Mitsengo 30 - Tshwa Bible

A zifungo za vavasati.

¹ Mosi i lo wulawula ka tihosana ta tinyangwa ta vanana va ka Israeli, aku: A timhaka leti a nga wulawula Jehova, hi leti:

² Loku a munhu a ti bohile ka Jehova hi xifungo, kutani ku funga a ti boha hi gezu ga yena nwinyi, a nga dzuki a hambunyeta a gezu ga xifungo xakwe; i fanele ku maha zontlhe lezi a wulileko hi nomu wakwe.

³ Loku wasati a ti bohile ka Jehova hi kuhlambanya, ni loku a ti bohile hi gezu gakwe na ha hi ndlwini ya raru wakwe, xikhatini xa wuswa gakwe; Levi 27:2; Deut. 23:21

⁴ loku a raru wakwe azwa xifungo lexo xakwe, ni gezu gakwe ga kuhlambanya, a miyela; a kuhlambanya kakwe kontlhe ku ta tiyiswa, ni magezu wontihe lawa a ti bohileko ha wona ma ta tiya.

⁵ Kanilezi loku a raru wakwe a mu beletela gwalego siku a nga muzwa ha gona a kuhlambanya kakwe ni magezu wontihe lawa a ti bohileko ha wona ma nga ta tiyiswa; na Jehova i ta mu tsetselela, hakuva a raru wakwe i mu beletele.

⁶ Kasike loku a tekilwe, na a bohilwe hi xifungo xakwe, kutani hi gezu gi humako nonwini wakwe,

⁷ a nuna wakwe a muzwa na hlambanya a miyela lego siku, a xifungo xakwe xi ta tiyisiwa, ni magezu yakwe lawa a ti bohileko ha wona ma ta tiya.

⁸ Kanilezi loku a nuna wakwe a mu beletela gwalego siku a zi zwako, yena i tsemile kuhlambanya kakwe, ni magezu lawa ma humileko hi nonwini wakwe, lawa a ti bohileko ha wona; zonake Jehova i ta mu tsetselela,

⁹ Kanilezi loku ku hi kuhlambanya ka noni kutani ka wasati loyi a tsikilweko hi nuna wakwe, a magezu wontihe lawa a ti bohileko ha wona ma ta tiyisiwa ka yena.

¹⁰ Kasike loku a ti bohile hi kuhlambanya na hi lomu ndlwini ya nuna wakwe,

¹¹ a nuna wakwe a muzwa na hlambanya, a miyela, a nga mu beleteli; a kuhlambanya kakwe ku ta tiyiswa, ni magezu wontihe lawa a ti bohileko ha wona ma ta tiya.

¹² Kanilezi loku a nuna wakwe a mu beletela gwalego siku a nga muzwa na hlambanya, wontihe magezu ya kuhlambanya kakwe ni ya ku ti boha kakwe, lawa ma humileko nonwini wakwe, ma nga ta tiya, hakuva a nuna wakwe i zi kanetile. Hikwalaho Jehova i ta mu tsetselela.

¹³ Wontihe magezu ya zifungo, ni ya kuhlambanya kontlhe loku a ti bohako ha kona kasi ku ti koramisa muhefemulweni wakwe, zi ta tiyiswa kutani ku kanetwa hi nuna wakwe.

¹⁴ Kanilezi loku a nuna wakwe a miyela wontihe masiku, lezo i vumela a kuhlambanya kontlhe ni magezu wontihe ya sati wakwe lawa a ti bohako ha wona; i tiyisile xifungo lexo, hakuva i miyelile a siku lego a nga muzwa na funga.

¹⁵ Kanilezi loku a wanuna a ta kaneta na gi hunzile a siku lego a nga muzwa na funga, yena i ta rwala a nanzu wa sati wakwe.

¹⁶ Leyi hi milayo leyi Jehova a leleteleko Mosi hi tlhelo ga wanuna ni zifungo za sati wakwe, ni tlhelo ga raru ni zifungo za nhanyana wakwe, loyi a ha tshamileko ngangweni ka raru wakwe xikhatini xa wunhwana gakwe.