Mitsengo 9 - Tshwa Bible

¹ Jehova i lo wulawula ka Mosi le xiwuleni xa Sinai, hi hweti yo sangula ya lembe ga wumbiri ga kuhuma kabye le Gipite, aku:

² A vanana va ka Israeli a va hlayise a Pasika hi nguva ya yona.

³ Mu ta yi maha hi xikhati lexi xi yimisilweko, hi siku ga 14 ga leyi hweti, laha gambyeni; mu ta yi maha hi milayo ya kona yontlhe ni zileletelo za yona zontlhe. Ekso. 12:18; Levi 23:5; Deut. 16:1

⁴ Mosi i lo byela a vanana va ka Israeli a ku hlayisa Pasika.

⁵ Zonake va lo hlayisa Pasika hi siku ga 14 ga hweti yo sangula, laha gambyeni, le xitsungeni xa Sinai. A vanana va ka Israeli va lo maha zontlhe lezi Jehova a leleteleko Mosi.

⁶ Makunu ku wa hi kona a vanhu vo kari va nga wa nyenyezisilwe hi xirumbi xa mufi, va tsanzeka ku hlayisa a Pasika hi siku lego; va lota mahlweni ka Mosi na Aroni hi siku lego,

⁷ va taku: Hi nyenyezisilwe hi xirumbi; xana hi ta alelwa ku nyikela munyikelo wa Jehova hi xikhati xi yimisilweko xikari ka vanana va ka Israeli ke?

⁸ Mosi aku ka vona: Tshamani laha, nza ha tazwa lezi Jehova a ta nga leletela hi tlhelo ga nwina.

⁹ Zonake Jehova i lo wulawula ka Mosi, aku;

¹⁰ Byela a vanana va ka Israeli, uku: Loku a munhu xikari ka nwina a nyenyezisilwe hi xirumbi, hambu loku ku hi ku ngha a enzele kule, hambu zi hi tano i taga a Pasika ya Jehova.

¹¹ Va ta yi gawo hi siku ga 14 ga hweti ya wumbiri laha gambyeni; va taga a yivana ya pasika zinwe ni zibaba zi nga hiko na comelo, ni matluka yo bava. Ekso. 12:8; 2 Kro. 30:2, 15

¹² Va nga dzuki va siya nchumu xi chikela manziko, va nga fayi marambu ya yona hambu ni ginwe; a Pasika yi fanele ku giwa kukotisa a zileletelo za yona.

¹³ Kanilezi loku munhu a hlazekile, ni loku a nga enzangi, a tsika kuga Pasika, loye munhu i ta tsemiwa ka va ka kabye, hakuva a nga humesangi a munyikelo wa Jehova hi xikhati xa wona; loye munhu i ta rwala a nanzu wakwe yena nwinyi.

¹⁴ Loku a muluveli loyi a akileko na nwina a lava kuga Pasika ya Jehova, i ta yi maha hi nayo wa Pasika, kota zileletelo za yona. A nayo wa kona wu tava zinwe ni wa nwina; hi lezaku a muluveli ni xisumbulwa zi tava zinwe.

¹⁵ Hi siku lego va yimisileko a tabemakeli, a refu gi lo fenengeta a yindlu, gi nga tabemakeli ga wumboni; laha gambyeni kambe ku wa hi kona xo fanana ni nzilo le hehla ka tabemakeli kala laha mixweni. Ekso. 40:34, 38; 1 Tih. 8:10

¹⁶ Ku lo mahisa lezo masiku wontihe; a refu gi wa fenengeta a tabemakeli, ni laha wusikwini ku wa ku khwatsi i nzilo.

¹⁷ Kanilezi loku a refu gi suka hehla ka tabemakeli, a vanana va ka Israeli va wo andlamuka, ni ka wutshamu lego a refu gi yimako, a vanana va ka Israeli va wo gova va gwimba matenda yabye. Ekso. 40:36; 1 Kor. 10:1

¹⁸ A vanana va ka Israeli va wo andlamuka hi ku leletelwa hi Jehova, va tlhela va gova hi kuleletela kakwe. Va wo tshama matendeni yabye laha a refu gi nga ha tshamile hehla ka tabemakeli.

¹⁹ Ni loku a refu gi hlwela masiku yo tala le hehla ka tabemakeli, a vanana va ka Israeli va wa si lanzela kuleletela ka Jehova, va nga suki.

²⁰ Kanilezi loku a refu gi tshama masiku matsongwani ntsena le hehla ka tabemakeli, va wa su gwimba matenda yabye kota kuleletela ka Jehova; hi kuleletela ka Jehova va wo andlamuka.

²¹ Hilezo ni loku a refu gi tshama ntsena kusukela ni gambo kala laha mixweni; loku a refu gi suka ni mixo, vona va su andlamuka. Kasi loku a refu gi tshamile a siku ni wusiku ga kona, a va nga suki, kala gi tlakuka gi suka.

²² Hambu loku a refu go tshama hehla ka tabemakeli masiku mambiri kutani hweti, kutani xikhati xo leha nguvu, vonawu a vanana va ka Israeli va wo tshama matendeni yabye va nga suki; zonake loku gi suka, vonawu va wo andlamuka.

²³ Va wa gwimba matenda hi kuleletela ka Jehova, hi kuleletela ka Jehova va wo andlamuka. Va wa hlayisa kuleletela ka Jehova kota lezi Jehova a leleteleko Mosi.