Nehemia 4 - Tshwa Bible

Ku rinzela valala.

¹ Kanilezi laha Sanballati a ngazwa lezaku hi kari hi vuxa a ligingisi, i lo zangara nguvu, a tseketsela a vaJuda.

² I lo wulawula mahlweni ka vanakulobye ni ka yimpi ya Samaria, aku: Zini yi mahako mikoxa leyi ya vaJuda? Hi ta va tsika va vuxa a ntamu wabye ke? Va ta maha miphahlo ke? Va ta mbheta ntiro lowu hi siku ginwe ke? Va ta vuxa a maribye lawa ma mahileko tinhulu ta fenze hi ku hisiwa hi nzilo ke?

³ Makunu Tobia a muAmoni, loyi a nga wa hi kusuhi naye, aku: Zaleziya va zi akako, loku a hlathi gi kanziha hehla ka zona, gi ta khungumula a ligingisi leliya la maribye.

⁴ Zwana, Nungungulu wa hina, hakuva hina ha nyenyiwa! Tlhelisa a nzhukano yabye yi wela tihlokweni tabye; u va nyikela a kuva va phangiwa lomu tikweni ga wukhumbi!

⁵ U nga fenengeti a zigoho zabye, ni zionho zabye ngha zi nga vinyiwi mahlweni ka wena; hakuva va ku zangarisile mahlweni ka vaaki!

⁶ Zinghaho hi lo aka a ligingisi; lontlhe li lo tlhangana laha xikari ka kutlakuka ka lona, hakuva a vanhu va wa ti tsitsiritile ntirweni lowo.

⁷ Kanilezi laha Sanballati, na Tobia, ni maArabia, ni vaAmoni, ni vaAxdodi, va ngazwa lezaku a ntiro wa ku aketa a ligingisi la Jerusalema wuya mahlweni, ni lezaku a mimole yi sangula ku valetelwa, va lo zangara nguvu.

⁸ Vontlhe va lo tlhangana va boha xikungo xa kulwa ni Jerusalema, ni ku vuxa a vilinganya mutini lowo.

⁹ Kanilezi hina hi lo khongela ka Nungungulu wa hina, hi yimisa varinzeli mumu ni wusiku, kasi ku ti vikela kabye.

¹⁰ A va Juda vaku: A varwali va minzhwalo va mbhela ntamu, kanilezi a fenze ya ha tele; hi ta tsanzeka ku aka ligingisi.

¹¹ A valala va hina vaku: Va nga ta tiva nchumu, ge hambu ku wona nchumu, kala hi chikela lomu xikari kabye hi va hlasela, hi va kaketisa ntiro wabye.

¹² Laha a vaJuda lava va nga wa akile kusuhani kabye va ngata, va ta hi tivisa khume ga zikhati mahungu lawo, na vata hi matlhelo wontihe, vaku: Mu fanele ku wuya ka hina!

¹³ Hikwalaho mina nzi lo veka varinzeli hi tlhelo ga le nzhelelweni wa wutshamu lego, hi lenzhako ka ligingisi, hi lehandle ka kona, nzi va veka hi mingango yabye na va hi ni tisupado, ni matlhari, ni mawura yabye.

¹⁴ Nzi lo cuwuka na nzi yimile, nziku ka manghanakana, ni ka vafumeli, ni ka vontlhe vanhu: Mu nga va chaveni! Alakanyani Hosi, loyi a nga wa hombe, a chavekako, mu lwela vanakuloni, a vana va nwina, ni vanhanyana va nwina, ni vasati va nwina, ni tiyindlu ta nwina! Mitse. 14:9; Deut. 1:21

¹⁵ Laha a valala va hina va ngazwa lezaku hi tivile a mhaka ya kona, na Nungungulu a puxulule a xikungo xabye, hi lo tlhelela ligingisini, munwe ni munwani ntirweni wakwe.

¹⁶ Kusukela ka siku lego, a khihlanya ga vatiri va mina va lo tira, a ginwani khihlanya gabye va welela matlhari ni zitlhangu ni mawura ni mabhaji ya ziketse; a tinduna ti wa yimile hi lenzhako ka yontlhe a yindlu ya ka Juda.

¹⁷ Lava va nga wa aka a ligingisi, ni lava va nga wa rwala minzhwalo, va wa tira hi woko ginwe, a ginwani na gi welele matlhari.

¹⁸ A vaaki, munwe munwani i wa hi ni supado laha reveni gakwe, na va kari va aka. A mubi wa mpunzu i wa kusuhani na mina.

¹⁹ Nziku ka manghanakana, ni ka tinduna, ni ka vanhu: A ntiro ngwa hombe, kambe wu anamile; hi tsawukene nguvu laha ligingisini,

²⁰ Ni ka gihi wutshamu mu ta ngazwa a mpunzu na wuba, tsombanani muta ka hina; Nungungulu wa hina i ta hi lwela. Ekso. 14:14, 25; Deut. 1:30; 3:22

²¹ Zinghaho hi lo tira. A khihlanya gabye va lo welela matlhari kusukela ni mixo kala tinyeleti ti woneka.

²² Ka xwalexo xikhati mina nziku ka vanhu: Munwe ni munwani a tshame ni xitiri xakwe lomu Jerusalema, kasi laha wusikwini va fela kuva varinzeli va hina, laha hlikanhini va tira.

²³ Zinghaho ge hambu mina, kutani vanakulori, hambu malanza ya mina, kutani a vavanuna lava va nga wa hi varinzeli va nga nzi lanzela, ku wa nga hi kona ni munwe wa ku tlhatlha tinguwo takwe; munwe ni munwani i wa fanele ku yakha mati na welele a tlhari gakwe.