Mitiro 20 - Tshwa Bible

Paule aya Makedonia ni le Grekia.

¹ Anzhako na ku mbhelile a woyonga, Paule i lo vitana vapizani, a va khongotela, a onekana navo, a suka aya Makedonia. 1 Kor. 16:5; 1 Tim. 1:3

² Laha a nga wa tsemakanyile lawo matlhelo, a khongotela vamakabye hi magezu yo tala, i lo chikela le Grekia.

³ Laha a nga tshamile kona tihweti tinharu, ni khungo gi wa tsemilwe hi vaJuda go mu daya laha a nga lava ku famba Siria hi taru, zonake i lo xuva a ku tlhela a tsemakanya Makedonia. Xip. 9:23; 23:12; 23:3

⁴ Va lo mu heleketa kala va chikela le Asia, vaSopateri wa le Berea, a nʼwana wa Pirusi; na Aristakusi, na Sekundo va le Tesalonika; Gaiusi wa le Derbe, na Timote: ni va le Asia, Tikukusi na Trofimusi. Xip. 16:1; Efe. 6:21; Tit. 3:12

⁵ Kanilezi va lo ranga va famba, va ya hi lavelela le Troasi.

⁶ Hina hi lo suka le Filipi hi taru anzhako ka masiku ya zibaba zi nga hiko na comelo, hi chikela kabye le Troasi hi ntlhanu wa masiku; hi tshama kona ntlhanu wa masiku ni mambiri. Ekso. 12:14; Xip. 16:8; 2 Kor. 2:12

⁷ Hi siku go ranga ga viki, laha hi nga wa tsombene ku khema xibaba, Paule na a xuva ku suka manziko wa kona i lo kanela kabye, a lehisa kanelo wakwe ku kala xikari ka wusiku. 1 Kor. 10:16; 11:20; Kuv. 1:10

⁸ Ku wa hi kona a tikandiya to tala lomu ndlwini ya xitezi, laha hi nga wa tsombene kona.

⁹ Laha ka njhanela ku wa tshamile a jaha legi va nge hi Etikusi, gi lo tsingelwa hi wurongo ga hombe. Kota lezi Paule a nga nonohisa a kanela, gi lo hlulwa hi wurongo, giwa hi le xitezini xa wunharu, gi tlakulwa na gi file.

¹⁰ Paule i lo relela, a korama hehla kakwe, a mu angarela, aku: Mu nga rili, hakuva a muhefemulo wakwe wa ha hi ka yena. 2 Tih. 4:34; Mat. 9:24

¹¹ Laha na a kanzihile le hehla, i lo khema xibaba, aga, a wulawula navo a xikhati xa hombe, gi kala gica, zonake i lo suka a famba.

¹² Kanilezi va lo wuya ni mufana na a hanya, vontlhe va tangaliswa.

¹³ Kanilezi hina hi lo ranga hiya tarwini, hi suka ha gona hiya Asosi, laha hi nga xuva ku khileta Paule kona, hakuva yena i wa lelele lezo, yena nwinyi na a xuva ku famba hi milenge.

¹⁴ Laha a nga tlhangene na hina le Asosi, hi lo mu khileta, hiya Mitilene.

¹⁵ Na hi sukile laho hi taru, hi manziko wa kona hi lota laha ku cuwukeneko ni le Kiosi. Hi siku gi gamelako hi lo hunza le Samosi; hi manziko wa kona hi lo chikela Miletu.

¹⁶ Hakuva Paule i wa xuva ku hunza hi le Efesusi, lezaku kasi a nga hlweli le Asia; hakuva i wa hatlisela ku ya chikela Jerusalema hi siku ga Pentekosta loku zi wa koteka. Xip. 2:1; 18:21; 1 Kor. 16:8

Paule ni masingalakati ya le Efesusi.

¹⁷ Na a hi le Miletu i lo rumela Efesusi, a ku vitana a masingalakati ya handla.

¹⁸ Ni laha va nga wa tile ka yena, aku ngalo kabye: Nwina ma zi tiva lezi nzi nga tshamisa zona xikari ka nwina kusukela siku lego nzi nga chikela le Asia, Xip. 18:19; 19:1, 10

¹⁹ nzi tirela Hosi hi kutikoramisa kontlhe ni mihloti, ni xikari ka minzhingo leyi nzi nga welwa ha yona hi kota ya makungo ya vaJuda; Vesi 3

²⁰ lezaku a nzi mu lovelangi a timhaka ti vunako, kanilezi nzi lo mu kanelela, nzi mu gonzisa kubaseni ni lomu tindlwini,

²¹ na nzi tiyisa ka vaJuda ni ka vaGreki hi kuhunzulukela ka Nungungulu, ni kukholwa hi Hosi ya hina Jesu Kristu. Xip. 2:38; Mar. 1:15; Lu. 24:47

²² Makunu nziya Jerusalema na nzi bohilwe hi Moya, na nzi nga zi tivi lezi zi ta nga nzi humela seyo; Xip. 19:21

²³ Sine lezaku a mitini yontlhe a Moya wa ku Basa wa nzi tivisa lezaku a ziboho ni zixaniso zi nzi lavelele.

²⁴ Kanilezi a nzi khatali nchumu hi kuhanya ka mina, a nzi wuli lezaku ku na ni lisima ka mina, kasi nza fela ku mbheta a kufamba ka mina, ni ntiro lowu nzi wu amukeleko hi ka Hosi Jesu, lezaku nzi kustumunya hi ivangeli ya tipswalo ta Nungungulu. Xip. 1:17; Rom. 8:35; 2 Kor. 4:1, 16

²⁵ Makunu nza zi tiva lezaku nwina nwentlhe, lava nzi nga fambafamba xikari ka nwina nzi kanela a mufumo wa Nungungulu, mu nga ta ha wona a nghohe ya mina kambe. Rom. 15:23

²⁶ Hikwalaho nyamutlha nza tiyisa ka nwina, lezaku a nzi na nanzu nkhateni wa nwina nwentlhe.

²⁷ Hakuva a nzi lovangi a kuba hungu ka nwina hi khungo gontlhe ga Nungungulu. Lu. 7:30; Joba 15:15; Efe. 1:11

²⁸ Ti woneleni nwina, ni ka ntlhambi wontihe, lowu a Moya wa ku Basa a nga mu veka vahlayisi va wona, a ku gisa a bandla ga Hosi, legi yi gi xavileko hi nkhata wa yona. 1 Kor. 12:28; 1 Tim. 4:16; 1 Ped. 1:19

²⁹ Nza zi tiva lezaku anzhako ka kuva nzi sukile, a timhisi ti pamako ti ta enghena xikari ka nwina, leti ti nga wu tsikiko ntlhambi. Mat. 7:15; 2 Ped. 2:1

³⁰ Na kona xikari ka nwina ku ta vuka a vanhu, lava va kanelako a zilo zi gombonyekileko, kasi ku ti kokela vapizani. 1 Tim. 1:20; 1 Joh. 2:19

³¹ Hikwalaho rinzelani, na mu alakanya lezaku hi malembe manharu a nzi tsikangi ku luleka munwe ni munwani wa nwina hi mihloti a wusiku ni mumu.

³² Makunu nza mu veka ka Nungungulu, ni ka mhaka ya tipswalo takwe, leyi yi zi kotako a ku mu aka, ni ku mu nyika tshomba xikari ka vontlhe lava va basisilweko. Maheb. 9:15; Efe. 1:18; 1 Ped. 1:4

³³ A nzi navelangi mali ya siliva, kutani ya nzalama, hambu ni tinguwo ta munhu. 1 Sam. 12:3; 1 Kor. 9:12; 2 Kor. 7:2

³⁴ Nwina venyi ma zi tiva lezaku a mandla laya ma lo nzi tirela lezi zi nga laveka ka mina, ni ka lava va nga hi zinwe na mina. Xip. 18:3; 1 Kor. 4:12; 1 Tes. 2:9

³⁵ Hi zilo zontlhe nzi lo mu kombisa, lezaku hi ku tira lezo mu yimelwe hi ku vunetela lava va nga ni gome, ni ku alakanya a timhaka ta Hosi Jesu, leti yena wutsumbu a nga wula, aku: Ku katekile ku nyika ku hunza ku nyikiwa. Rom. 15:1; 1 Kor. 9:12; Efe. 4:28

³⁶ Laha a nga wa kanele timhaka leti, i lo khizama a khongela navo vontlhe.

³⁷ Vontlhe va lo rila nguvu, va wela nhanwini ya Paule, va mu pswopswa, Gen. 45:14

³⁸ Na va hi ni wusiwana nguvunguvu hi mhaka leyi a nga yi wulile, yaku: Va nga ta ha wona a nghohe yakwe kambe. Zonake va lo mu heleketa tarwini.