Mitiro 27 - Tshwa Bible

A pfhumba ga Paule goya Roma.

¹ Laha ku nga wa tsemilwe a kuva hiya Italia hi taru, va lo nyikela Paule ni tinwani tiperesu ka nduna ya zana yi tibyako Juliu, ya ntlawa wa ka Augustu. Xip. 25:12, 25

² Hi lo enghena tarwini ga le Adramita, legi gi nga lava kuya matlhelweni ya le Asia; hi lo suka na hi hi na Aristakusi wa le Tesalonika le Makedonia. Xip. 19:29

³ Hi manziko wa kona hi lo chikela Sidoni; Juliu i lo khoma Paule khwatsi, a mu vumela a ku ya wona maxaka yakwe, a ya vunetelwa hi wona. Xip. 24:23; 28:16

⁴ Hi lo suka ha kona, hi famba hi mbhiri ya le Kupero, hakuva a taru gi lo banana ni mheho.

⁵ Laha na hi tsemakanyile bimbi gi gamekeneko ni Kilikia ni le Pamfilia, hi lo chikela le Mira wa le Likia.

⁶ A nduna ya zana yi lo kuma kona a taru ga le Alekzandria, legi gi yako Italia; yi hi enghenisa ka gona.

⁷ Laha na hi fambile ha kutsongwani a masiku yo tala, hi lo chikela hi kukarateka le ko cuwukana ni Nidusi; kota lezi hi nga tsimbetwa hi mheho, hi lo famba hi mbhiri ya le Kreta, hi tlhelo ga Salmone.

⁸ Hi lo hunza ha kona hi kutsanza hi kala hi chikela wutshanwini go kari gi tibyako Masuwa ma Nene, kusuhi ni muti wa Lasea.

⁹ Kota lezi ku nga hunzile a xikhati xa hombe, ku wa hi mhango ku famba hi bimbi, hakuva a masiku ya Kuyila ma wa sina ma hunzile, Paule i lo va khongotela,

¹⁰ aku ngalo kabye; Vavanuna, nza wona lezaku a pfhumba legi ga taru gi tava ni mhango ni kulahlekelwa ka hombe; a nzi wuli hi nzhwalo ni taru ntsena, kanilezi ni kuhanya ka hina kambe.

¹¹ Kanilezi a nduna ya zana yi lo ingisa a mufambisi wa taru ni nwinyi wa gona, ku hunza lezi zi wulilweko hi Paule.

¹² Kota lezi a suwa lego gi nga kala gi nga hi gi nene a ku tshama kona, a vanyingi va lo ranza a ku suka, vaya Fenike, gi nga suwa ga le Kreta, legi gi komamileko Mutsuwuka-gambo hi tlhelo ga Nwalungu ni tlhelo ga le Dzongeni, hi ya tshama kona hi mawuya-kaya.

¹³ Zonake laha a mheho ya Dzonga yi nga pupuxa khwatsi, va lo alakanya lezaku va ku kumile; va lo koka fero, va famba hi tlhelo ga Kreta, kusuhani ni mbhiri. A bhubhutsa.

¹⁴ Kanilezi anzhako ka xikhatanyana ku lo huma le xihlaleni a bhubhutsa ga mheho, leyi yi vitwako Erakwilo.

¹⁵ Laha taru gi nga kokiwa, gi nga zi koti ku cuwukana ni mheho, hi la su gi tsika, hi kukuletwa hi mheho.

¹⁶ Hi lo ya chikela kusuhi ni xihlalanyana xi vitwako Kauda, hi kukarateka ka hombe hi lo zi kota ku kokela ngalavana.

¹⁷ Laha va nga wa yi tlakusile, va lo tirisa liranya la tingoti, va boha taru hi lahasi lezaku gi nga khayeki gi vuta; laha va nga chava lezaku kutani va nga susumetwa xidlatanweni xa Sirtisi, va lo chisa matangi, va kukuletwa lezo.

¹⁸ Kota lezi hi nga biwa nguvu hi bhubhutsa, hi manziko wa kona va lo sangula ku hoxa a nzhwalo matini.

¹⁹ Hi siku ga manharu va lo hoxa bimbini a zibya za taru hi mandla yabye. Jona 1:5

²⁰ Laha gambo ni tinyeleti zi nga kala zi nga wonekangi a masiku yo tala, na hi biwa hi bhubhutsa ga hombe, hi lo lahlekelwa hi kutsumba kontlhe kaku hi ta huluka.

²¹ Zonake lezi ku nga hi kale na va nga gangi nchumu, Paule i lo yima xikari kabye, aku: Vavanuna, loku mu wa nzi ingisile, ngha mu nga sukangi le Kreta, mu ta kuma a mhango leyi ni kulahlekelwa loku.

²² Kanilezi makunu nza mu khongotela a ku tiyahlana; hakuva a ku kona ni munwe xikari ka nwina a ta nga lova, sine a taru goce.

²³ Hakuva a ngelosi ya Nungungulu loyi nzi nga wakwe, loyi nzi mu tirelako, yi lo woneka ka mina ni wusiku, Xip. 23:11; Rom. 1:9; 2 Tim. 1:3

²⁴ yiku: U nga chavi, Paule; wena u yimelwe hi ku yima mahlweni ka Kesari; wangabye, Nungungulu i ku nyikile vontlhe lava va fambako zinwe na wena tarwini.

²⁵ Hikwalaho, vavanuna, tiyanihlana; hakuva nza tsumba ka Nungungulu, lezaku ku ta maheka kota lezi ku wulawulileko ka mina. Lu. 1:45; Rom. 4:20, 21; 2 Tim. 1:12

²⁶ Ahemba-lokoke, hi yimelwe hi ku hoxiwa xihlaleni xo kari.

²⁷ Ku te hi wusiku ga khume ni mune, na ha ha ndlengandlengiswa lomu bimbini ga Adria, laha xikari ka wusiku a vamarinyero va lo alakanya lezaku va tshinela tiko go kari;

²⁸ loku va pima a kueta ka mati, va lo kuma 20 wa zipimo za ku tshambuluta mawoko; anzhako ka xikhatanyana va lo pima kambe, va kuma 15 wa zipimo.

²⁹ Na va chava lezaku hi nga wela fungwini wa maribye, va lo rikhisa mune wa tifero lenzhako ka taru, va navela a kuva gica.

³⁰ Kota lezi a vamarinyero va nga lava ku nyemuka lomu tarwini, va lo chisa a xingalavana lomu matini, na vaku khwatsi vo chisa tifero hi le nhovini ya taru.

³¹ Kanilezi Paule aku ngalo ka nduna ya zana ni ka masochwa: Loku vanalava va nga tshami tarwini, a mu na ku pona.

³² Zonake a masochwa ma lo tsema a tingoti ta xingalavana, va xi tsika, xi wela matini.

³³ Laha gi ngaya kuceni, Paule i lo va khongotela vontlhe ku taga zakuga, aku: Inyamutlha hi khume ga masiku ni mune na mu tshamile mu rinzela mu yila, mu ngagi nchumu.

³⁴ Nza mu khongotela a kuga zakuga; hi zona zi ta nga mu vunetela a kuva mu pona; hakuva a ku na munwe wa nwina a ta nga lahlekelwa hi sisi munwe hlokweni yakwe. Mat. 10:20; Lu. 12:7; 21:18

³⁵ Laha a nga wulile lezo, i lo teka xibaba, a bonga Nungungulu mahlweni ka vontlhe, a xi khema, a sangula kuga. Mat. 15:36; Mar. 8:6; Joba 6:11

³⁶ Zonake vontlhe va lo tiya-hlana, vaga na vonawu.

³⁷ Hina hontlhe hi nga hi lomo tarwini hi wa hi 276 wa vanhu. Xip. 2:41; Rom. 13:1; 1 Ped. 3:20

³⁸ Ni laha va nga wa gile va xura, va lo hunguta a taru, va hoxa mavele lomu bimbini.

³⁹ Laha gi nga cile, a va tivangi a tiko ga kona; kanilezi va lo wona a yipswha yi nga hi ni fungu, va lo xuva ku yisa taru kona loku zi koteka.

⁴⁰ Va lo tsema tingoti ta tifero, va ti tsika lomu bimbini, va tlhatlha a tingoti ta tilemi; zonake va lo gwimba a tangi ga le mahlweni, va kangatela a mheho, va komama fungwini.

⁴¹ Kanilezi na va chikele laha ku nga ni bimbi hi matlhelo mambiri, a taru gi lo chekama; ni nhovu ya taru yi lo njhibila fungwini yi nga ha ninginiki, kanilezi lenzhako ku lo sangula ku panzeka hi ntamu wa mabyandlati. 2 Kor. 11:25

⁴² A masochwa ma lo lava ku daya tiperesu, va chava lezaku tinwani ti nga pfovola hi ku hlambela.

⁴³ Kanilezi a nduna ya zana, na yi lava ku ponisa Paule, yi lo va beletela; yi laya lezaku lava va zi kotako ku hlambela, a va pfunwala lomu matini, va ranga vaya muhanzeni;

⁴⁴ a vanwani a va hume hi mapulangu, ni vanwani hi zipanzana za taru. Zinghaho vontlhe va lo pona khwatsi le muhanzeni.