Nehemia 3 - Tshwa Bible

Kuavanyiswa ka ntiro.

¹ Zonake mupristi wa hombe Eliaxiba i lo suka ni vanakulobye, a vapristi, va aka a nyangwa ya Tiyivu; va lo yi basisa, va yi vekela tivati ta kona; va tlhela kambe va aka a ligingisi kala le khokholeni ga Hamea, Va gi basisa, kala va ya chikela khokholeni ga Hananeli. Jer. 31:38

² Lava va nga mu gamela ku aka hi vavanuna va le Jeriko. Ku gamela Zakura nʼwana Imri.

³ A nyangwa ya Zidluwani yi akilwe hi vana va Hasenaa; va lo yimisa timhanze ta kona, va vekela tivati ta kona, ni zitiyiso ni zikwinyaro.

⁴ Loyi a nga va gamela ku aketa hi Meremote nʼwana Uria wa Hakoza. Ku gamela Mexulamu nʼwana Berekia wa Mexezabeli. Ku gamela Zadoke nʼwana Baana.

⁵ Ku gamela vaTekoa; kanilezi a tihosana tabye a ti na nga wu henya a ntiro wa Hosi yabye.

⁶ A nyangwa ya kale yi aketilwe hi Joiada nʼwana Pasea na Mexulamu nʼwana Besodeia; va lo yimisa a timhanze, va vekela a tivati, ni zitiyiso, ni zikwinyaro za kona.

⁷ Ku gamela Melatia a muGibeoni, na Jadoni a muMeronote, a vavanuna va le Gibeoni, ni va le Mizpa, lava va nga wa hi hasi ka mufumeli wa le tlhatuko wa congo.

⁸ Ku gamela Uzzieli nʼwana Harhaia, va nga vafuli va nzalama. Ku gamela Hanania, a munwe wa vamahi va mafura yo tola, va lo aketa Jerusalema kala le ligingisini lo Anama.

⁹ Va gamelwa hi Refaia nʼwana Hura, a mufumeli wa khihlanya ga tiko ga Jerusalema.

¹⁰ Ku gamela Jedaia nʼwana Harumafu, a aketa kala le ndlwini yakwe. Ku gamela Hattuxa nʼwana Haxabneia.

¹¹ Malkija nʼwana Harima, na Hasuba nʼwana Pahati-Moabi, va lo aketa xinwani xipanze ni khokhola ga Minzhimbo.

¹² Va gamelwa hi Xalluma nʼwana Hallohexi, a mufumeli wa khihlanya ga tiko ga Jerusalema, yena ni vanhanyana vakwe.

¹³ A nyangwa ya le nkoveni yi aketilwe hi Hanuna, ni vaaki va le Zanoa: ya lo yi aka, va vekela tivati, ni zitiyiso za kona, ni zikwinyaro, va tlhela va aka a 1,000 wa mikono ya ligingisi kala le nyangweni ya Wulongo.

¹⁴ A nyangwa ya Wulongo yi aketilwe hi Malkija nʼwana Rekabe, a mufumeli wa tiko ga Beti-Hakeremu; i lo yi aka, a vekela a tivati, ni zitiyiso, ni zikwinyaro za kona.

¹⁵ A nyangwa ya le xibukeni yi lo aketwa hi Xaluna, nʼwana Kolhoze, a mufumeli wa tiko ga Mizpa; i lo yi aka, a yi fulela, a yi vekela a tivati, ni zitiyiso, ni zikwinyaro za kona. I lo aka ni ligingisi la Hlowo ya Xela kusuhani ni simu ga hosi kala le mayingweni lawa ma relelako na ma sukela le mutini wa Davida.

¹⁶ Ku lo gamela Nehemia nʼwana Azbuka, a mufumeli wa khihlanya wa tiko ga Bet-zura, kala le kusuhani ni zilahla za Davida, kala hlobyeni leyi yi nga kelilwe, kuya le ndlwini ya tinhenha.

¹⁷ Ku lo gamela vaLevi, Rehuma nʼwana Bani. Ku gamela Haxabia, a mufumeli wa khihlanya ga tiko ga Keila.

¹⁸ Yena i lo gamelwa hi vanakulobye Bavai nʼwana Henadade, a mufumeli wa khihlanya ga tiko ga Keila.

¹⁹ Ku lo gamela Ezera nʼwana Jexua, a mufumeli wa le Mizpa, a aketa xipanze xinwani xa ligingisi kala le ndleleni yi yako ndlwini ya matlhari le gwitsini ga ligingisi.

²⁰ Anzhako kakwe ku lo lanzela Baruke nʼwana Zabbai a ti tsitsirita a aketa a xinwani xipanze, kusukela laha gwitsini ga khurisi kala laha livatini la yindlu ya mupristi wa hombe Eliaxiba.

²¹ Anzhako kakwe ku lo gamela Meremote nʼwana Uria wa Hakoza, a aketa xinwani xipanze, kusukela laha nyangweni ya yindlu ya Eli-axiba kala magumo ka yindlu ya Eli-axiba.

²² Anzhako kakwe ku lo enghena a vapristi, a vavanuna va le mikoveni, va aketa.

²³ Anzhako kabye ku lo gamela Benjamini na Hasuba va aketa kala kusuhani ni yindlu yabye. Anzhako kabye ku lo gamela Azaria nʼwana Ma-aseia wa Anania a ya gemeta laha ndlwini yakwe.

²⁴ Anzhako kakwe ku lo enghena Binnui nʼwana Henadade a aketa xinwani xipanze, kusukela ndlwini ya Azaria kala le gwitsini ga ligingisi, a khuzwini.

²⁵ Palala nʼwana Uzai i lo aka kusukela gwitsini ga ligingisi kala le khokholeni legi gi wonekako le hehla ka yindlu ya hosi, gi nga kusuhani ka hubye ya varinzeli. Anzhako kakwe ku lo gamela Pedaia nʼwana Paroxi.

²⁶ Makunu a vaNetinime va wa akile le Ofeli, a wutshamu gi cuwukeneko ni nyangwa ya Mati hi tlhelo ga Mupela-gambo, ni le ka khokhola legi gi humelako handle.

²⁷ Anzhako kakwe a vaTekoa va lo aketa a xinwani xipanze, kala le khokholeni ga hombe gi humelako ni le khurisini ga Ofeli.

²⁸ A vapristi va aketile le hehla ka nyangwa ya Mahaxi; munwe ni munwani a aka xipanze xa yindlu yakwe wutsumbu.

²⁹ Anzhako kabye ku lo gamela Zadoke nʼwana Immeri, a aka wutshamu gi cuwukeneko ni yindlu yakwe. Ku gamela Xemaia nʼwana Xekania, a muhlayisi a nyangwa ya Muhuma-gambo.

³⁰ Anzhako ku lo gamela Hanania nʼwana Xelemia, na Hanuna a nʼwana wa wu 6 wa Zalafa, a aka xinwani xipanze. Ku gamela Mexullamu nʼwana Berekia a aka wutshamu gi cuwukeneko ni yindlu yakwe.

³¹ Anzhako kakwe ku lo gamela Malkija, a munwe wa vafuli va nzalama, a aka kala tindlwini ta vaNetinime, ni ta vamahungani, kala le nyangweni ya Hammifkade, kala le gangeni wa gwitsi.

³² Xikari ka yindlu ya gwitsi ni nyangwa ya Tiyivu ku aketile vafuli va nzalama ni vamahungani.