Mutshawuteli 7 - Tshwa Bible

A magezu ya kutlhariha.

¹ A kudzunzeka ku nene ku hunza mafura ya ntsengo; ni siku ga kufa gi hunza a siku ga kubelekwa.

² I chukwana kuya ndlwini ya xirilo ku hunza a kuya ndlwini ya mubuzo; hakuva lawo hi wona magumo ya vontlhe vanhu; ni munhu loyi a hanyako i fanele ku ehleketa ha kona.

³ A hlomulo i chukwana ku hunza mahleko; hakuva a mbilu yi basiswa hi lezi zi mahako nghohe yi tsuva.

⁴ A mbilu ya tlhari yi le ndlwini ya xirilo; kanilezi a mbilu ya xipumbu yi le ndlwini ya kutsaka.

⁵ I chukwana a ku ingisela a ziluleko za tlhari, ku hunza ku ingisela lisimu la zipumbu.

⁶ Hakuva a mahleko ya zipumbu ma fanana ni kuvuma ka mizwa leyi yi dzivelwako lahasi ka mbita, Lezi kambe a zi nyawuli.

⁷ Hizinene, a kutsimbeketwa ku hungukisa vatlharihileko; a xinyikiwo xi goha mbilu ya munhu.

⁸ A magumo ya mhaka i chukwana ku hunza masangulo ya yona; a munhu a nga ni lihlazambilu wa hunza loye a nga ni matshanza. Ekso. 23:8; Deut. 16:19

⁹ U ngave ni moya wa ku hatlisela ku zangara, hakuva a zanga yi tshama timbilwini ta zipumbu.

¹⁰ U nga wuli, uku: Hikuyini a masiku ya kale ma nga hi chukwana ku hunza lawa ke? hakuva cima a ku wutisi lezo hi wutlhari.

¹¹ A wutlhari gi nene ku fanana ni tshomba; gi hunza ni tshomba ka lava va wonako gambo.

¹² Hakuva wutlhari i nzhuti, kota lezi mali yi nga nzhuti; kanilezi a wuchukwana ga wutivi hi lezaku a wutlhari gi hlayisa wutomi ga lava va nga nago.

¹³ Ehleketa hi ntiro wa Nungungulu; hakuva himani a nga lulametako lexi yena a nga xi byeketa ke?

¹⁴ Tsaka hi siku ga makatekwa, kanilezi a sikwini ga hlomulo alakanya lezaku Nungungulu i mahile ginwe ni ginwani, lezaku munhu a nga ta zi tiva lezi zi ta nga humela anzhako kakwe.

¹⁵ Zontlhe lezi nzi zi wonile masikwini ya mina ma nga nyawuliko: i kona munhu a lulamileko a lovako kululameni kakwe, ni munhu wa kubiha a hanyako masiku yo leha kubiheni kakwe.

¹⁶ U nga ti mahi loyi a lulamileko ku hunzisa, ge, hambu ku ti maha loyi a tlharihileko ku hunzisa; hakuva u ta ti lovisela yini ke?

¹⁷ U ngave loyi a hunzisileko kubiha, ge, hambu kuva xipumbu; u ta fela yini na xi nga se ku chikela xikhati xa wena ke?

¹⁸ Zi sasekile a kuva u khomisisa ka lexi, kambe u nga tsiki lexiya; hakuva loyi a chavako Nungungulu i ta humelela ka zona zontlhe. Mat. 23:23

¹⁹ A wutlhari gi nyika ntamu ka loyi a tlharihileko ku hunza khume ga vahombe va nga lomu mutini.

²⁰ Hakuva a nga kona munhu a lulamileko misaveni, loyi a mahako kusaseka, a nga onhi nchumu.

²¹ U nga ingiseli zontlhe lezi zi wulawulako; u nga kala uzwa ni nanza ga wena gi ku rukatela. 1 Tih. 8:46; 2 Kro. 6:36; 1 Joh. 1:8

²² Hakuva a mbilu ya wena ya zi tiva lezaku na wena u rukatele vanwani kanyingi.

²³ Zontlhe lezi nzi zi karhbisisile hi wutlhari, nziku: Nzi tava ni wutlhari, kanilezi gi lo sala kule na mina,

²⁴ Lezi zi nga hi kona zi le kule, na zi etile; himani a nga zi tivako?

²⁵ Nzi lo nyiketela a mbilu ya mina ku tiva ni ku hlotisisa, ni ku kambisisa wutlhari ni tshinya ga timhaka, ni ku tiva wupumbu ga kubiha, ni lezaku wupumbu lihlanyi.

²⁶ Nzi lo kuma lezaku a wasati loyi a mbilu yakwe yi nga minzhiyo ni zikhunguvanyiso, loyi a mawoko yakwe ma nga magota, wa bava ku hunza kufa. Loyi a xalalisako Nungungulu wa pona kakwe, kanilezi a muonhi i ta phasiwa hi yena.

²⁷ Languta, lezi nzi zi kumile, ku wula Mukaneli, laha nzi nga hlolisisa xilo xinwe ni xinwani lezaku nzi tiva xigelo xa kona.

²⁸ Lexi a mbilu ya mina ya ha xi lavako, ni lezi a yi se nga xi kuma, hi lexi: xikari ka 1,000 wa vavanuna, nzi kumile munwe, kanilezi cima a nzi na nga kuma ni wasati munwe xikari ka vona vontlhe.

²⁹ Languta, lexi nzi xi kumile ntsena: lezaku Nungungulu i, mahile munhu na a lulamile, kanilezi vona va ti polele mikhuwo minyingi.