Mitsengo 32 - Tshwa Bible

Vaaki va Mutsuwuka-gambo wu Jordani.

¹ Makunu a vana va ka Rubeni ni vana Va ka Gadi, va wa hi ni mitlhambi yo tala nguvu. Laha va nga wona a tiko ga Jazera ni tiko ga Gileade lezaku gi wa hi wutshamu gi ringanako mitlhambi yabye,

² va lota ka Mosi na mupristi Eliazare ni ka tihosana ta tlhangano, va taku kabye:

³ A miti ya Atarote, na Diboni, na Jazera, na Imra, na Hexboni, na Eleale, na Sebama, na Nebo, na Beona,

⁴ a tiko legi Jehova a hlaseleko mahlweni ka tlhangano wa ka Israeli, i tiko gi ringanako zifuyo; makunu hina malanza ya wena hi na ni mitlhambi.

⁵ Va engeta kambe va ku ngalo: Loku hina hi kumile thomo mahlweni ka wena, ngha a tiko legi gi nyikiwa ka malanza ya wena gi maha tshomba ya hina; u nga hi yisi le tlhatuko wa Jordani.

⁶ Zonake Mosi aku ngalo ka vana va ka Gadi, ni ka vana va ka Rubeni: Kasi a vamakabye va nwina va ta hloma a yimpi, nwina mu sala seno ke?

⁷ Hikuyini mu mbheta ntamu lomu timbilwini ta vanana va ka Israeli wa kuva va tlhatuka vaya ka tiko legi Jehova a va nyikileko ke?

⁸ Hi zalezo va nga maha vararu va nwina xikhati lexo nzi nga va ruma na hi hi le Kadexa-Barnea a kuya hlola tiko.

⁹ Hakuva laha va ngaya chikela mikoveni ya Exkole, va wona a tiko, va lo ta mbheta ntamu wa timbilu ta vanana va ka Israeli, wa kuva va enghena a tikweni legi Jehova a va nyikileko.

¹⁰ A kala Jehova a zangara lego siku, a hlambanya, aku: Deut. 1:34

¹¹ Vontlhe a vanhu lava va humileko le Gipite, kusukela ka lava va nga ni 20 wa malembe ni ku hunza, cima va nga ta wona a tiko legi nzi hlambanyileko ka Abrahama, ni ka Isaka, ni ka Jakobe, hakuva a va nzi lanzelangi hi zinene;

¹² ntsena Kalebi a nʼwana wa Jefuna a muKenazi, na Joxua a nʼwana wa Nuni, lava va lanzeleko Jehova hi zinene.

¹³ Zinghaho a zanga ya Jehova yi lo vindlukela a va ka Israeli, a va tlhelisa vaya nzulanzula lomu xiwuleni 40 wa malembe, kala ku mbhela xontlhe lexo xizukulwana xi mahileko kubiha mahlweni ka Jehova.

¹⁴ Makunu nwinawu mu lava ku teka xikhundla xa vararu va nwina, mu maha xizukulwana xa vaonhi, mu anzisa a zanga ya Jehova xikari ka va ka Israeli.

¹⁵ Hakuva loku mu mu fularela i ta mu tsika lomu xiwuleni, zonake mu ta lovisisa vontlhe vanhu lava.

¹⁶ Kanilezi vona va lo tshinela kusuhani ka Mosi, vaku ngalo: Hina hi ta aka a maranga ya mitlhambi ya hina laha, ni miti ya vanana va hina.

¹⁷ Kanilezi hina hi ta hloma hi famba mahlweni zinwe ni vanana va ka Israeli, hi kala hi va chiketa vontlhe; a vana va hina na va tshama mitini ya makhokhola hi kota ya vaaki va tiko.

¹⁸ Hina hi nga ta wuya leno tindlwini ta hina, a vanana va ka Israeli na va nga se enghena munwe ni munwani lomu tshombeni yabye;

¹⁹ hakuva hina hi nga ta avana navo a tshomba ya seno tlhatuko wa Jordani, ge hambu le mahlweni, hakuva a tshomba ya hina hi yaleyi seno Mutsuwuka-gambo wa Jordani.

²⁰ Mosi aku ngalo kabye: Loku mu maha lezo, mu hlomawu ku yalwa mahlweni ka Jehova,

²¹ ni loku nwina nwentlhe mu hlomako mu tlhatuka Jordani mahlweni ka Jehova a kala yena a hlongola valala vakwe mahlweni ka nghohe yakwe,

²² zonake mu ya wuya a tiko na gi rulile mahlweni ka Jehova, lahoke mu nga tava ni nanzu mahlweni ka Jehova ni ka vaIsraeli, a tiko legi gi tava tshomba ya nwina mahlweni ka Jehova.

²³ Kanilezi loku mu nga mahi lezo mu tava mu onhile ka Jehova; hikwalaho tivani lezaku a xionho xa nwina xi ta tlhela xi mu kuma.

²⁴ Akani a miti ya vana va nwina, ni maranga ya mitlhambi ya nwina; mu maha zontlhe lezi zi humileko milonwini ya nwina.

²⁵ Zonake a vana va ka Gadi, ni vana va Rubeni va te ngalo ka Mosi: A malanza ya wena ma ta maha kota lezi a hosi ya mina yi leleteleko.

²⁶ A vana va hina ni vasati va hina, ni mitlhambi ya hina, ni zifuyo za hina zontlhe zi ta tshama lomu mitini ya Gileade.

²⁷ Kanilezi a malanza ya wena wontihe ma ta hloma, va famba kulweni mahlweni ka Jehova, kotisa lezi a hosi ya mina yi wulileko.

²⁸ Zinghaho Mosi i lo leletela a timhaka leto ka mupristi Eliazare, ni ka Joxua a nʼwana wa Nuni, ni ka tihosana ta tinyangwa ta vanana va ka Israeli.

²⁹ Zonake Mosi aku ngalo ka vona: Loku a vanana va ka Gadi ni vanana va ka Rubeni va tlhatuka Jordani zinwe na nwina na va hlomile ku yalwa mahlweni ka Jehova, ni loku tiko gi rula mahlweni ka nwina, nwina mu ta va nyika a tiko ga Gileade gi maha tshomba yabye.

³⁰ Kanilezi loku vona va nga tlhatuki zinwe na nwina na va hlomile, vona va ta kuma xiavelo xa tshomba yabye xikari ka nwina le tikweni ga Kanani.

³¹ A vana va Gadi zinwe ni vana va Rubeni va lo hlamula, vaku: Hina hi ta maha kota lezi Jehova a byelileko a malanza ya wena.

³² Hina hi ta tlhatuka na hi hlomile mahlweni ka Jehova, hiya tikweni ga le Kanani, kanilezi a xiavelo xa tshomba ya hina xi tava seno tlhatuko wa Jordani.

³³ Zinghaho Mosi i lo nyika ka vana va Gadi, ni ka vana va Rubeni, ni ka khihlanya ga nyangwa ya ka Manase a nʼwana wa Josefa, a tiko ga mufumo wa hosi Sihoni, a hosi ya maAmori, ni tiko ga mufumo wa Ogi a hosi ya le Baxani, ni miti ya kona, ni masimu wontihe ya miti ya kona, ma renzetekelako wontihe matlhelo. Deut. 3:12; Jox. 13:8

³⁴ A vana va ka Gadi va lo aka Diboni, ni Atarote, na Aroera,

³⁵ ni Atroxofane, ni Jazera, ni Jogbeha,

³⁶ ni Bet-Nimra, ni Bet-Harani, a miti yi nga ni makhokhola ni maranga ya tiyivu.

³⁷ A vana va ka Rubeni va lo aka le Hexboni, ni le Eleale, ni Kiriataime;

³⁸ ni le Nebo ni Baal-Meoni (a mavito lawa ma hunzulusilwe), ni le Sibma. Zonake va lo chula manwani mavito ka miti leyo va yi akileko.

³⁹ A vana va ka Makira a nʼwana wa Manasa, ya lolwa ni va ka Gileade va hlongola vaAmori lavo va nga wa akile lomo, va teka tiko lego.

⁴⁰ Zonake Mosi i lo nyika ka Makira a nʼwana wa Manase a tiko ga Gileade a aka lomo.

⁴¹ Jaira a nʼwana Manase i loya a ya teka a miti yabye, a yi chula a vito ga Jaira.

⁴² Noba i loya teka Kenate zinwe ni mitana ya kona, a yi chula vito ga Noba, a ti chula vito gakwe.