. 9:13

¹⁶ A tisinya ta Jehova ti xurile, A tisedare ta Lebanoni leti a nga ti byala;

¹⁷ Lomu a tinyanyani ti akako kona zisaka, A sekwa yi aka yindlu lomu tisinyeni ta misululwani.

¹⁸ A zitsunga zi tlakukileko wuchavelo ga timbuti ta khwati, Ni maribye mbuchavelo ga mivundla.

¹⁹ U yimisile a hweti ku avanyisa tinguva, Ni gambo ga tiva a kupeta ka gona.

²⁰ U neha munyama, kuva wusiku, Laha a zivanza za khwati zi fambafambako,

²¹ A tinghalana ti dzumadzumela a pfimba wa tona, Ti lava kuga ka tona hi ka Nungungulu. Joba 33:1

²² A gambo gi tsuwuka, ti ti fambela, Ti etlela tinzawini ta tona.

²³ A munhu a huma, aya ntirweni wakwe, A tira kala gambyeni.

²⁴ Jehova, yi talisile kuyini a mitiro ya wena! U yi mahile yontlhe hi wutlhari; A misava yi tele hi zivangwa za wena.

²⁵ Ni lomu bimbini ga hombe go anama, Ku tele hi zivangwa za tsanza vahlayi; A zihari za hombe ni zi tsongwani.

²⁶ A mataru ma famba kona, Lomu ku na ni Leviatani leyi u yi mahileko lezaku yi ti hlakanela kona. Joba 40:10, 20

²⁷ Zontlhe lezo zi langutela wena, Lezaku u zi nyika kuga ka zona hi xikhati xa kona.

²⁸ Loku u zi nyika, za wungeletela, U vulula canja ga wena, zi xura hi malongo. Mat. 6:26

²⁹ Zi karateka loku u fihla a nghohe ya wena, Loku u susa moya wa zona, zafa, Zi tlhelela tshurini.

³⁰ Zi vangiwa loku u rumela a moya wa wena, U sasekisa a nghohe ya misava yiva yiswa.

³¹ A wukulu ga Jehova a gi simamise kala kupinzuka, Ngha Jehova a tsakela mitiro yakwe,

³² I cuwuka misava, yi rurumela, A khumba zitsunga, zi huma musi.

³³ Nzi ta yimbelela ka Jehova na nza ha hanya, Nzi dumisa Nungungulu wa mina loku nza hi kona.

³⁴ Ngha a xalaliswa hi miehleketo ya mina, Mina nzi ta tsakela Jehova.

³⁵ A vaonhi a va lobyiswe laha misaveni, A vakubiha ngha va ngave kona kambe. Khesa Jehova, muhefemulo wanga! Dumisani Jehova!