Mutshawuteli 1 - Tshwa Bible

Zontlhe a zi nyawuli.

¹ A timhaka ta Mukaneli, a nʼwana Davida, hosi ya le Jerusalema.

² A kunganyawuli ka zinganyawuliko! ku wula Mukaneli. A kunganyawuli ka zinganyawuliko, zontlhe a zi nyawuli.

³ I bhinzula yini munhu hi mitiro yakwe yontlhe a yi mahako lahasi ka gambo ke?

⁴ A xizukulwana xinwe xa hunza kuta xinwani, kanilezi a misava yi tshamile kala kupinzuka. Tis. 104:5

⁵ A gambo ga tsuwuka gi tlhela gi pela, zonake gi hatlisa giya wutshanwini legi gi nga tsuwuka ha gona.

⁶ A mheho yi komama Dzongeni, yi tlhela yi hunzuluka yi komama Nwalungu, yi hunzuluka-hunzuluka kupupuxeni ka yona, zonake yi engeta yi sangula kambe a kurenzeleka ka yona.

⁷ Yontlhe micongo yi chela bimbini, kanilezi a bimbi a gi tali; laha micongo yi sukelako kona laho yi tlhela yiya kona kambe.

⁸ Zontlhe za karata, a munhu a nga zi koti ku zi tshawutela. A tihlo a gi kolwi hi ku wona, ni ndleve a yi eneliswi hi kuzwa.

⁹ Lezi zi nga hi kona, hi zalezo zi ta ngava kona; ni lezi zi mahilweko zi ta engeta zi mahiwa: cima a ku na xilo xiswa lahasi ka gambo.

¹⁰ Loku ku wuliwa hi xilo xo kari, aku: Languta, xilo xiswa! kasi xi wa hi kona hi kale, a xikhatini na hi nga se va kona.

¹¹ Lava va nga hi kona kale a va ha alakanyiwi; ni lava va ta ngava kona anzhako ka hina va nga ta alakanyiwa hi lava va ta ngata.

A ku hlotisisa wutlhari.

¹² Mina Mukaneli nzi wa hi hosi ya Israeli le Jerusalema.

¹³ Nzi lo nyiketela a mbilu ya mina a ku hlotisisa hi wutlhari a zilo zontlhe lezi zi mahiwako lahasi ka tilo; i ntiro wo bayisa lowu Nungungulu a wu nyikileko ka vanana va vanhu lezaku va ti karata ha wona. 1 Tih. 4:29

¹⁴ Nzi wonile yontlhe mitiro yi mahiwako lahasi ka gambo; languta, yontlhe a yi nyawuli, ku lanza mheho ntsena.

¹⁵ Lexi xi byekeleko a xi na ku lulametwa, ni lexi xi nga hiko kona a xi na ku hlayiwa.

¹⁶ Nzi waku mbilwini ya mina: Languta, nzi ti kumele a wutlhari ga hombe go hunza vontlhe va nzi rangeleko va fuma lomu Jerusalema; ina, a mbilu ya mina yi kumile wutlhari ni kupimisisa ka hombe.

¹⁷ Kanilezi laha nzi nga nyiketela mbilu ya mina a ku tiva wutlhari, ni lihuhi, ni wupumbu, nzi lo wona lezaku lezi kambe ku lanza mheho ntsena.

¹⁸ Hakuva laha wutlhari ga hombe gi nga kona, a zikarato zo tala zi kona; Loyi a anzisako wutivi gakwe i anzisa kubayiseka.